2 Samuel 22 - Baibuli I Leb Kumam 2013

Wer ka Daudi me Bwono Jokwor

¹ Man en wer kame Daudi owero ne Rwot i ceng kame Rwot olake kede ki cing jokwor mege dedede kede ki cing Saulo.

² En ewaco be: Rwot en lela na, en apama atek kame gwoka, doko en ngalak na,

³ en ebedo Rubanga na, lela na kame ango aringo ot gwokere iye. En ebedo ebuku na, doko en ngateko kame laka, en ebedo kateko kede karingo na. En ngalak na, en elaka ki tim me gero.

⁴ Ango alwongere but Rwot ngat kame poore apaka, di eko laka ki cing jokwor na.

⁵ Bwoi me to oudo oluka, ebuka kame neko oudo iyapi mwonya.

⁶ Oudo amoko i bwoi me kabedo me jo oto, oudo ariamo kede owic me to.

⁷ I can na ako lwongere but Rwot; akok but Rubanga na pi konya. En eko winyo dwana i tempulo mere, di koko na oko tuno i yite.

⁸ Di do piny oko yangere, eko tagere; di do dud ipirin kame malo cungo iye oko yangere di tagere, pien Rubanga oudo olilo.

⁹ Yiro di oko bwote ki ume, mac ager kede itonge kobokere bubu oko liel ki doge.

¹⁰ En eko yabo edou di eko bino piny; edou acol cucucuc oudo tie i dud tiene.

¹¹ En eko bedo ingei cerubim di eko por; eko neeno di yamo tie kute ringini kede.

¹² En oudo eburere kede colpiny, edou apek di col kame pii opong iye oudo oluke,

¹³ itonge me mac oko wokun ki lero kame oudo tie i nyime.

¹⁴ Rwot oko yamo ki malo bala mwoc me kot, di dwan Ngamalo Twal oko winyere.

¹⁵ En di eko gweno imalia mege eko sasaro jokwor mege; ecaro gi kede amenyumenyun me kot di eko mino gi kiringo.

¹⁶ Wen pii me nam oko neno, di acakini me lobo oko dong kakaler, kakame Rwot odorano kede gero, kakame wei kame wok ki ume omwoc kede.

¹⁷ Rwot oko cwano cinge ki malo di eko maka; en eko wota ki pii atut.

¹⁸ Bin elaka ki cing ngakwor na atek; elaka kibut jo kame oudo daga; pien gin oudo kitek kibwona.

¹⁹ I kare kame ango oudo atie kede i peko, gin kiko sura, do Rwot oko konya.

²⁰ En ekonya ki peko kame oudo odia; en elaka pien cunye oudo yom i koma.

²¹ Rwot oko timo na bero di lubere kede poore na; en eko mina winyo pien ango ali kede raco moro.

²² Pien ango abedo lubo iswilia ka Rwot, doko likame ayai tenge kibut Rubanga na.

²³ Pien iswilia mege dedede oudo tie i nyima, doko likame ango adagi timo gikame en oudo eciko.

²⁴ Ango oudo ali kede raco moro i nyime, oudo ango agwokere likame atimo raco moro.

²⁵ Pi mano, Rwot otieko timo nango bero di lubere kede poore na, piento en enena ali kede raco moro i nyime.

²⁶ Rwot in igenere but jo ageni; but jo kame li kede raco moro in ili kede raco moro but gi.

²⁷ But jo kame cuny gi cil, in itimo negi bero, do but jo kame ngolo rieko, in inyuto negi rieko nin.

²⁸ In ilako jo kame mwolere, do idwoko piny jo kame tingere.

²⁹ Rwot, in en kame imiango lero, Rwot menyo nango colo kame atie iye.

³⁰ Pien in itie keda, ango akaruno suro jokwor na, doko pien Rubanga na tie keda, ango akaruno somo malo kalamo apama kame koluko kede bomba.

³¹ Rubanga noni yongayo mere tie kakare, cikere kame Rwot mio genere; en ecal bala ebuku ne jo dedede kame ringo ot gwokere bute.

³² Pien ngai en kobedo Rubanga kwanyo Rwot? Doko ngai en kame cal bala lela, kwanyo Rubanga wa?

³³ En Rubanga kame miango teko, doko emio yongayo kame ango alubo bedo ber.

³⁴ En emiango abedo dwir bala amiem, doko emia abedo malo kakabor di likame peko moro ko tuno i koma.

³⁵ En epwonya epone me yi, tetekeny akaruno kudo tir me emal kame otimo kede nyonyo buronsi.

³⁶ In itieko mina ebuku nin kame lako kuo na, kony kame imia otieko mina abedo dano kame pire dwong.

³⁷ In imia alabo tiena lab, doko tiena likame oko cer.

³⁸ Awapo jokwor na di ako neko gi; likame ako dok cen tuno di oudo atieko neko gi.

³⁹ Ajujuto gi arereto gi piny di likame kiko karuno yai; gin kipopoto katiena.

⁴⁰ Pien in en kame imiango teko me yi; in imia abwono jo kame oudo osura.

⁴¹ In imio jokwor na omuko ringo ki nyima; aneko jo kame oudo daga.

⁴² Gin kiko mono kony, do likame tie ngatamoro kame oko konyo gi; kikok but Rwot do likame eko gamo koko gi.

⁴³ Ango apudao gi di kiko doko bala apua, anyonyono gi bala cwoto me yongayo.

⁴⁴ In itieko laka ki lok me jo, iketa pugo atekerin; jo kame oudo ango akwia oko doko jotic na.

⁴⁵ Jokumbor obino di kiko riebere piny i nyima; cucuto di gin kiwinyo kop i koma, gin kiko mina wor.

⁴⁶ Jokumbor cuny gi oko kwanyere, di kiko wokun ki kateko gi kede mielkom.

⁴⁷ Rwot kuo! Pak bed but lela na, tingunu malo nying Rwot ngalak nango.

⁴⁸ En Rubanga kame culo kwor nango; eketo jo me atekerin apat i twer nango.

⁴⁹ En elaka ki cing jokwor na. Rwot in itinga malo kalamo jokwor na; in ilaka ki cing jogero.

⁵⁰ Pi manoni, Okwe Rwot, ango abino paki i diere me atekerin, abino wero wer me paki.

⁵¹ Rubanga mio abaka mere loo kitek, en enyuto amara kalikame lokere but ngat kame en eyero, enyuto but Daudi kede ikwae mege ikar kede ikar.