2 Samuel 21 - Baibuli I Leb Kumam 2013

Koculo Kwor i kom Ikwae ka Saulo

¹ I kare me apugan ka Daudi, kec oko poto pi mwakini adek di lubere aluba. Daudi oko penyo Rwot pi kop nono, di Rwot oko waco ne be, “Remo me nek tie i wi Saulo kede jo me ode, piento en bin eneko jo Gibeon.”

² Abaka oko lwongo jo me Gibeon di eko yamo kede gi. (Jo Gibeon oudo likame obedo ateker me Isirael, do oudo gin kibedo donge me jo Amor mogo anonok; bed bala jo me Isirael oudo okwongere pi gwoko gi, do Saulo oko tamakino wearo gi pi mit mere adwong i kom jo me Isirael kede Yuda.)

³ Daudi oko waco ne jo Gibeon be, “Imitunu be atim ne wu nyo? Epone mene en kame ango akaruno kwanyo kede dub kame oudo kotimo ne wu, me wek imiunu jo ka Rwot winyo?”

⁴ Jo Gibeon oko waco be, “Kop kame tie i diere wan kede Saulo amoto kede jo me ode likame kotwero tieko kede siliba amoto kede saabu, doko da likame wan omito neko dano moro me Isirael.” Daudi oko penyo gi be, “Do nan wun iwacunu be ango atim ne wu nyo?”

⁵ Gin kiko dwoko ne abaka be, “Saulo oudo oikere pi neko wa di eko tieko wa, tetekeny kur ngatamoro acel kibut wa dongi i lobo lung me Isirael.

⁶ Nan mi wa awobe kanyaare kobedo ikwae mege, di wan oko ot lieliero gi i nyim Rwot i Gibea, en bomba ka Saulo, abaka kame Rwot oyero.” Abaka oko dwoko be, “Abino mino gi i cing wu.”

⁷ Do abaka oko weko akwar Saulo acel odong, en Mepiboset wot ka Jonasan, piento en oudo emio cikere but Jonasan wot ka Saulo i nying Rwot.

⁸ Abaka oko kwanyo Aramoni kede Mepiboset, gin awobe ka Risipa nyar ka Aya, kame oudo enywalo kede Saulo; kede awobe kany ka Merab nyar ka Saulo, kame oudo enywalo kede icuo anyinge Adiriel wot ka Barisilai dano me Mekola.

⁹ Daudi oko mino gi i cing jo Gibeon, di gin kiko liero gi i nyim Rwot i wi moru. Gin jo kanyaare kiko to wange acel. Koneko gi i kare kame jo geo kede kac, i kare me cako nyaro mawele.

¹⁰ Di Risipa nyar ka Aya oko kwanyo epuko di eko tagalo kede kima mere i wi moru kakame koneko gi iye. En eko donyo bedo kuno cako i kare me kac tuno i kare kame kot opoto kede i kom liele nogo. I ceng en oudo tic mere riamo winy tenge kame mito camo kom liele nogo, doko iwor da en oudo egwoko gi kikom leini me obar kame mito camo gi.

¹¹ Kakame kowaco ne kede Daudi gikame Risipa nyar ka Aya otimo, en dako ka Saulo kame oudo ebedo kede abeda,

¹² Daudi oko ot omo cogere ka Saulo kede me ka wode Jonasan kibut jo me Jabes i adul me Gilead. Jo nogo oudo okwalo gi ki kacokere adwong me Bet San, en kakame jo me Pilistia oudo oliero gi iye malo i ceng kame jo me Pilistia oneko kede Saulo i wi moru me Gilboa.

¹³ Daudi oko kelo cogere ka Saulo kede me ka wode Jonasan, di eko coko cogere me jo kanyaare kame oudo koliero malo da.

¹⁴ Gin kiko yiko cogere ka Saulo kede me ka wode Jonasan i ates ka Kis papa me Saulo, i bomba me Sela i adul me lobo ka Benjamin; gin kitimo gi dedede kame abaka owaco negi. Ingei manono Rubanga oko winyo kwac gi pi lobo gi.

Yi kede Itucio me Jo me Pilistia

¹⁵ Yi bobo oko poto i dierediere me jo me Pilistia kede jo me Isirael, di Daudi oko upere kede isirikalen mege eoto i yi nono. Gin kiko bungo yi kede jo me Pilistia omio Daudi oko ool twatwal.

¹⁶ Isbibenob, ngat koudo obedo akwar me itucio me jo, kame oudo tie mako tong me nyonyo buronsi kame lebe wao bala kilo adek kede dul, di oudo etie ngapo epima anyen, oko paro be oudo etwero neko Daudi.

¹⁷ Do Abisai wot ka Seruya oko ot konyo Daudi, eko yi kede icuo nono paka neke. Di do isirikalen ka Daudi oko kwongere ne be, “In likame bobo ibino meede ot kede wan i yi, pien likame wan omito be in ngat kame nataman itie bala etala me Isirael itoi.”

¹⁸ Ingei manono, yi ace bobo oko poto kede jo me Pilistia kakame kolwongo be Gob. Di Sibekai dano me Kusa oko neko Sap ngat koudo obedo akwar me itucio me jo.

¹⁹ Yi ace bobo oko poto kede jo me Pilistia i kabedo kame kolwongo be Gob, di Elikanan wot ka Yair dano me Betelem oko neko Goliat dano me Gat. Tir me tong mere oudo dwong bala yat kame jo kudo me kuno ausin me egoe.

²⁰ Yi ace bobo oko poto Gat, kame oudo tie iye dano adwong dwong me aura, kame cinge acelacel oudo tie kede anyira lwete kanyape, kede tiene acelacel da oudo tie kede anyira lwete me tiene kanyape, manono omio lwete dedede oudo tie ot are kiwie ongwon.

²¹ Lonono oko donyo nywaro jo me Isirael, di Jonasan, wot ka omin me Daudi kame nyinge Simei, oko neke.

²² Jo ongwon nogi oudo obedo anywali me itucio me jo me Gat; Daudi kede jo mege oko neko gin dedede.