2 Samuel 19 - Baibuli I Leb Kumam 2013

Joab Obunano Daudi

¹ Joab oko winyo be Abaka Daudi oudo tie koko Abisolom.

² Manono oko mino kilel kame isirikalen dedede oudo tie kede pi bwono yi oko lokere negi odoko koko, pien gin kiwinyo be abaka oudo tie koko wode.

³ I ceng nono isirikalen oko kwalere donyo i bomba ineno bala isirikalen kame lewic omako pien kiringo ki yi kitie kwalere dwogo.

⁴ Abaka oko umo wange di eko kok kede dwane amalo be, “Okwe woda Abisolom, Okwe Abisolom, kom woda, kom woda!”

⁵ Di Joab oko donyo i ot but abaka di eko waco ne be, “Tin in imio lewic omako jotic ni dedede, jo kolako kuo ni, kede kuo me awobe kede anyira ni, kede kuo me mon ni kede me mon kame ibedo kede abeda kalikame inyomo.

⁶ In itie kede amara but jo kame dagi, do idagi jo kame mari. Tin in itieko nyuto kakaler be jodongo me isirikalen kede isirikalen dedede kony gi li kibuti; pien ango atieko neno be koto Abisolom oudo nan kuo di wan dedede otieko to, koto nan cunyi yom adikinicel.

⁷ Aso miero nan in ioti idwok cuny jotic ni kede kope me mwolo. Alairo ni i nying Rwot be, ka likame itimo kamanono, iwor atin noni gin dedede kiyaro yai kiweki. Manono bino bedo ni can arac kalamo can dedede kame in itieko riamo kede i kuo ni tuno tin.”

⁸ Abaka oko yai di eko ot bedo i nget erute me bomba. Isirikalen oko winyo be abaka oudo tie bedo kuno di gin dedede kiko ot cokere bute. Jo me Isirael oudo oringo ngat acelacel odok ture.

Daudi Oyai pi Dok Yerusalem

⁹ Jo dedede me ateker me Isirael oudo do odonyo lok di kiwaco be, “Abaka bin olako wan ki cing jokwor wa kede ki cing jo Pilistia. Aso nan en eko ringo tenge ki lobo wa pi ringo Abisolom.

¹⁰ Do Abisolom ngat kame wan oudo owirunu pi pugo wa nan kotieko neko i yi. Pi mano, pinyo ngatamoro likame tamo ot dwoko abaka?”

¹¹ Kop kame jo me Isirael oudo tie waco oko tuno ne abaka, omio en eko cwano kop but josaseredoti Sadoki kede Abiata be, “Wacenu joadongo me Yuda be, ‘Pinyo komio wun idongunu cen likame imitunu timo gimoro me dwoko abaka i paco mere.

¹² Wun ibedunu wade na, doko wanunu obedunu anywali me remo acel; pinyo komio wun imitunu bedo jo me ajikini me dwoko abaka?’

¹³ Doko da wacenu Amasa be, ‘Benyo, mam wan obedo wade? Cako nan ango atie keti bedo ngadwong me isirikalen kawang Joab; Rubanga cwai epie gwea ka atie ngalo.’ ”

¹⁴ Kop kame Daudi owaco oko wano cuny jo dedede me Yuda i kome, di gin kiko cwano ne abaka kop pi dwogo, en karacel kede jotic mege.

¹⁵ Manono oko mino abaka oyai di eko cako dwogo. En eko riamo kede jo me Yuda i ecilet me Yorodan; gin oudo kibino paka Giligal pi konye ngolo ecilet.

¹⁶ Simei wot ka Gera, dano me ekeko ka Benjamin kowok ki Bakurim, oko ot awakawaka kede jo me Yuda pi riamo kede Daudi.

¹⁷ En oudo etie upere kede jo tutumia acel me ekeko ka Benjamin. Siba da, ngatic me jo me ot ka Saulo oko bino kede awobe mege tomon kiwie kany kede jotic ot are, gin kionyaro di kiko geo tuno ne abaka i ecilet me Yorodan.

¹⁸ Gin kiko ngolo ecilet pi omo abaka kede jo mege, kede pi timo gi dedede kame cuny abaka oudo mito. Kakame abaka oudo tie iikere kede me ngolo ecilet, Simei wot ka Gera oko riebere piny i nyime,

Daudi Onyuto Kisa ne Simei

¹⁹ di eko waco ne abaka be, “Adwong na, akwai isasiro ango kur imak i cunyi gikarac kame ango atimo i ceng kame in iyai kede ki Yerusalem. Akwai kur iket tam ni iye.

²⁰ Pien ango angeo be adubo; neningo, manono en komio tin ango abedo dano me agege me ekeko ka Yosepu koyai pi bino riamo kedi, in abaka na.”

²¹ Abisai wot ka Seruya oko dwoko be, “Kopoore neko Simei, piento en oudo elamo dano kame Rwot oyero pi bedo abaka.”

²² Do Daudi oko waco be, “Wun awobe ka Seruya, nyo atie mino imorunu wangu i koma, komio tin idokunu bala jokwor na? Iparunu be kopoore neko dano moro i Isirael i ceng atin? Mam ango angeo be tin ango atie abaka me Isirael?”

²³ Abaka oko waco ne Simei di ekwongere be, “Likame kobino neki.”

Daudi Onyuto Kisa ne Mepiboset

²⁴ Mepiboset akwar Saulo oko ot i ecilet me Yorodan pi riamo kede Daudi. En oudo eweko tiene omodo, doko da eko dagi lielo tike amoto lwoko igoen mege cako i ceng kame abaka oyai kede ki Yerusalem tuno i ceng kame en edwogo kede i mulem.

²⁵ Kakame en ewok kede ki Yerusalem pi riamo kede abaka, abaka oko penye be, “Mepiboset, pinyo komio likame iko bin upere keda?”

²⁶ En eko dwoko be, “Adwong na abaka, bala kame in ingeo kede, ango angwalo. Do ango oudo awaco ne ngatic na be etwei na kom me bedo ingei punda, me wek abed iye di ako wanano en koto ako upere kede abaka, do en eko gire ngala.

²⁷ En ewaco kop me angalo i koma i nyimi, in adwong na abaka. Do in ical bala malaika ka Rwot, pi manono, in tim gikame ineno ber ni.

²⁸ Oudo jo dedede me ot ka papa nango in ipoore neko, do in iko minango abedo ngat acel kikom jo kame camo kedi i emesa acel. Adwong na abaka, pi mano, twero nyo ace kame ango bobo atie kede me kwani gimoro ace?”

²⁹ Abaka oko waco ne be, “Kara in pwodi itie meede yamo kope amaki pinyo? Ango atieko moko be in kede Siba ibinunu poko lobo ka Saulo.”

³⁰ Mepiboset oko waco be, “Wek Siba tere dedede, pien gikame pire dwong kibuta en ine be, in itieko dwogo paco iko tuno kede mulem.”

Daudi Onyuto Kisa ne Basilai

³¹ Barisilai dano me Gilead da oudo obino ki Rogelim, di eupere kede abaka pi ot konye ngolo ecilet me Yorodan.

³² Barisilai oudo obedo icuo oti twatwal me mwakini ot kanyauni. En oudo ebedo konyo abaka kede cam i kare kame abaka oudo tie kede Makanaim, piento en oudo ebedo i cuo kobaro twatwal.

³³ Abaka oko waco ne Barisilai be, “Upere keda Yerusalem, di ango ako donyo gwoki ki kuno di itie iyapi keda.”

³⁴ Do Barisilai oko dwoko ne abaka be, “Iparo be ango pwodi doko adong kede mwakini adi me kuo, mio doko aot kede abaka Yerusalem?

³⁵ Ango atie kede mwakini ot kanyauni me dongo na; likame doko tie gimoro kame pwodi yomo cunyango. Leba bobo likame twero bilo gikame acamo amoto kame amato. Dwan jo awero da likame ango atwero winyo. Nyo kara doko atera kuno ot mini peko, in adwong na abaka?

³⁶ Ango abino nyamaro in kalamo ecilet me Yorodan momot. Likame ango apoore pi udo giamia moro me pwoc acal kamanono kibuti.

³⁷ Akwai iyei na adoki, me wek atoi i bomba me turwa, i nget atesin ka papa na kede me ka toto na. Kimkam ngatic nango ine, wek en eupere kedi di in iko timo nen gi dedede kame in ineno be poore.”

³⁸ Abaka oko dwoko be, “Kimkam bino upere keda, doko ango abino timo ne gi dedede kame in ineno be ber; doko da ango abino timo ni gi dedede kame in imito be atim ni.”

³⁹ Di do Daudi kede jo mege dedede oko ngolo Yorodan. En eko moto Barisilai di enote, eko mine winyo, di Barisilai oko dok ture.

Jo me Yuda kede Jo me Isirael Obedo kede Piem

⁴⁰ Jo dedede me Yuda kede dul jo me Isirael oko tero abaka paka kiko tuno Giligal. Kimkam da oupere kede.

⁴¹ Di jo dedede me Isirael oko ot but abaka di kiko waco ne be, “Adwong, pinyo komio imiegu wa me Yuda omai kibut wa, di kiko keli ngolo kedi ecilet me Yorodan, karacel kede jo ni?”

⁴² Jo dedede me Yuda oko dwoko ne jo me Isirael be, “Pien wan obedo wad kiyapiyapi kede abaka. Pinyo komio kop noni tie wango cunyu? Iparunu be abaka en kobedo wilo ne wan cam? Arabo iparunu be tie giamia moro kame etieko mino wa?”

⁴³ Jo me Isirael oko dwoko ne jo me Yuda be, “Wan otie kede iner tomon i kom abaka, akadi i kom Daudi da wan pwodi okato wu. Pinyo do komio itienu kede acae i kom wa? Mam wan en kame obedo jo me agege me cako poro kop me dwoko abaka wa?” Do kope kame jo me Yuda owaco oko bedo gwai kalamo kope me jo me Isirael.