2 Samuel 18 - Baibuli I Leb Kumam 2013

Kobwono Abisolom di oko Neke

¹ Di Daudi oko coko jo kame oudo tie kede karacel di eko popoko gi i ikodeta me jo tutumia tutumia, kede me jo tol acel tol acel, di eko keto jodongo kame telo gi.

² En eko poko isirikalen i ikodeta adek adongo di rorom, ekodet acel eketo i cing Joab, acel i cing Abisai wot ka Seruya, omin me Joab, kede ekodet acel i cing Itai dano me Gat. Abaka oko waco ne isirikalen nogo be, “Ada kikoma abino ot kede wu.”

³ Do isirikalen oko dwoko ne be, “Koto kur ioto kede wa. Pien ka wan oringo amoto ka gin kineko dul me jo wa, manono gin likame kibino paro. Do in irom kede jo tutumia tomon i diere wa. Ebino bedo ber ka in idong i bomba kan di iko donyo cwano ne wan kony.”

⁴ Abaka oko waco negi be, “Ango abino timo gikame wun inenunu be ber.” Aso abaka oko cungo i nget erute di isirikalen sirito wok ooko i ikodeta me tol acel tol acel kede me tutumia tutumia.

⁵ Abaka oko mino cik but Joab kede Abisai kede Itai be, “Timanu ber kur itimunu gimoro arac ne awobi na Abisolom.” Isirikalen dedede oko winyo di Daudi mio jodongo kame telo gi cik nono.

⁶ Aso isirikalen ka Daudi oko ot itela kiko yi kede jo me Isirael i abum me Epuraimu.

⁷ Jotic ka Daudi oko bwono isirikalen me Isirael ki kanono; kibwono gi atwal atwala di kiko neko jo tutumia ot are (20,000) ceng nono.

⁸ Yi oko nyai oromo piny nono dedede; jo kame yen me abum en koneko oko bedo tot kalamo jo kame koneko kede epima.

⁹ Abisolom oko riamo kede jotic ka Daudi. En oudo etie bedo ingei asigira mere etie ringo kede, do kakame ebeo kede i dud yat oak kojanyo, wi Abisolom oko moko i ajange me yat. Asigira oko ringo okato do en eko dong di etie ledo i wi yamo.

¹⁰ Dano ka Daudi acel oko nene di eko ot waco ne Joab be, “Aneno Abisolom di etie ledo i ajange me yat oak.”

¹¹ Joab oko dwoko be, “Benyo? Inene? Nyo ogengi jute paka to di eko poto piny? Oudo koto ango ami Siliba akaya tomon kede rakoba.”

¹² Do icuo nono oko dwoko ne be, “Akadi bed bala oudo koto imia siliba tutumia acel, do koto ango likame atingo cinga neko wot ka abaka; pien abaka ociki kede Abisai kede Itai di wan owinyo be, ‘Timanu ber kur itimunu gimoro arac ne awobi na Abisolom!’

¹³ Ka koto oudo ango aneko Abisolom, koto abaka owinyo kop nono pien likame tie kop moro kame kanere kibute, in kikomi koto iko giri tengere.”

¹⁴ Joab oko waco be, “Ango likame ayaro dubo kare kamanoni yamo kedi.” En eko kwanyo tongini adek di eko lato gi i cuny Abisolom di oudo pwodi en ekuo etie liero i ajange me yat oak.

¹⁵ Di awobe tomon kame mako jame ka Joab me yi oko lukaro Abisolom di kiko dope.

¹⁶ Joab oko kuto agwara me jiko yi, di isirikalen oko dwogo ki kawapo jo me Isirael.

¹⁷ Gin kiko kwanyo Abisolom kiko ot uce i bur atut kame oudo tie i abum, di kiko kumemo atukit adwong me engaro i kome. Do jo me Isirael dedede oko ringo odok i miere gi.

¹⁸ I kare kame oudo ekuo kede, Abisolom oudo osipo epir me kidi me yutuno en i Aditot me Abaka, piento en ewaco be, “Likame ango atie kede woda moro kame kobino yutuno ango kede.” En eko cako ne epir me kidi nono nyinge be Abisolom, omio tuno tin kolwonge be Kidi me yutuno Abisolom.

Daudi Owinyo To ka Abisolom

¹⁹ Di Akimas wot ka Sadoki oko waco be, “Ber ango aringi ater rwonge aber ne abaka be Rwot otieko lake ki cing jokwor mege.”

²⁰ Joab oko waco be, “Likame ipoore tero Rwonge aber tin, in itwero tero rwonge no ceng apat do likame tin, pien wot ka abaka otieko to.”

²¹ Di Joab oko waco ne ngatic mere me Kus be, “Oti iko waco ne abaka gikame ineno.” Icuo nono oko luro i nyim Joab di eko ringo.

²² Akimas wot ka Sadoki bobo oko waco ne Joab be, “Wek gikame mito timere etimere; do yei ne ada aringi alub loca tero kop.” Joab oko dwoko ne be, “Woda, pinyo komio ida itie mito ot tero kop do di likame tie giamia moro kame ibino udo iye?”

²³ Akimas oko bobo waco be, “Wek gikame mito timere etimere, do ango ayaro ot.” Joab oko waco ne be, “Aso ringi.” Akimas oko ringo elubo yongayo kame beo i elet di eko lor i aditot me Yorodan, di eko mako dano me Kus ca i yongayo di eko lanye.

²⁴ Daudi oudo tie bedo i dierediere me erute me yie kede erute me ooko me bomba. Ngat kame kio piny oko yito malo i wi gedo me erute, eko tingo wange malo di eko neno dano moro di etie ringini en kene.

²⁵ Ngat kame kio piny nono oko ilelem waco ne abaka gikame eneno. Abaka oko waco be, “Ka en etie kene, dwong mere be etie kelo rwonge aber.” Ngat kame oudo tie ringini nono oko meede ameda noko gi.

²⁶ Di ngat kame kio piny bobo oko neno dano ace di tie ringini, en eko lwongo ngat kame daro erute di eko waco ne be, “Neningo, dano ace bobo ica etie ringini en kene.” Abaka oko waco be, “Eda etie kelo rwonge aber.”

²⁷ Ngat kame kio piny oko waco be, “Dano kotelo yongayo ringo bala Akimas wot ka Sadoki.” Abaka oko dwoko be, “En ebedo dano aber, etie kelo rwonge aber.”

²⁸ Akimas oko lelemo moto abaka di eko riebere piny i nyime di eko waco be, “Pak Rwot Rubanga ni, ngat kame omi in abaka na ibwono jo kojemo ni.”

²⁹ Abaka oko penye be, “Do awobi na Abisolom kono, etie kiber?” Akimas oko dwoko be, “Kakame Joab oora kede buti, ango ngatic ni, ako winyo jo ocelakino, do likame ako niang gi kotimere.”

³⁰ Abaka oko waco ne be, “Cung kano.” En eko ot cungo kanono.

³¹ Dano me Kus da oko tuno di eko waco be, “Akelo ni rwonge aber, in adwong na abaka! Rwot tin otieko laki ki cing jo kame oudo ojemo ni.”

³² Abaka oko penye be, “Do awobi na Abisolom kono, etie kiber?” En eko dwoko ne abaka be, “Koto gikame otimere i kom awobi nono otimere i kom jokwor ni, kede i kom jo dedede kame jemo ni.”

³³ Kop nono oko cobo cuny abaka adikinicel. En eko yito i agola me malo me gedo me erute di eko donyo koko i kuno be, “Okwe woda Abisolom, kom woda, woda Abisolom! Koto oudo ango en ato kawangi da, Okwe Abisolom, kom woda, kom woda!”