2 Samuel 17 - Baibuli I Leb Kumam 2013

Kusai Omio Abisolom Tam kame Rwenye

¹ Ingei manono, Akitopel oko waco ne Abisolom be, “Wek ayer cuo tutumia tomon kiwie are (12,000) di ango ako yai wapo Daudi iwor katin.

² Ango abino tuno i kome i esawa kame eol kede doko di cunye odubere. Lworo atek bino make di jo mege dedede ko bino ringo tenge. Ango abino neko abaka kenekene,

³ di ako dwoko jo mege dedede buti bala ateran atie bino paco but cware. In ibino neko dano acel kenekene, do jo apat dedede girgi likame bino riamo kede peko moro.”

⁴ Tam noni oko yomo cuny Abisolom kede joadongo me Isirael dedede.

⁵ Abisolom oko waco be, “Lwongunu Kusai Ngaraki da owiny tam mere.”

⁶ Kakame Kusai otuno kede, Abisolom oko waco ne be, “Man en tam kame Akitopel omio wa, benyo, olube? Aso ka li, wace wa gikame opoore pi timo.”

⁷ Kusai oko dwoko be, “Manoni likame obedo tam aber kame Akitopel tin omio wu noni.

⁸ In ingeo be papa ni Daudi kede jo mege obedo jo yi, doko da nan kitieko doko ger bala edubu kame komao idwe mege. Medo i wi manono, papa ni tie kede diru me yi; likame eyaro yei buto karacel kede isirikalen.

⁹ Akadi nan da, cengemogo en etie pwono i bur moro, arabo karamoro apat. Doko nen ba, ka en eneko isirikalen nin i asura me agege, ngat kame winyo bino waco kakaler be kobwono isirikalen nin.

¹⁰ Manono ko bino mino lworo mako akadi isirikalen kame tek i yi da, kame lworo li i cuny gi bala inguon, cuny gi bino pirisar atwal pien jo dedede me Isirael ngeo be papa nin obedo ngayi, doko jo mege obedo jo yi atek.

¹¹ Do tam kame ango atie mino en ine be, mi jo dedede me Isirael cokere karacel buti, cako ki Dan tuno Beereseba, di kiko bedo tot bala asinge me dog nam, di in kikomi iko telo gi ot yi.

¹² Manono bino mino wa oudo Daudi ki karamoro kenekene kame en epwono iye, di wan oko coore i kome bala toyo aony piny. Manono bino mino likame esobolo bwot, akadi kiton jo mege kame etie kede gi da.

¹³ Ka edok eko donyo i bomba, jo dedede me Isirael bino kelo aunoi di kiko wano kede bomba paka piny i aditot. Likame kidi moro kame kogere kede bino dong kunono.”

¹⁴ Abisolom kede jo dedede me Isirael oko waco be, “Tam kame Kusai Ngaraki omio ber kalamo tam kame Akitopel omio.” Pien Rwot oudo otieko moko tam mere be kur jo lub tam aber kame Akitopel mio, me wek en ekaruno timo ne Abisolom can.

Kusai Okwenyaro Daudi pi Lwi

¹⁵ Di Kusai oko waco ne josaseredoti Sadoki kede Abiata tam kame en emio Abisolom kede jotel me Isirael, kede tam kame Akitopel da omio gi.

¹⁶ Kusai oko waco negi be, “Pi mano, cwaunu dano awakawaka but Daudi ot wace be, ‘Kur ibut tin i wi tim kakame kongolo kiye nam, do miero itam kede teko dedede ngolo loka tetuca, aso ka li, kobino maki karacel kede jo ni di oko neneko wu.’ ”

¹⁷ Jonasan kede Akimas oudo obedo tie cungo i atan me Enerogel kuro kop, pien gin oudo kitie kede lworo be miero kur nen gi di kitie donyo i bomba. Atin nyako apasoit moro tie kame oudo tero ne gin kop, di gida kiko ot waco ne Abaka Daudi.

¹⁸ Do awobi moro oko neno gi di eko ot waco ne Abisolom. Manono oko mino gi kiyai ki kanono awakawaka di kiko ot Bakurim i ot me icuo moro kame oudo tie kede atan i diakal mere, di do gin kiko donyo i atan nono.

¹⁹ Dako me icuo nono oko kwanyo ikeka eko peto i wi bur me atan nono, di eko mono iye engano, omio likame tie ngat kame oudo twero neno di eko ngeno.

²⁰ Jotic ka Abisolom oko bino i ot nono di kiko penyo dako nono be, “Akimas kede Jonasan tie tuai?” Dako ca oko dwoko negi be, “Kingolo pii loka tetuca.” Do kakame kimo gi kede di likame kiko udo gi, gin kiko dok Yerusalem.

²¹ Ingei jotic nogo yai dok, Akimas kede Jonasan oko wok ki bur me atan, di kiko ot tatamo ne Abaka Daudi gi dedede. Gin kitatamo ne iik arac kame Akitopel otimo i kome, di kiko waco ne be, “Bubunyo ngolo nam loka tetuca.”

²² Kikano Daudi kede jo mege dedede kame oudo tie kede oko yai kiko ngolo ecilet me Yorodan; kakame piny oru kede oudo gin dedede kitieko ngolo loka tetuca.

²³ Kakame Akitopel oneno kede be likame kolubo tam kame en emio, en eko tweno gi me bedo ingei punda mere di eko yito iye edok ture i bomba me turgi. En eko mino kope amako epone kame ode poore dong kede di eko dere. Bin oko yike i ates ka papa mere.

²⁴ Kakame Abisolom kede jo me Isirael ongolo kede ecilet me Yorodan, Daudi oudo otieko tuno i bomba me Makanaim.

²⁵ Abisolom oudo oketo Amasa pi bedo ngadwong me isirikalen kawang Joab. Amasa oudo obedo wot ka Jeta Ngaisimael; toto mere oudo obedo Abigail nyar ka Nakas kede amin me Seruya toto me Joab.

²⁶ Abisolom kede jo mege oko gero kimere gi i lobo me Gilead.

²⁷ Kakame Daudi otuno kede Makanaim, en eko udo Sobi wot ka Nakas, dano me bomba me Raba kame tie Amon, kede Macir wot ka Amiel dano me Lodebar, kede Barisilai dano me bomba me Rogelim kame tie Gilead.

²⁸ Gin kiko kelo kabutere, kalayan, ikopen kede agune me lobo, engano, mawele, alos, nyige me engano kame kocelo kede mac, muranga kede ngor,

²⁹ mokic kede cak komakakin, romini kede cak me diang korurano; gin oudo kikelo gi nogi ne Daudi kede jo mege, pien kiwaco be, “Kec kede orio oneko isirikalen, doko da kiol i wi tim.”