2 Samuel 16 - Baibuli I Leb Kumam 2013

Daudi kede Siba

¹ Kakame Daudi okalamo kede okwidi me wi moru momot, en eko riamo kede Siba, ngatic ka Mepiboset, di etie kede pundan are kame yeo mugati tol are, abungeta tol are me olok kotuo, anyakini kame kongwedo tol acel, kede isau me lau kame bwini tie iye.

² Abaka oko penyo Siba be, “Ikelo gigo dedede menyo?” Siba oko dwoko be, “Akelo pundan ne abaka kede jo me ode pi bedo gikame gin kioto kede; mugati kede anyakini kame kongwedo akelo me acama ne awobe; kede bwini akelo ne jo kame bino nure i wi tim.”

³ Abaka oko dwoko be, “Do Mepiboset, akwar ngadwong ni tie tuai?” Siba oko dwoko be, “En edong Yerusalem, pien etie tamo be i ceng atin jo me Isirael bino dwoko i cingen ajakanut ka kwaru mere Saulo.”

⁴ Abaka oko waco ne Siba be, “Gi dedede kame Mepiboset tie kede nan otieko doko megi.” Siba oko dwoko be, “Ango abedo ngatic ni; akwai imeede bedo kede cuny aber buta, in rwot na abaka.”

Daudi kede Simei

⁵ Kakame Abaka Daudi otuno kede Bakurim, icuo acel wad kede Saulo oko bino pi riamo kede Daudi, nyinge oudo Simei wot ka Gera; en oudo ebino di elamo Daudi.

⁶ Simei oko cako lwomolwomo ingaroi i kom Daudi karacel kede jotic mege, bed bala jo ka Daudi kede isirikalen adare oudo olukaro en ki bad dedede.

⁷ Simei oko donyo lame di eredo be, “Irwa tenge! Irwa tenge! Nganek! Dano arac!

⁸ In imao apugan ka Saulo, nan Rwot tie timo onyanga i komi pi jo me ot ka Saulo kame in ineko. Rwot nan otieko mino ajakanut i cing wodi Abisolom; nen nan can otieko poto i komi, in nganek!”

⁹ Di Abisai wot ka Seruya oko waco ne abaka be, “Pinyo amio ogwok agwoka ni lami? Wek ango aoti angol ngute tel!”

¹⁰ Do abaka oko dwoko ne awobe ka Seruya be, “Man likame obedo kop amako wu. Ka en etie lama pien Rwot en kocwae pi timo kamanono, ngai kame twero penye gi komio etimo kamanono?”

¹¹ Di Daudi oko waco ne Abisai kede ne jotic mege dedede be, “Ka ber woda kikoma tie mito neka, do do dano me ekeko ka Benjamin noni bino kalamo en tien adi! Wun wekenu, wekenu emeede lama pien Rwot en omie timo kamanono.

¹² Cengemogo Rwot bino neno can na di eko mina winyo kawang ilam kame en tin etie lama kede.”

¹³ Aso, Daudi kede jo mege oko meede ot di kilubo gudo. Simei oko meede ot kede gi di eririo ki bad moru, di elamere kede di elwomolwomo ingaroi i kom gi, doko di ekiro apua i kom gi.

¹⁴ Abaka kede jo mege oudo ool kakame kituno kede Yorodan, di do gin kong kiko wei kunono.

Abisolom i Yerusalem

¹⁵ Di Abisolom kede jo me Isirael dedede kame oudo tie kede en oko donyo Yerusalem, Akitopel da oudo tie karacel kede gi.

¹⁶ Kakame Kusai Ngaraki, ngawot Daudi otuno kede but Abisolom, en eko lelemo be, “Abaka bed nakanaka! Abaka bed nakanaka!”

¹⁷ Abisolom oko penyo Kusai be, “Manoni en obedo wor kame in itie kede but ngawoti Daudi? Nyo kogengi upere kede?”

¹⁸ Kusai oko dwoko be, “Likame kamanono. Ango atie merin ngat kame Rubanga, kede jogi dedede, karacel kede jo dedede me Isirael oyero, ango abino dong meri.

¹⁹ Doko da iparo be ango apoore tic ne ngai? Mam apoore tic ne wode? Bala kame ango oudo abedo tic ne kede papa ni, nan ango abino tic nin.”

²⁰ Di Abisolom oko penyo Akitopel be, “Mi wa tam, nyo kame opoore timo?”

²¹ Akitopel oko dwoko be, “Oti ibut kede mon kame papa ni oudo bedo kede gi bala mege, mon kame nan eweko daro ode; manono bino mino jo dedede me Isirael kame winyo kop nono ngeo be ateteni in itieko dingere kede papa ni, di do jo kame gangi ko bino bedo kede cuny atek.”

²² Aso oko gero ne Abisolom eema i wi ot ka abaka, di do en eko buto kede mon ka papa mere di jo dedede me Isirael neno.

²³ Tam dedede kame Akitopel oudo mio i kare nono oudo jo gamo agama ineno bala kibedo me ka Rubanga; Daudi kede Abisolom oudo yei gamo tam mere.