2 Samuel 15 - Baibuli I Leb Kumam 2013

Abisolom Otimo Iik me Mano Apugan

¹ Ingei manoni, Abisolom oko udo cabala kede asigira kame make, kede isirikalen ot kany kame telo nen yongayo.

² Abisolom oko donyo yai odiko sek di eko ot cungo i nget gudo i erute me bomba. Tek ka ngatamoro oudo ooto kuno pi tero pido mere i nyim abaka, Abisolom oudo lwonge di eko penye bomba kame ewok kiye. Ka dano nono oko waco ne ekeko me anywali mere,

³ Abisolom oudo ko waco ne be, “Neningo, koko nin tie kakare, do likame tie dano moro kame abaka oketo kame twero winyo pido ni.”

⁴ Abisolom doko ko meede kede yamo be, “Okwe koto oudo abedo ngangolkop i Isirael! Koto oudo jo kame tie kede pido gi bino buta di ango ako ngolo kop gi kakare.”

⁵ Ka dano oudo oko bino pi riebere piny i nyime, en oudo ecwao cinge di eko make di eko note.

⁶ Abisolom oko timo kamanono ne jo dedede kame oudo kelo pido gi but abaka, manono oko mino eloko cuny jo me Isirael bute.

⁷ Ingei mwakini ongwon Abisolom oko waco ne abaka be, “Okwe yei na aoti Keburon pi cobo cikere na kame atieko timo but Rwot.

⁸ Pien ango oudo akwongere but Rwot i kare kame abedo kede Gesur i Aram be, ‘Ka ateteni Rwot odwoka Yerusalem, ango abino donyo wore i Keburon.’ ”

⁹ Abaka oko waco ne be, “Ot kede mulem.” En eko yai di eko ot Keburon.

¹⁰ Do Abisolom oko cwano jo mogo i mung but atekerin dedede me Isirael pi waco negi be, “Tek kame iwinyunu koko me agwara, lelemunu be, ‘Abisolom otieko doko abaka i Keburon.’ ”

¹¹ Cuo tol are me Yerusalem oko ot kede Abisolom; gin oudo kibedo wele kame kolwongo, omio kioto abongo ngeno nyo kame oudo tie timere.

¹² Kakame oudo Abisolom tie mino kede giayala, en eko cwano aor i bomba me Gilo pi lwongo Akitopel, ngat acel kikom jo kame oudo mio Daudi tam. Iik nono me mano apugan oko meede ameda doko tek, doko da wel me jo kame oudo tie gango tam ka Abisolom oko meede.

Daudi Oringo Tenge ki Yerusalem

¹³ Dano moro oko tero ne Daudi kop be, “Cuny jo me Isirael tie do i kom Abisolom.”

¹⁴ Daudi oko waco ne jotic mege dedede kame oudo tie kede en i Yerusalem be, “Yaunu oringunu, aso ka li likame tie ngatamoro kikom wa kame bino bwot ki cing Abisolom. Bunyunu, ka li en ebino mako wa eko timo ne wa can, di eko neneko jo kame tie i bomba kede epima.”

¹⁵ Jotic ka abaka oko dwoko ne be, “Adwong, jotic ni otieko iikere pi timo gi dedede kame tam nin omoko.”

¹⁶ Aso abaka oko yai, di eupere kede jo me ode kede jotic mege, kwanyo kenekene mon tomon kame oudo ebedo kede gi bala mege, kame oudo eweko odong pi daro paco mere.

¹⁷ Abaka oko yai, di jo apat dedede oko lube, gin kong kiko cungo i dog ot me ajikini.

¹⁸ Jotic mege dedede oko beo i nyime; jo Keret, jo Pelet, kede jo tol kanyape (600) dedede kame oudo bin olube wok ki Gat, gin dedede kiko kato ne abaka anyim.

¹⁹ Abaka oko waco ne Itai dano me Gat be, “Ida itie upere kede wa pinyo? In doki ioti ibed kede abaka anyen. In ibedo ngakumbor, doko da in iringino kan ki turu pi gwokere.

²⁰ In kom pwodi ibino kan nyoronyoro ni, pinyo amio ango ako cako rimo kedi piny, di ber ada likame angeo kakame atie ot iye? Kwany joe ni idok kede gi; akwao Rubanga enyut ni amara mere kalikame lokere kede genere mere.”

²¹ Do Itai oko dwoko ne abaka be, “Adwong, alairo i nying Rwot kede i nyingi be, ango abino bedo tie kedi kabedo dedede kame in ioto iye, akadi i to amoto i kuo.”

²² Daudi oko waco ne Itai be, “Mano ber, aso cak ot!” Aso, Itai oko ot karacel kede jo mege, kede jo dedede kame oudo kuo i cing gi.

²³ Jo dedede me piny nono oko mwoco koko i kare kame jo ka Daudi tie ot kede. Abaka karacel kede jo mege oko ngolo atapar me Kideron, di jo dedede oko dok tetu wi tim.

²⁴ Abiata kede Sadoki oudo tie kuno, karacel kede Jolebi, di kiyeo Sanduku me Isikan ka Rubanga. Gin kiko cibo Sanduku me isikan ka Rwot piny paka tuno di jo dedede otieko wok ki bomba.

²⁵ Di abaka oko waco ne Sadoki be, “Dwok Sanduku me Isikan i bomba. Ka Rwot cunye mita, cengemoro ebino mina adwogo di ako neno Sanduku me Isikan noni kede kakame etie iye.

²⁶ Do ka likame cunye yom i koma, ango ine, wek en etim nango gikame en eneno be ber kibute.”

²⁷ Abaka doko da oko waco ne ngasaseredoti Sadoki be, “Neningo, in doki i bomba kede mulem, in karacel kede Abiata; dokunu kede awobe wu are, Akimas wodi kede Jonasan wot ka Abiata.

²⁸ Neningo, ango abino ot bedo kakame jo ngolo kiye nam i yongayo kame oto i wi tim di ako daro kop kame wok kibutu.”

²⁹ Aso Sadoki kede Abiata oko tingo Sanduku me Isikan kidwoko Yerusalem, di gin kiko dong kuno.

³⁰ Do Daudi oko ot i wi moru me Olibeti di ekok; oudo etie kede tiene nono di eumo wie bala gianyuta me iturur. Jo dedede kame oudo tie kede da oko umo wi gi di kiko donyo koko di kitie yito malo i wi moru.

³¹ Kakame kowaco ne kede Daudi be Akitopel da oudo obedo ngat acel kame tie i iik ka Abisolom me reto apugan, Daudi oko lego be, “Okwe Rwot, akwai imi tam kame Akitopel mio bed tam me mingo.”

³² Kakame Daudi otuno kede i wi moru kabedo kame oudo jo woro kiye Rubanga, Kusai Ngaraki, oko bino pi riamo kede Daudi, di enyinyilo ekoti mere kede di ejuk kede lobo i wie.

³³ Daudi oko waco ne be, “Ka in iupere keda, ibino medo na peko,

³⁴ do ka idok i bomba di iko waco ne Abisolom be, ‘Okwe abaka, ango abino bedo ngatic ni bala kame oudo abedo tic ne kede papa ni i kare kokato,’ manono bino mini kare me bwono tam kame Akitopel mio Abisolom.

³⁵ Josaseredoti Sadoki kede Abiata bino bedo tie kedi kuno; in bed waco negi kop dedede kame in iwinyo ki paco ka abaka.

³⁶ Gin kitie kede awobe gi kuno, Akimas kede Jonasan, in itwero cwano gi buta kede kop moroni dedede kame in iwinyo.”

³⁷ Aso Kusai, ngawot Daudi, oko dok i bomba i kare kame Abisolom oudo tie donyo kede iye.