2 Samuel 13 - Baibuli I Leb Kumam 2013

Aminon kede Tamar

¹ Kikano, Abisolom wot ka Daudi bin tie kede amin mere acil, kame nyinge oudo Tamar; di Aminon wot ka Daudi da bobo oko lokere mite.

² Mit kame Aminon oudo tie kede i kom amin mere oko lolo tam mere kitek, omio en eko ngono kome be tuwo omake. En oudo eneno bala likame tie gikame en ekaruno timo ne Tamar pien Tamar oudo pwodi likame obuto kede icuo moro.

³ Do Aminon bin tie kede adieru mere kame nyinge oudo Yonadab, wot ka Simea omin me Daudi. Yonadab oudo obedo dano angeo ngolo rieko.

⁴ En eko waco ne Aminon be, “In ibedo wot ka abaka, pinyo komio buli ceng in ibedo itururo aturur? Nyo arac?” Aminon oko waco ne be, “Ango cunya maro Tamar, amin me omina Abisolom.”

⁵ Yonadab oko waco ne be, “But i apien ni, di iko cuko tuwo. Kame papa ni oko bino pi neni, wace be, ‘Ango akwai icwai amina Tamar ebin emia gimoro acami. Ango amito en ebin eko iiko cam ki kan di ango aneno, di en kikome eko toko nango cam eko mina.’ ”

⁶ Aso, Aminon oko buto di eko cuko be kome oudo lit. Kakame abaka oko bino kede pi nene, en eko waco ne abaka be, “Ango akwai icwai amina Tamar ebin di eko tedo na mugati mogo di ango aneno, di en kikome eko mina.”

⁷ Di do Daudi oko cwano kop paco but Tamar di ewaco ne be, “In oti i ot ka omini Aminon di iko iiko ne cam.”

⁸ Aso, Tamar oko ot i ot ka omin mere Aminon, kakame en oudo etie buto iye. En eko kwanyo alos kame konyalo di eko donyo nyongo, eko timo mugati di Aminon neno eko donyo tedo.

⁹ Di do eko toko eko tero ne i nyime, do Aminon oko dagi camo. Aminon oko waco be, “Cwai jo dedede dony ooko.” Di jo dedede oko donyo ooko.

¹⁰ Di do Aminon oko waco ne Tamar be, “Kel cam nono i agola kane, di in iko toko nango in kikomi.” Aso, Tamar oko kwanyo mugati kame oudo etedo, di eko tero i agola but omin mere Aminon.

¹¹ Do kakame en oudo etie mine kede, Aminon oko make, di eko waco ne be, “Amina, bia ibut keda!”

¹² Tamar oko waco ne be, “Omina, likame kamano, kur imaka tetek; pien gikame cal kamanono likame timere i Isirael; kur itim gikame rac rom kano!

¹³ Ango abino beno tuai kede lewic kame dwong rom kano? Akadi ida kikomi ibino bedo bala dano akony mere li i Isirael. Pi mano, nataman ango akwai iyam kede abaka; piento en likame ebino twoni ango.”

¹⁴ Do Aminon likame oko yei winyo kop mere; doko pi kite kame en oudo etek kede ebwone, Aminon oko make tetek di eko buto kede.

¹⁵ Di do cuny Aminon oko dage kitek; ateteni cunye oudo oko dage dag kame kalamo kite kame oudo kong emare kede i agege. Aminon oko waco ne be, “Dony ooko!”

¹⁶ Do en eko dwoko ne be, “Omina, likame kamano; pien riama tenge kamanoni rac kalamo gikame itieko timo na.” Do Aminon likame oko yei winyo kop mere.

¹⁷ Aminon oko lwongo ngatic mere di eko waco ne be, “Kwany dako noni tenge ki nyima, di iko ridakino ekeko.”

¹⁸ Ngatic nono oko tere ooko di eko ridakino ekeko. Tamar oudo tie ngapo egoe abor kame bade tie; manono en kame oudo obedo epone kame anyira ka abaka kapwodi likame ongeo cuo ngapere kede.

¹⁹ Tamar bin oko suto buru i wie, di eko nyinyilo egoe abor kame oudo etie ngapo; en eko yeno cinge i wie, eko ot tenge di ekok kitek.

²⁰ Omin mere Abisolom oko penye be, “Mam omini Aminon obuto kedi? Amina, ling do ber in; en ebedo omini; kur imak kop no i cunyi.” Aso, Tamar oko dong bedo i ot ka omin mere Abisolom en kene, di etie kede cwercuny atek.

²¹ Kakame Abaka Daudi oko winyo kede gikame Aminon oudo otimo ne Tamar, cunye oko wang twatwal, do en oudo likame eromo mino wode alola, pien oudo emare, piento en oudo ebedo atin kao mere.

²² Do Abisolom oudo likame oko waco kop moro i kom Aminon, arac amoto aber, pien cunye oudo oko dage pi kop kame emako kede amin mere Tamar tetek di eko buto kede.

Abisolom Onyango Amin mere

²³ Di mwakini are okato, Abisolom oudo oko tedo ebaga me nyaro yer me romini mege i Baal Kasor, kabedo kiyapiyapi kede Epuraimu, di en eko lwongo awobe ka abaka dedede.

²⁴ Abisolom oko ot but abaka di eko waco ne be, “Adwong, kotie nyaro yer me romini nango, mam koto in kede jotic ni ibino nywako keda ebaga?”

²⁵ Do abaka oko waco ne Abisolom be, “Woda, likame kamano, mito kur wan dedede ootunu pien cengemogo eko doko pek ni.” Abisolom oko tamo dine be eoti, do en likame eko yei ot do en eko mine pwoc mere.

²⁶ Di do Abisolom oko waco be, “Ka likame wun iyarunu ot, ango akwai iyei ne omina Aminon ot kede wa.” Abaka oko penye be, “Pinyo amio en poore eot kede wu?”

²⁷ Do Abisolom oko bedo dine kamanono paka en yei ne Aminon kede awobe ka abaka dedede ot i ebaga. Abisolom oko tedo ebaga kame poore ne abaka.

²⁸ Di Abisolom oko ciko jotic mege be, “Kiunu esawa kame Aminon geo mer kede, di do kame ango ako waco ne wu be, ‘Nekenu,’ di do wun ikounu neke. Kur ibedunu kede lworo moro, ango en kame aciko wu. Bedunu kede nwangcuny doko abongo lworo moro.”

²⁹ Aso, jotic ka Abisolom oko timo ne Aminon bala kame Abisolom oudo ociko negi. Di do awobe ka abaka icegun oko yai, di dano acelacel oko somo ingei asigira mere di eko ringo.

³⁰ Di gin oudo pwodi kitie i yongayo, kop oko tuno but Daudi be Abisolom oudo otieko neko awobe ka abaka dedede, doko likame oudo tie kodong akadi acel.

³¹ Abaka oko yai malo, eko nyinyilo igoen me kome pi cwercuny, di eko robere piny. Jotic mege kame oudo tie cungo kanono oko gida nyinyilo igoen me kom gi.

³² Do Yonadab wot ka Simea omin me Daudi oko waco be, “Adwong na, kur iter be kotieko neko awobe ni dedede; Aminon kenekene en oto. Abisolom oudo oiko nek noni cako i ceng kame Aminon obuto kede amin mere Tamar tetek.

³³ Pi mano, adwong na, kur iyei gamo kop kame waco be awobe ni dedede oto; Aminon kenekene en oto.”

³⁴ Do Abisolom oko ringo. Kakame sirikale kame oudo tie daro bomba oko tingo kede wange malo, en eko neno ekodet me jo di kitie wok ki nget moru di kilubo yongayo awok ki Koronaim.

³⁵ Yonadab oko waco ne abaka be, “Neni, awobe ni tie bino bala kame ango oudo awaco.”

³⁶ Kakame en etieko kede yamo atieka kaman, di awobe ka Daudi donyo, di kiko donyo koko; Daudi kede jotic mege da oko donyo koko kitek.

³⁷ Do Abisolom oko ringo, di eko ot but Talamai wot ka Amikud, abaka me Gesur. Daudi oko donyo koko wode Aminon buli ceng.

³⁸ Abisolom oko bedo Gesur tieko mwakini adek.

³⁹ Kakame cuny abaka oudo otieko do kwei kede ingei to ka Aminon, en eko donyo do paro neno wode Abisolom.