2 Samuel 11 - Baibuli I Leb Kumam 2013

Daudi kede Bateseba

¹ Kikano, di bin kare kame abakai singo ot kede i yi otuno, Daudi oko cwano Joab kede isirikalen mege adongo dongo karacel kede isirikalen dedede me Isirael. Gin bin kiko bwono jo Amon, di kiko lukaro bomba me Raba. Do Daudi bin oko dong Yerusalem.

² Ceng moro acel, otieno di ceng oudo oyapuno donyo, Daudi bin oko yai ki kawei mere di eko ot i wi ot mere me abaka. Kakame bin en etie cucungo kede i wi ot, en eko neno dako moro di tie bol. Dako nono oudo cil twatwal.

³ Daudi bin oko cwano dano moro pi pepenyo kop i kom dako nono, di oko niange be dako nono oudo obedo Bateseba, nyar ka Eliam; en oudo dako ka Uria dano me Kiti.

⁴ Di Daudi oko cwano jo pi ome, en eko bino bute, di Daudi oko buto kede. (Dako nono oudo tie lonyere ingei tuwo duwe mere.) Di do Bateseba oko dok i ode.

⁵ I cen mere Bateseba oko ngeno be en oudo etie kede yie, di eko cwano kop but Daudi pi waco ne.

⁶ Di do Daudi oko cwano kop but Joab be, “Cwai Uria dano me Kiti buta kan.” Di Joab oko cwano Uria but Daudi.

⁷ Kakame Uria oko tuno kede bute, Daudi oko penye ekite kame Joab kede isirikalen tie kede, kede da epone kame yi tie ot kede.

⁸ Di Daudi oko waco ne Uria be, “Oti i odi di iko ber udo wei moro.” Uria bin oko yai ki ot me abaka, di abaka oko cwano ne giamia olube kede.

⁹ Do Uria likame oko ot i ode; akaka ot paco en gire eko buto i erute me paco me abaka karacel kede isirikalen adaro abaka.

¹⁰ Kakame oko waco ne kede Daudi be Uria oudo likame oko ot paco, en eko penye be, “In pwodi idwogo adwoga ki sapali, pinyo bo komio likame iko ot i odi?”

¹¹ Uria oko dwoko ne Daudi be, “Jo me Isirael kede Yuda tie bedo i kimere, doko Sanduku me Isikan da tie but gi; ngadwong na Joab karacel kede jotic mege tie bedo obar i kimere; benyo benyo kame ango atwero ot kede i oda cam kede amata, kede buto kede dako na? Ango alairo be likame ango abino timo gikame cal kamano.”

¹² Di do Daudi oko waco ne Uria be, “Dong kan tin bobo, di diki ango ako bino cwani iko dok.” Di Uria oko dong Yerusalem cenge nono. I ceng alubo mere,

¹³ Daudi oko lwonge bute ot cam kede amata, di eko mine emer. Do Uria likame bobo oko ot ture iwor nono; akaka ot i ode, en eko bobo ot buto i gibuto mere kede isirikalen adaro abaka.

¹⁴ Odiko Daudi oko wandiko baluwa but Joab di eko cwano Uria kede.

¹⁵ En oudo ewandiko baluwa be, “Ket Uria anyim kakame yi tek iye, di wun ikounu dok cen, tetekeny iwekunu neke.”

¹⁶ Aso, di bin Joab oudo tie lukaro bomba, en eko cwano Uria kakame oudo en engeo be jokwor atek tie iye.

¹⁷ Isirikalen me bomba nono oko donyo oko di kiko yi kede Joab; di kiko neko jo mogo kikom jotel me isirikalen ka Daudi kiton Uria da.

¹⁸ Di do Joab oko cwano dano but Daudi pi ot tatamo ne kop kame mako yi nono;

¹⁹ en ewaco ne ngaor nono be, “Kame in itieko tatamo ne abaka kop dedede kame mako yi,

²⁰ di do ka cuny abaka oko wang di eko penyi be, ‘Pinyo komio wun ikounu ot yi kakame iyapiyapi kede bomba? Likame wun oudo ingeunu be gin kibino gweno wu ki wi apama?

²¹ Benyo, wun likame iyutununu epone kame bin koneko kede Abimelek wot ka Egidioni? Mam dako moro bin ouco nyar kidi ki wi apama di oko poto i kome oko neke i Tebes? Pinyo komio wun oudo ikounu noko apama twatwal?’ Ka en eko penyi kamano, in di do iko waco ne be, ‘Uria ngatic ni da kotieko neko.’ ”

²² Aso, ngaor nono oko ot di eko tuno but Daudi eko tatamo ne kop dedede kame Joab oudo ocwae be ewace.

²³ En ewaco ne Daudi be, “Jokwor wa oudo tek loo wa, di kiko wok ooko yi kede wa i elet; do wan oko riamo gi kiton tuno i erute gi.

²⁴ Di do gin kiko gwegweo imalia i kom wan ki wi apama; jo mogo kikom isirikalen nin, abaka, kotieko neko; doko Uria da ngat acel kikom jotel me isirikalen nin, kotieko neko.”

²⁵ Daudi oko waco ne ngaor nono be, “Oti iko waco ne Joab kur emi gi kotimere nono lol tam mere, pien likame tie ngat akaruno ngeno ngat kame bino to i yi; wace emeede suro bomba nono kitek di eko mane. Doko sup cunye.”

²⁶ Kakame dako ka Uria oko winyo kede be cware oudo oto, en eko koke.

²⁷ Kakame kare me koko oko tiek kede, Daudi oko cwano jo ome di oko kele i ot ka Daudi; en eko doko dako mere di eko nywalo ne atin awobi. Do cuny Rwot likame oko bedo yom kede gikame Daudi oudo otimo.