2 Samuel 10 - Baibuli I Leb Kumam 2013

Daudi Obwono Jo Amon kede Jo Siria

¹ Kikano di do oudo kare okakato, abaka me jo Amon oko to, di wode Kanun oko lunyo wange.

² Abaka Daudi oko waco be, “Abino bedo kede genere but Kanun wot ka Nakas, bala kame bin papa mere ogena kede.” Aso, Daudi bin oko ooro jo bute pi kweno cunye pi to ka papa mere. Kakame jo kame bin Daudi ooro oko tuno kede i lobo me jo Amon,

³ jotel me jo Amon oko waco ne Kanun rwot gi be, “Ateteni in iparo be Daudi tie mino papa ni wor be piento en etieko oro jo pi kelo ni kope me kweicuny? Mam Daudi otieko oro jo buti pi gin bino ngingico bomba pi mito mane?”

⁴ Manono oko mino Kanun oko mako jo kame oudo Daudi ooro, di eko lielo dul me yer me tik ngat acelacel, eko ngongolo pier igoen kame oudo kingapo di eko riamo gi tenge.

⁵ Kakame Daudi oko winyo kede kop noni, en eko cwano negi kop, pien cuo nogo oudo lewic omako twatwal. Abaka owaco negi be, “Kong dongunu Jeriko tuno di yer me tik wu otieko dongo, en amio ikounu do dwogo.”

⁶ Kakame jo Amon oko neno kede be oudo kitieko doko jokwor ka Daudi, gin kiko cwano jo oko ot pango jo Siria kame oudo bedo Beterekob kede Soba, isirikalen tutumia ot are (20,000) kame oto kede tien, abaka me Maka kede jo mege tutumia acel (1,000), kede cuo me Tob tutumia tomon kiwie are (12,000).

⁷ Kakame Daudi oko winyo kede kop noni, en eko cwano Joab kede isirikalen karacel kede jo yi apat pi ot yi kede gi.

⁸ Jo Amon di oko donyo oko me bomba di kiko teere i erute pi yi; do jo Siria kame bin bedo Soba kede Rekob, karacel kede jo me Tob kede Maka, oudo tie ken gi i ebar.

⁹ Kakame Joab oko neno kede be jokwor oudo tie i nyime kede i ngee, en eko yero isirikalen mogo abeco kikom isirikalen me Isirael, di eko keto gi kiteere pi yi kede jo me Siria;

¹⁰ isirikalen odong mege en eko mino Abisai omin mere telo gi, di Abisai oko mino gi kiteere pi yi kede jo Amon.

¹¹ En ewaco ne omin mere be, “Ka ineno be jo Siria tie bwona, bia ikonya; do ka jo Amon teko gi tie mito bwoni, ango abino ringini konyi.

¹² Bed tek, doko mito obed kede nwangcuny pir jo wa, kede pir bomban ka Rubanga wa. Ango akwao Rwot pi timo gikame en eneno be ber ne.”

¹³ Di Joab kede jo mege oko ot pi cako yi kede jo me Siria, di jo me Siria oko ringo tenge.

¹⁴ Kakame jo Amon oko neno kede be jo Siria oringo, gida kiko ringo ki nyim Abisai di kiko dok i bomba. Di do Joab otieko yi kede jo Amon, en eko dok cen Yerusalem.

¹⁵ Do kakame jo Siria oko neno kede be jo me Isirael oudo obwono gi, gin kiko coko isirikalen gi dedede karacel.

¹⁶ Abaka Kadadese oko cwano jo di kiko kelo jo Siria kame oudo bedo loka tetuca me ecilet me Eupurate. Gin bin kiko bino Kelam di Sobak ngatel me isirikalen ka Kadadese en kame telo gi.

¹⁷ Kakame Daudi oko winyo kede kop nono, en eko coko isirikalen dedede me Isirael karacel, di kiko ngolo ecilet me Yorodan, di kiko ot Kelam. Jo me Siria oko teere di kiko yi kede Daudi.

¹⁸ Jo me Siria oko ringo tenge ki nyim jo me Isirael. Di Daudi oko neko jo Siria tol kanyaare (700) kame bin riamo cabalan kede jo tutumia ot ongwon (40,000) kame bin ringo kede asigiran, doko kiko wano Sobak ngat koudo obedo ngatel me isirikalen di en eko to kanono.

¹⁹ Kakame abakai dedede kame bin tio ne Kadadese oko do neno kede be jo me Isirael oudo otieko bwono gi, gin do kiko kwano gi pi weko gin kibed kede mulem, di kiko doko jo kame tio negi. Di do jo Siria oko lworo konyo jo Amon atwal.