2 Samuel 1 - Baibuli I Leb Kumam 2013

Daudi Owinyo Kop me To ka Saulo

¹ Di do Saulo oudo otieko to, Daudi bin oko dwogo ki yi kame en oudo ebwono kiye jo Amalek di eko dong bedo Sikilag pi ceng are.

² I ceng me adek mere, icuo moro kowok kibut isirikalen ka Saulo oko bino di enyinyilo igoen me kome doko di emio apua omako wie pi nyuto cwercunye. Kakame eko tuno kede but Daudi, en eko riebere piny i nyime pi mine wor.

³ Daudi oko penye be, “In iwok ki tuai?” En eko waco ne be, “Ango awok kibut isirikalen me Isirael. Kuo na obwot abwota.”

⁴ Daudi oko waco ne be, “Tatamo na, yi oko bedo benyo?” En eko dwoko ne be, “Isirikalen oko ringo ki yi, doko da koneko isirikalen atot. Koneko Saulo kede wode Jonasan da.”

⁵ Di do Daudi oko penyo awobi nono kame bin okelo ne rwonge be, “In iko ngeno benyo be Saulo kede wode Jonasan oto?”

⁶ Awobi nono oko waco ne be, “Ango oudo atie i wi moru me Gilboa, ako neno Saulo di egongere i kom tong mere, di cabalan kede jo aringo kede gi oudo tie noke.

⁷ Kakame en eko ngoloro kede cen ngee, en eko nena di eko lwonga. Ango ako gamo be, ‘Ango ine, adwong.’

⁸ En eko penya be, ‘In ngai?’ Ango ako waco ne be, ‘Ango abedo dano me Amalek.’

⁹ Di do en eko waco na be, ‘Bia kan di iko dopa; pien atie i lito atek do di cunya pwodi likame mito cot.’

¹⁰ Aso, ango di ako ot bute di ako dope, pien ango oudo angeo be en likame bobo oudo ekaruno yai bedo kuo ingei en poto piny. Ango ako kwanyo ocoro mere me ajakanut kame oudo tie i wie kede eriko kame oudo engapo i bade, di ako kelo gi kan buti adwong na.”

¹¹ Di do Daudi oko nyinyilo igoen me kome pi cwercuny; di jo dedede kame bin tie kede da oko timo kamanono.

¹² Gin kiko tururo di kiko koko, doko kiko kanyo kec tuno otieno pi Saulo kede wode Jonasan, kede pi isirikalen ka Rwot kede pi jo me Isirael, pien oudo koneko gi i yi.

¹³ Daudi di oko penyo awobi kame bin okelo ne rwonge nono be, “Turu tie tuai?” En eko dwoko be, “Ango abedo wot ka dano me Amalek, kame obedo ngakumbor i piny wu.”

¹⁴ Daudi oko penye be, “Pinyo bo komio in likame iko bedo lwor tingo cingi pi neko dano ka Rwot kame ewiro.”

¹⁵ Di do Daudi oko lwongo ngat acel kikom isirikalen mege di eko waco ne be, “Neke!” En eko cobe paka to.

¹⁶ Daudi oko waco ne dano me Amalek nono be, “Remo ni dong i wii; pien kop me dogi en kongolo ni kop di iwaco be, ‘Ango aneko dano ka Rwot kame ewiro.’ ”

Daudi Okoko Saulo kede Jonasan

¹⁷ Daudi bin oko wero wer me koko pi Saulo kede wode Jonasan.

¹⁸ En eko mino cik be pwony jo me Yuda Wer me Emal noni. (Kowandiko wer noni i itabu ka Yasar.) Wer nono eoto kaman:

¹⁹ Okwe Isirael, kotieko neko jo ni me aura kitie buto i wi mori! Jo atek yi otieko to!

²⁰ Miero kur itatamo kop noni i Gat, arabo i gudi me bomba me Asikelon. Aso, ka likame kamano, anyira me jo Pilistia bino kilel, anyira me jo kalikame kokepo bino bedo kede yomcuny.

²¹ Wun mori me Gilboa, miero kur toyo arabo kot moro bed tie i wi wu, akadi poti amio kame ceko cam. Pien kunono en kame komio ebuku me jo atek yi opoto iye piny kede lewic, ebuku ka Saulo likame bobo kobino suto kede mo.

²² Emal ka Jonasan oudo ger twatwal, epima ka Saulo oudo likame dok nono, oudo likame kidok abongo remo i kom gi, arabo abongo mo me kom jo atek yi.

²³ Saulo kede Jonasan, jo oudo maro gi doko oudo kiyomo cuny jo! I kare me kuo kede i kare me to gin likame kipokere; gin oudo kom gi mit kalamo ekokom, oudo kitek kalamo inguon.

²⁴ Okwe wun mon me Isirael, kokunu Saulo, ngat kame oudo omio wu ingapunu igoen acil di kwar, ngat komio wu mwole me saabu me angapa.

²⁵ Jo atek yi otieko totoun, koneko gi i yi! Jonasan otieko to etie buto i wi mori wu.

²⁶ Omina Jonasan, ango atururo piri; oudo ango amari twatwal; kite kame oudo in imara kede obedo me aura, ekalamo amara kame mon maro kede cuog gi.

²⁷ Jo atek yi otieko to, doko jamini gi me yi da kony gi otieko doko li!