2 Jotesalonika 2 - Baibuli I Leb Kumam 2013

Ngarac

¹ I kom kop kame mako dwogo ka Rwot wa Yesu Kirisito kede cokere wa karacel bute, wan obako dog wa butu, imiegu kede amiegu,

² kur imiunu tam wu totolun arabo igeunu bedo kede lworo pi kop kame jo waco. Gin cengemogo kiwaco be kiwinyo kop nono kibut Tipo Kacil, kibut ngatamoro, arabo be kisome ki baluwa moro kame kotero be wan en kowandiko, kame waco be Ceng me dwogo ka Rwot otieko tuno.

³ Kur ngatamoro ngalu iepone moroni; pien Ceng nono likame bino tuno, tuno kede kame jo ojemo ne Rubanga, di Ngarac ko neeno, ngat kame kotieko iiko ne pi rwenyo atwal.

⁴ En ebino piem kede gi dedede kame kotero be rubanga arabo gimoro dedede kame koworo, tetekeny en eko bino bedo i tempulo ka Rubanga, di eko waco be en ebedo Rubanga.

⁵ Mam iyutununu be bin awaco ne wu kope nogi di oudo pwodi atie kede wu?

⁶ Doko da wun ingeunu gikame nan tie genge, tetekeny ebin eneeno kame kare mere oromo.

⁷ Pien gikomungere ka Ngarac nan do tie tic, do ngat kame nan genge oyaro meede kede genge tuno i kare kame kobino kwanyo kede ngat nono,

⁸ di do oko bino nyuto Ngarac. Do ka Rwot Yesu obino, en ebino neke kede wei kame wok ki doge, di eko tieke kede nyutere me bino mere.

⁹ Bino me Ngarac bino nyutere i tice ka Sitani, ngat kame bino tic kede epone me twer dedede, kede gianena kede gi me isuur me angalo.

¹⁰ Doko ebino tic kede angalo arac but jo kame tie rwenyo atwal, pien gin kidagi maro kop me ateni kame oudo koto lako gi.

¹¹ Pi mano, Rubanga bino cwano ne gi twer kame bilaro gi di ko mino gi kiyei kop me abe,

¹² me wek ngol kop loi jo dedede kalikame oyei kop me ateni, do di cuny gi oko bedo yom i gikarac.

Koyero Wu pi Udo Alako

¹³ Imiegu kede amiegu na kame Rwot maro, wan miero opwoi Rubanga nakanaka piru, pien Rubanga oyero wu cako i agege pi bedo jo kolakere pi lonyere kame Tipo Kacil mio wu, kede pi bedo kede yei i kom kop me ateni.

¹⁴ En elwongo wu i ejiri kame wan otuco pi kop noni, tetekeny iudunu deyo ka Rwot wa Yesu Kirisito.

¹⁵ Pi mano, imiegu kede amiegu na, cungunu di itekunu, ikounu rikito kope kame wan opwonyo wu, arabo kede dog wa amoto kede baluwa.

¹⁶ Wek Rwot wa Yesu Kirisito kikome, kede Rubanga Papa wa, ngat kame omaro wa di eko mino wa kweicuny kame bedo nakanaka kede gen aber pi kisa mere,

¹⁷ ekwei cunyu di eko mino wu idokunu tek i tice kede i kope dedede kame beco.