2 Jotesalonika 1 - Baibuli I Leb Kumam 2013

Amot

¹ Baluwa kowok kibut Paulo, Sila kede Temeseo. But ekodet me jokirisito i Tesalonika, jo kame tie i Rubanga Papa wa kede i Rwot Yesu Kirisito.

² Kisa kede mulem kame wok kibut Rubanga Papa kede Rwot Yesu Kirisito bed butu.

Ngolo Kop i Ceng me Dwogo ka Kirisito

³ Imiegu kede amiegu na, wan miero opwoi Rubanga nakanaka piru bala kame poore, pien yei wu tie dongo, doko amara kame ngat acelacel kibutu tie kede pi jo icegun da tie meede.

⁴ Pi mano, wan ikom wa owakere piru i dier ikodeta me jo koyei Rubanga, pi kite kame icungunu kede kitek, kede pi bedo kede yei i kare me itidil wu dedede, kede pi can dedede kame nan itienu kanyakino.

⁵ Man nyuto be Rubanga ngolo kop i yore me ateni, me wek mi wu idokunu jo kame poore pi Ajakanut mere, kame nataman itienu neno can pire.

⁶ Pien kibut Rubanga, etie gikame opoore pi culo jo kame mio wu neno can kede mino gida can,

⁷ kede pi mino wu wei karacel kede wan, wun jo kame nan kotie mino wu neno can. En ebino timo man i kare kame Rwot Yesu bino neeno kede di ewok ki malo karacel kede imalaikan mege wegi twer.

⁸ En ebino bino di etie i dier mac kame liel, di eko bino culo kwor i kom jo kalikame ngeo Rubanga kede jo kame dagi lubo ejiri ka Rwot wa Yesu.

⁹ Gin kibino neno can me alola me to me nakanaka, di koriamo gi tenge ki nyim Rwot kede ki deyo me twer mere.

¹⁰ Man bino timere i Ceng kame en ebino bino kede pi jo mege mine deyo, kede pi jo dedede kame yei en ure i Ceng nono; pien wun iyeunu ijura kame bin wan omio.

¹¹ Manono en komio wan olego ne wu nakanaka, be wek Rubanga wa kede twer mere, emi wu ibedunu jo kame poore pi lwongo mere, di en eko cobo mit wu dedede me tic aber kede da gikame i timunu pi yei wu.

¹² Mano bino mino nying Rwot wa Yesu Kirisito udo deyo kibutu, di wuda ikounu udo deyo kibute, di lubere kede kisa ka Rubanga wa kede me ka Rwot Yesu Kirisito.