2 Jokorinti 9 - Baibuli I Leb Kumam 2013

Mino Kony but Jokirisito Wad wa

¹ Aso kony li nango me wandiko ne wu kop kame mako konyo jokacil.

² Pien ango angeo mit wu me mino kony, gikame ango awakere iye ne jo me Makedonia, di awaco ne gi be jo me Akaya otieko iikere cako mwaka okato; doko mit wu me mino kony osupo cuny jo atot kikom gi.

³ Aso ango atie cwano imiegu nogi, me wek kur wakere wa piru i kop noni lokere dok gi me nono, tetekeny ibedunu jo koikere bala kame oudo atieko waco.

⁴ Aso, ka do jo mogo me Makedonia oko upere keda di kiko udo be, wun likame itiekunu iikere, lewic bino mako wa pi geno wu kitek, di ber aweko lewic kame bino mako wuda.

⁵ En omio ango atamo be miero akwai cuny imiegu nogi pi cako bino butu di pwodi likame ango abino, di gin kiko iiko cuto kony kame wun icikerenu pi kwanyo, tetekeny ebed gikame tie cuto bala kony kame ikwanyunu i mit wu, do weko i adiadia.

⁶ Gikame ango atie yamo en ine be, ngat kame cuo kodi anonok bino da kano kac anonok, kede ngat kame cuo atot bino da kano kac atot.

⁷ Ngat acelacel miero kwany mic bala kame cunye mito, abongo gung arabo adiadia, pien Rubanga maro ngat kame mio kede yomcuny.

⁸ Doko Rubanga twero pi mino wu winyo me gi dedede di tot, tetekeny ibedunu tie kede gi dedede kame romo wu nakanaka, di ikounu mino atot da pi konyo tice dedede kabeco.

⁹ Bala kame kowandiko be, “En emio kede cunye lung but jocan; bero mere bedo nakanaka.”

¹⁰ Rubanga ngat kame mio ngacuc kodi kede mugati me acama, bino mino wu kodi me acua di en eko mino gi kinyai, di eko medo ne wu gikame yai ki bero wu.

¹¹ En ebino mino wu ibarunu i yote dedede di ikounu bedo jo kame mio gikame tot kede cunyu lung, tetekeny ka wan otero gi, jo bino pwono Rubanga.

¹² Pien tic noni, likame bino cobo gikame mitere ne jokacil kenekene, do da ebino kelo pwoc atot but Rubanga.

¹³ Tic me mino kony noni bino mino jo atot mio deyo but Rubanga pi kite kame wun ilubunu kede ejiri ka Kirisito kame wun itucunu, kede pi kony kame wun imiunu kede cunyu lung pi nywako kede gi kede jo apat da.

¹⁴ Aso gin kibino kwano Rubanga piru di cuny gi paro piru pi kisa adwong kame Rubanga omio wu.

¹⁵ Pwoc bed but Rubanga pi giamia mere, giamia kame bero mere likame wacere!