2 Jokorinti 8 - Baibuli I Leb Kumam 2013

Mino Kony bala Jokirisito

¹ Imiegu kede amiegu na, wan omito be ingeunu kop i kom kisa ka Rubanga kame enyuto ne ikodeta me jokirisito i Makedonia.

² Gin kibeo i atama atek me peko; do kilel gi oudo dwong twatwal, omio kiko mino kony kede cuny gi lung, bed bala oudo gin kibedo jocan.

³ Ango amio ijura be gin kimio kony i mit gi ken gi di lubere kede ud gi, kede kalamo ud gi da.

⁴ Oudo gin kingangao wa be otim ber omi gi winyo me nywako tic me konyo jokacil.

⁵ Kitimo kaman kalamo kite kame wan oudo ogeno kede. Me agege, gin kong kijalere ken gi but Rwot, di do i mit ka Rubanga, kiko jalere but wada.

⁶ Aso wan otieko kwano cuny Tito be, bala kame en oudo etieko cako kede tic noni, poore do etiek tic aber noni i diere wu.

⁷ Nan do bala kite kame itienu kede timo kiber i gigi dedede: i yei, i yamo, i ngec, i keto cunyu i gi dedede, kede i amara wu pirwa, nenunu be itimunu kiber i tic kame nyuto amara noni da.

⁸ Ango likame atie yamo kop noni bala cik, do ango anyuto ne wu epone kame jo apat keto kede cuny gi, tetekeny angei ateni me amara wu.

⁹ Pien wun ingeunu kisa ka Rwot wa Yesu Kirisito; bed bala oudo en ebaro, do en eko doko ngacan piru, tetekeny pi can mere wun idokunu jo kobaro.

¹⁰ Ango amio tam na i kom kop noni be, eber ne wun nan cobo gikame oudo igeunu timo mwaka acel cen, likame pi time kenekene, do da pi bedo kede mit iye.

¹¹ Nan do tiekunu time. Wekunu mit wu me cobe bed rom aroma kede mit kame icakenu kede, doko timenu di lubere kede gikame itienu kede.

¹² Ka mit me mino tie, Rubanga gamo giamia, di lubere kede gikame dano tie kede, do weko gikame eli kede.

¹³ Ango likame atie yamo be miero peko do dii wun pi mino jo icegun alakanar. Ango amito be gi dedede bed rorom.

¹⁴ Kite kame nataman jame tot ne wun kede, ipoorenu mino gi gikame mitere ne gi, tetekeny i kare moro ka gida kitie kede jame atot, kibino mino wuda gikame mitere ne wu. Manoni bino mino ibedunu rorom.

¹⁵ Bala kame kowandiko be, “Ngat kame oudo tie kede atot, likame oko bedo kede atot kalamo, doko ngat kame oudo anonok, likame oko bedo kede anonok kalamo.”

Tito kede Joaupa mege

¹⁶ Wan opwoyo Rubanga pi keto i cuny Tito epone me mit acel nono me paro piru bala kame ango da atie kede.

¹⁷ Pien likame eyei kwac wa kenekene, do pi kite kame cunye mito kede kitek, en eyaro bino butu i mit mere kene.

¹⁸ Wan otie cwane karacel kede omin wa kame ngere i ikodeta dedede me jokirisito pi tic mere me tuco ejiri.

¹⁹ Doko likame mano kenekene, do ikodeta me jokirisito oyere pi upere kede wa i tic kame nyuto amara kame wan otie timo noni, pi mino deyo but Rwot kede pi nyuto mit aber kame wan otie kede.

²⁰ Wan likame omito be ngatamoro yam ne wa raco i kom twon giamia kame jo omio, kame wan nataman otie poko.

²¹ Pien wan otie kede tam me timo gi kopoore, likame i nyim Rwot kenekene, do i nyim jo da.

²² Aso, wan otie cwano omin wa ace kede gin, omin wa kame wan otieko tamo tien atot di oko udo be en etie kede mit me timo tice atot. En nataman etie kede mit akalamo me timo tic, piento en egeno wu kitek.

²³ Aso, i kom kop kame mako Tito, en ebedo ngawota kame otio kede karacel pi konyo wu; aso i kom kop kame mako imiegu wa icegun, gin kibedo jo kame ikodeta me jokirisito ooro, jo kame kelo ne Kirisito deyo.

²⁴ Pi mano, nyutunu ne jo nogi, i nyim ikodeta me jokirisito, amara wu kede gi komio wan owakere piru.