2 Jokorinti 13 - Baibuli I Leb Kumam 2013

Ikwenyar me Ajikini

¹ Man en tien me adek kame ango atie bino kede butu. “Pido moroni miero ijurak are arabo adek en kame poore gango.”

² Ango oudo akwenyaro jo kame ngoce odubo, kede da jo dedede apat, doko nan akwenyaro gi di likame atie kede gi, bala kame oudo atimo di atie kede gi i kare kame oudo awelao gi kede tien me are, be, ka ango abino bobo, likame abino weko gi abongo alola,

³ pien wun imitunu gikame nyuto be Kirisito tie yamo kibuta. Likame en egoro kame etie tic kede wu, do en etie kede twer i diere wu.

⁴ Pien riki pi goro mere omio kogure i kom musalaba, do nataman ekuo pi twer ka Rubanga. Wan ogoro i Kirisito, do i tic kede wu wan obino kuo karacel kede en pi twer ka Rubanga.

⁵ Ngingicunu kuo wu kenu, di ikounu neno ka pwodi itienu i yei wu. Benyo, likame iromunu niang be Yesu Kirisito tie i kuo wu? Kwanyo do ka amoto ipotunu!

⁶ Ango ageno be ibinunu udo be, wan likame opoto.

⁷ Do wan okwao Rubanga be wun kur itimunu gimoro arac, likame pi nyuto be wan en kame do otieko timo kiber, do pi wek wun iromunu timo gikame opoore, bed bala eneeno bala wan otieko poto.

⁸ Pien wan likame otwero timo gimoro kalikame upere kede ateni, do kenekene wan otimo gikame upere kede ateni.

⁹ Wan olelo kame wan ogoro do di wun itekunu. Gikame wan okwao Rubanga en ine be, wek idokunu jo kame beco.

¹⁰ Ango awandiko ne wu kop noni di atie tenge, tetekeny kame abino, kur abed ger kede wu kame atie tic kede akarunikin kame Rwot otieko mina, pi gero yei wu do likame pi rete.

Amot

¹¹ Di do ajiko, imiegu kede amiegu na, asounu do; iikunu ekite wu, lubunu gikame akwao wu pi timo, winyerenu, bedunu kede mulem, di Rubanga me amara kede me mulem ko bino bedo kede wu.

¹² Moterenu kenu kenu kede amot kacil me notere.

¹³ Jokacil dedede moto wu.

¹⁴ Kisa ka Rwot Yesu Kirisito, amara ka Rubanga kede nywak me Tipo Kacil bed kede wu dedede.