2 Jokorinti 11 - Baibuli I Leb Kumam 2013

Paulo kede Joor me Angalo

¹ Oudo amito be koto ikanyakinunu mingo na moro anonok. Okwe kanyakinunu kamanono keda!

² Ango atie kede nyeko ka Rubanga piru, pien ango anero wu pi nyomere kede Kirisito, pi mino wu bute bala kame komio kede ateran kalikame pwodi ngeo icuo but cware acel kenekene.

³ Do ango atie kede lworo be, bala kame twol riki ongalo kede Keba kede rieko mere, wuda kobino pacaro tam wu tenge di ikounu weko keto cunyu i maro Kirisito i ateni.

⁴ Pien ka ngatamoro obino di eko donyo pwonyo kop i kom Yesu ace kame pat kede kame wan otieko tatamo kop i kome, arabo ka igamunu tipo apat kede Tipo kame itiekunu gamo, amoto ka igamunu ejiri apat kede kame itiekunu gamo, dwong mere be udo wun iyeunu gin dedede cucuto.

⁵ Ango atamo be likame ango abedo ngat kocoko dud jo kame kolwongo be joor adongo nogi.

⁶ Akadi bed bala ango ali kede diru me yamo kiber, do ango atie kede ngec; wan otieko nyuto ne wu manoni i yore dedede kede i gi dedede.

⁷ Ango bin amwolere tetekeny koting wu malo, pien ango likame amio wu ikwanyunu gimoro pi ejiri ka Rubanga kame kotuco ne wu. Benyo, mam adubo pi timo kamanono?

⁸ Ecal do bala oudo ango ayako ikodeta ace me jokirisito pi kite kame agamo kede kony kibut gi tetekeny atim tic i diere wu.

⁹ Doko i kare kame oudo atie kede wu, di oudo tie jame kame mitere na, likame ako mino ngatamoro yeno peko na, pien imiegu kame bin owok ki Makedonia en kame omia gikame oudo mitere na. Aso, ango ako wutakino, doko abino meede wutakino pi weko mino wu yeno peko na i yore dedede.

¹⁰ Bala kame ateni ka Kirisito tie kede i cunya, likame kobino gengo ewaka na noni i adulion me Akaya.

¹¹ Pinyo? Iparunu be pien likame ango amaro wu? Rubanga ngeo be ango amaro wu.

¹² Do gikame ango nataman atie timo, abino meede timo, tetekeny kur ami kare but jo kame mito udo winyo me jo neno gida bala kirom aroma kede wan i gikame kiwakere iye.

¹³ Akodi jo nogo obedo joor me angalo, jotic kame tie kede angalo, di kiumere pi doko cal bala joor ka Kirisito.

¹⁴ Kur ngatamoro uri, pien akadi Sitani da umere pi doko cal bala malaika me lero.

¹⁵ Aso, likame etie gikame nyen ka jotic mege da oumere pi doko cal bala jotic me gi kopoore. I ajikini, gin kibino udo gikame poore kede tic kame kitimo.

Can kame Paulo Oneno bala Ngaor

¹⁶ Ango bobo amedo yamo be, kur ngatamoro tam be ango aming; do akadi di itamunu kamanono da, gamanu do kong bala ngamingo, tetekeny ada awakere atitidi moro.

¹⁷ Gikame ango atie yamo kame makere kede wakere abongo lworo noni, likame atie yamo i akarunikin ka Rwot, do atie yamo bala ngamingo.

¹⁸ Do bala kame jo atot wakere kede pi jame me kom, ango da abino wakere.

¹⁹ Pien bala kame wun iriekunu kede, omio wun ikanyakinunu kede yomcuny bedo kede jomingo!

²⁰ Wun ikanyakinunu ka dano moro oloko wu idokunu ipasoi, arabo ecamo jame wu, arabo etingere ne wu, arabo etero wu ter me anywar.

²¹ Lewic maka waco be wan oudo ogoro twatwal pi timo ginogo! Do ka tie gimoro kame ngatamoro wange tek pi wakere iye, ango atie yamo bala ngamingo, ango da wanga tek wakere pi gi nono.

²² Mam gin Iburanian? Ango da abedo kamanono. Mam gin jo me Isirael? Ango da abedo kamanono. Mam gin kibedo ikwae ka Aburaam? Ango da abedo akwar Aburaam.

²³ Mam gin jotic ka Kirisito? Ango atie yamo bala ngat opoi, ango ngatic aber kalamo gin! Ango atio kitek kalamo gin, kotwea i otkol tien atot kalamo, kobunga tien kalikame marere, doko abuco to tien atot.

²⁴ Iyudayan obedo dana ibelai ot adek kiwie kanyangon tien kany.

²⁵ Kobunga tien adek kede ebela. Kodidipo ango kede ingaroi tien acel. Imerin apapat adek obedo tuturun di ango oudo atie ot kede gi; tien acel koma oudo tie i yi pii me nam iwor kede iceng.

²⁶ Tien atot di atie ot, abeo i peko kame oyai ki icileta, i peko me joyak, kede i peko kame owok kibut jo na kikokome, peko kame owok kibut jo kalikame Iyudayan, peko i bomba, peko i tim, peko i nam adwong, kede peko kame owok kibut imiegu kede amiegu me angalo.

²⁷ Atio kitek kede abeo i kuo atek; iwor atot oudo likame anino, kec kede orio oneka, i kare atot abedo li kede giacama, i kare atot akanyo koyo di ali kede giangapa.

²⁸ Doko, di ber aweko gi ace, ceng dedede par pi ikodeta dedede me jokirisito dia.

²⁹ Ngai kame bedo tie kede goro, di likame ango ako bedo kede goro? Ngai kame komio poto i dub, di ango cunya likame ko wang?

³⁰ Ka miero ango awakere, abino wakere pi gikame nyuto goro na.

³¹ Rubanga Papa ka Rwot Yesu, en ngat kame kopako nyinge nakanaka, ngeo be ango likame atie ngalo.

³² Kakame oudo atie kede Damasiko, ngapug kame oudo tie i dud loc me Abaka Aretas oko mino isirikalen daro bomba me Damasiko pi mito maka.

³³ Do oko yololo ango piny beno ki dirisa kede ebukit, di ako bwot ki cinge.