2 Jokorinti 10 - Baibuli I Leb Kumam 2013

Paulo Omio Pido kame Jurao Tic mere

¹ Ango kikoma Paulo, angangao wu kede mwolo kede bero ka Kirisito, ango ngat kame jo waco be amwol kame atie karacel kede wu, do ager kede wu kame atie tenge.

² Ango akwao wu be, kame abino butu kur imianu abed kede gero bala kame aromo nyuto kede but jo mogo kame paro be wan olubo ekite me kom.

³ Pien bed bala wan otie i piny, do likame otie i yi me kom.

⁴ Jame me yi wa likame me piny kan, do kitie kede twer ka Rubanga pi tuturo kateko me ngakwor. Wan otuturo piem me abe,

⁵ kede tingere dedede kame gengo jo ngeno Rubanga, di oko mako tam dedede bala mabus, oko mino gi kilubo mit ka Kirisito.

⁶ Kame wun itiekunu do doko jo kame wor atwal, wan do oko bino mino jo kalikame wor alola.

⁷ Nenunu gikame tie kakaler. Ka ngatamoro geno be en me ka Kirisito, mito eyutuno be, bala kame en ebedo kede me ka Kirisito, kamanono wada otie me ka Kirisito.

⁸ Pien akadi di ango atie kede ewaka adwong pi akarunikin kame Rwot omio wa, pi gero yei wu do likame pi rete, ango lewic likame bino maka iye.

⁹ Ango likame amito be eneeno bala amoto ango atie mito mino wu lworo kede baluwan na.

¹⁰ Pien gin kiyamo be, “Baluwan mege tek di gwai, do kame en etie kede wa, en egoro, doko yamo mere da kony mere li.”

¹¹ Wek akodi jo nogo niang be, gikame wan owandiko i baluwan di otie tenge, ginogo da en kame obino timo kame otie kede wu.

¹² Likame pien wan otamo ketere i ruom acel arabo porere kede jo mogo kame pwore ken gi. Do ka gin kiyerere i ikodeta ken gi ken gi, kede di kiporere ken gi ken gi, udo kili kede niang.

¹³ Wan likame obino wakere pi gikame tie ooko me tic kame komio wa, do obino mino ewaka wa jik i kom tic kame Rubanga omio wa, manoni ribo kiton tic wa i diere wu.

¹⁴ Wan likame otie kede ewaka kame kalamo, bala kame oudo koto otie kede ka oudo likame otuno butu; wan en kame bin ogeo tuno butu kede ejiri ka Kirisito.

¹⁵ Wan likame owakere kato kare pi tic me jo icegun; do gen wan tie be, kame yei wu meede, tic wan i diere wu da bino nyai kitek.

¹⁶ En kame mio di do wan oko karuno tuco ejiri i adulion ace apat, abongo wakere pi tic kame ngatamoro otieko timo i kabedo kame etio iye.

¹⁷ Do, “Wek ngat kame wakere, ewakere pi Rwot.”

¹⁸ Pien likame jo kame pwore ken gi en kame kopwoyo, do jo kame udo pwoc me ateni en jo kame Rwot pwoyo.