2 Iyutun 9 - Baibuli I Leb Kumam 2013

Ot Weno ka Abaka Adako me Seba

¹ Kakame abaka adako me Seba owinyo kede iruo me nying Sulumani, en eko bino bute Yerusalem pi tame kede peny mogo atek. En bin eko bino kede twon ekodet me jo kame bin gwoke, karacel kede aguraguran kame yeo jamini angwe kur, saabu kede kide me wel. Kakame en bin eko tuno kede but Sulumani, en eko pepenyo en peny dedede kame oudo tie i tam mere.

² Sulumani bin oko dwoko peny mege dedede; likame bin tie peny moro akadi acel kame dwoko oko bwono abaka.

³ Kakame abaka adako me Seba bin oneno kede rieko ka Sulumani dedede, ot kame bin egero,

⁴ cam kame oudo otoko i wi emesa mere, kite kame jodongo me apugan mere oudo bedo kede, kite kame jotic mege gwoke kede, igoen kame gin bin kingapo, jotic kame oudo gwoke di etie camo ebaga, kede giayala awanga kame bin en emio i ot ka Rwot, manono oko mino wie ocungo.

⁵ En eko waco ne abaka be, “Kop kame oudo ango awinyo i komi i lobo na, kop i kom rieko ni kede jamini kame in itieko timo, obedo kop me ateni.

⁶ Do ango oudo likame ako yei kede kop nono tuno ango bino kan di ako neno kede wanga. Kop kame oudo owaco nango likame kong romo akadi dul me rieko nin da; rieko kede lonyo nin kalamo gikame oudo kotatamo nango.

⁷ Jo ni tin tie kede winyo benyo! Jotic ni tin tie kede winyo benyo, gin jo kame kitio buti nakanaka di kiwinyo kope ni me rieko!

⁸ Pak bed but Rwot Rubanga ni, en ngat kame cunye obedo yom i komi di eko keti ibedo abaka me Isirael! Pien Rwot otieko maro jo me Isirael atwal, en etieko mini ibedo abaka pi timo gi me ateni kede kopoore.”

⁹ Di do en eko mino abaka saabu kame kalamo kilo tutumia ongwon (4,000), twon jamini angwe kur, kede kide me wel; likame bobo tie kare moro kame bin otero ne kede abaka Sulumani jamini angwe kur kame koromo poro kede kame abaka adako me Seba omie.

¹⁰ Medo i wi manono, imerin ka Kiram kame bin yeo saabu kikelo ki Opir, bin oko kelo da ibaon me yat alemug kede kide me wel.

¹¹ Sulumani bin oko tic kede ibaon nogo me timo kayito me ot ka Rwot kede me ot ka abaka, kede da me timo adungun kede arigirigin ne jogoi were; likame bobo ibaon me yat alemug kame cal kede magonogo oko neeno i Yuda tuno tin.

¹² Abaka Sulumani bin oko mino abaka adako me Seba jamini dedede kame en oudo enyuto be cunye mito, jamini kame kalamo giamia kame abaka dako nono oudo okelo ne. Di do abaka adako nono kede jotic mege oko dok i lobo mere.

Abar ka Sulumani

¹³ Buli mwaka bin kokelo ne Abaka Sulumani saabu kame buco romo kilo tutumia ot are kiwie adek (23,000),

¹⁴ di likame oribo iye saabu kame bin jocat wil kelo. Abakai dedede me Arabia kede jopug me lobo me Isirael bin da tero ne saabu kede siliba.

¹⁵ Sulumani bin oko timo ibukui alac tol are (200) kede saabu; ebuku acelacel bin otero saabu kame buco romo kilo kanyaare.

¹⁶ En bin eko timo da ibukui atitino tol adek (300); ebuku acelacel bin otero saabu kame buco romo kilo adek. Abaka bin oko mino koketo ibukui nogo i Ot me Abum me Lebanon.

¹⁷ Abaka bin oko timo da kede lak liec kom adwong me ajakanut di eko puno kome kede saabu kame kojililo kiber.

¹⁸ Kom me ajakanut nono bin tie kede ariin kanyape kame konyono pi yito i wie. Wi kom nono oudo oguraun i cen ngee, di etie kede bade ka gongo cing i ngete tuni tuni, doko i nget bade acelacel oudo cal me engu cungo iye.

¹⁹ Doko da i nget ariin kanyape kame konyono pi yito i wi kom nono bin cal me inguon tomon kiwie are tie iye; engu acelacel i nget ari acelacel tuni tuni. Likame pwodi tie kom moro kame kotimo i ajakanut moro kame cal bala manono.

²⁰ Ikopon ka Abaka Sulumani dedede bin kotimo kede saabu, kiton jamini kame bin kotio kede gi i Ot me Abum me Lebanon oudo kotimo kede saabu kame kojililo kiber; likame bin tie moro kame kotimo kede siliba, pien i kare ka Sulumani siliba oudo likame kotero bala gi me wel.

²¹ Abaka bin tie kede imerin kame oto Tarusi karacel kede me ka Kiram. Ingei buli mwakini adek imerin ka Abaka bin dwogo di kikelo saabu, siliba, lak liece, icomio, kede alwaleko.

²² Abaka Sulumani oudo obaro doko di eriek kalamo abakai dedede me wi lobo.

²³ Abakai me wi lobo lung oudo cuny gi bin paro pi ot but Sulumani pi winyo kope mege me rieko kame Rubanga omie.

²⁴ Ngat acelacel kikom gi oudo tero ne giamia. Gin oudo kitero jamini apapat bala nat siliba kede saabu, igoen, jamini me yi, jamini angwe kur, asigiran, kede pundan. Manoni oudo timere buli mwaka.

²⁵ Sulumani bin tie kede agolai tutumia ongwon (4,000) me gwoko cabalan kede asigiran, kede asigiran tutumia tomon kiwie are (12,000), kame bin en eko cibo i bomban apapat kede ace en bin eko dong kede gi i Yerusalem.

²⁶ En bin epugo abakai dedede cako ki ecilet me Eupurate tuno i lobo me Pilistia, ape paka tuno i ikor me Misiri.

²⁷ I kare me apugan mere, Abaka Sulumani bin oko mino siliba odure Yerusalem bala kide, kede ebao me yat seda en eko mino obedo tot atatai bala cukamori me dud mori me Yuda.

²⁸ Asigiran ka Sulumani bin kokelo ki Misiri kede ki lobere apat.

Kope Acegocego amako Apugan ka Sulumani

²⁹ Gi dedede kame bin Sulumani otimo, tice mege, kede rieko mere, gin dedede kowandiko gi i Itabu me Itatam i kom Enabi Natan, kede i Imurai ka Akija me Silo, kede i Gianyuta but Enabi Ido, kame da tatamo kop i kom Yeroboam wot ka Nebat.

³⁰ Sulumani bin opugo Isirael lung i Yerusalem pi mwakini ot ongwon.

³¹ Sulumani bin oko to di oko yike i nget joakwari mege i Bomba ka Daudi, di wode Rekoboam oko lunyo wange bala abaka.