2 Iyutun 8 - Baibuli I Leb Kumam 2013

Tice Abeco Ace kame Sulumani Otimo

¹ Gero ot ka Rwot kede ode me ka abaka bin otero ne Sulumani mwakini ot are.

² En bin eko medo gero bomban kame Abaka Kiram bin omie, di eko cwano jo me Isirael ot bedo i yi gi.

³ Bin en eko mano adul me Kamat Soba,

⁴ di eko gero bomba me Tadamor i wi tim, kede eko gero bomban ace me gwoko jamini i adul me Kamat.

⁵ Sulumani bin oko da medo gero bomban me Bet Koron Amalo kede Bet Koron Apiny (bomban kame kocelo kede apama atek, di kitie kede irutei kame kocego),

⁶ bomba me Balat, kede bomban dedede kame oudo en egwoko iye jame, bomban kame bin kogwoko iye cabalan mege kede asigiran. Sulumani bin oko cobo iik mere me gedo i Yerusalem, Lebanon, kede i lobere dedede kame en oudo epugo.

^7-8 Jo kame Sulumani bin obedo mako tetek pi timo tice mege me gedo gin en jo kame bin jo me Isirael likame oko neko kikom jo Kiti, jo Amor, jo Perisi, jo Kibi, kede jo Yebu. Tuno tin pwodi ikwae gin tie ipasoi kamanono.

⁹ Do Sulumani bin likame omio dano moro me Isirael obedo epasoit; gin bin kibedo isirikalen, jodongo me tice mege, jotel me isirikalen mege, jotel me cabalan me yi kede jo kame ringo kede asigiran mege.

¹⁰ Jodongo kame bin lo tice me gedo ka Sulumani oudo tie tol are kede ot kany, gin en nyampalan kame bin pugo jotic.

¹¹ Sulumani bin oko kwanyo dako mere nyar ka abaka me Misiri ki Bomba ka Daudi di eko kobe i ot kame en oudo egero ne. En oudo ewaco be, “Dako nango likame bino bedo i ot ka Abaka Daudi me Isirael, pien kakame Sanduku me Isikan obedo iye udo odoko kabedo kacil.”

¹² Di Sulumani oko donyo mino giayala awanga i wi alutari kame en oudo egero i nyim tempulo.

¹³ En oudo emio giayala di lubere kede cik me Iswil ka Musa amako ceng adongo: ceng Sabato, Ebaga me Por Duwe, kede ibagai adek me buli mwaka, magonogo en Ebaga me Mugati ali kede Arup, Ebaga me Kac, kede Ebaga me Kimere.

¹⁴ Di bin elubo iswilia kame papa mere Daudi oudo otieko keto piny, en bin eko popoko tice me ceng acelacel ne josaseredoti, kede ne Jolebi kame bin konyo josaseredoti kede wer kede timo tice gi. En doko da eko popoko jodar kame pore daro irutei buli ceng acelacel, di elubo cik kame Daudi dano ka Rubanga oudo omio.

¹⁵ Kope dedede kame Daudi oudo omio josaseredoti kede Jolebi amakere kede gi dedede, kiton agolai me gwoko jame, oudo kolubo gi odocon.

¹⁶ Tuno i kare noni iik ka Sulumani me gedo oudo do otieko cobere. Cako ki cibo kide me dud apama tuno i tiek me tempulo lung oudo do tic mere otiek.

¹⁷ Di Sulumani bin oko ot i idoketa me Esiongeber kede Elat i dog nam adwong, i lobo me Edom.

¹⁸ Abaka Kiram bin oko cwano ne imerin di jotic mege en kame telo gi, doko di jo koudo ipirana en kame kwango gi. Gin bin kiko ot i lobo me Opir karacel kede jotic ka Sulumani, di gin kiko kelo ki kunono saabu kame kalamo kilo tutumia tomon kiwie kany (15,000), kame gin kiko mino Sulumani.