2 Iyutun 4 - Baibuli I Leb Kumam 2013

Jamini me yi Tempulo

¹ Abaka Sulumani bin oko mino kotimo alutari me nyonyo buronsi, kame laco mere oudo tie mita kanyangon, boro mere da kamanono, kede boro mere malo oudo tie mita ongwon kede dul.

² Bin eko da timo epipa kame kolwongo be nam adwong, tut mere oudo tie mita are kede sentimita ot are, laco me dude piny oudo tie mita ongwon kede sentimita ot ongwon, kede doge rimaro oudo tie mita tomon kiwie adek kede sentimita ot are.

³ Irotin are me cal me twonin kame kotimo kede nyonyo buronsi bin tie i lak epipa nono rimaro i ooko mere. Cal me twonin nogo bin kotimo i kom epipa nono i kare kame bin kotete kede.

⁴ Epipa nono bin cungo i ngei cal me twonin tomon kiwie are kame kotimo kede nyonyo buronsi, kame nyim gi oudo neno ooko; adek bin cungo di kineno bad tetu malo, adek neno bad tetu tim, adek bad tetu piny, kede adek neno bad tetu kide.

⁵ Bimirir me lak epipa nono oudo tie milimita ot kanyaare kiwie kany; lake oudo cal bala lak i kopo, di eyarere ooko bala ature. En oudo etero pii kame romo lita tutumia ot kanyape (60,000).

⁶ En eko da timo kalayan tomon me lwokere, di oko keto kany i bad tetu cam kede kany i bad tetu ngodal. Oudo kotio kede gin me lalao jamini kame kotio kede gi i kom giayala awanga. Pii me epipa josaseredoti en kame oudo lwokere kede.

⁷ Bin eko da timo icegeren tomon kede saabu, me cibo italan iepone kame oudo komito kede, di eko cibo gi i tempulo, kany i bad tetu piny, kede kany i bad tetu malo.

⁸ Doko da oko timo imesai tomon di oko cibo gi i tempulo, kany i bad tetu cam kede kany i bad tetu ngodal. Di oko da timo kalayan tol acel me saabu.

⁹ Bin oko timo diakal me Josaseredoti, kede da diakal me ooko, kede ikekon adonyo i diakal nono. Ikekon kame oudo tie i dierediere me diakal nogo oudo konamakino kede nyonyo buronsi.

¹⁰ Bin oko sipo epipa i bad tetu piny me bad kide me yi tempulo.

¹¹ Kuram bin oko timo da agune, jamini me kikiso wi alutari, kede kalayan. En bin eko tieko timo tice dedede kame oudo en etie timo ne Abaka Sulumani, kame mako tempulo ka Rwot. Magonogi en jamini kame bin en eko timo:

¹² ipirin are, arop are kame oudo tie i wi ipirin nogo, cal are me irikoi kame oudo tie i kom arop nogo;

¹³ cal me pomagurunet tol ongwon, kame kotimo i irotin are i wi arop me epir acelacel;

¹⁴ cegeren, kede kalayan tomon kame koketo i wi cegeren nogo;

¹⁵ epipa acel, kede cal me twonin tomon kiwie are kame epipa nono cungo i ngei gi;

¹⁶ agune, jamini me kikiso alutari kede kalayan. Jamini nogi dedede Kuram bin otimo ne Abaka Sulumani kede nyonyo buronsi aber kalamo, pi en keto gi i ot ka Rwot.

¹⁷ Abaka bin oko mino koteto jamini nogi i kabedo kame elupe oudo tie iye, i dierediere me Sukot kede Sereda, i aditot me Yorodan.

¹⁸ Sulumani bin oko mino kotimo jamini nogi di tot twatwal, di manono oko mino rom me nyonyo buronsi kame kotio kede likame oko ngere.

¹⁹ Sulumani bin oko mino kotimo jamini dedede kame oudo tie i ot ka Rwot: alutari kame kotimo kede saabu, emesa me saabu kame bin koketo iye mugati kame koyalo but Rwot,

²⁰ gicibo italan kede italan gi kame kotimo kede saabu kame kojililo kiber, gin bin kicungo i nyim Kabedo Kacil Kalamo bala kite kame oudo koiko kede;

²¹ cal me ature, italan, kede ilumai me kwanyo mac,

²² gi iiko ausin me italan, kalayan, bakulin me dunyo odok angwe kur, kede itatany me kwanyo mac; gin dedede kotimo gi kede saabu kame kojililo. Ikekon me donyo i tempulo kede ikekon me yie adonyo i Kabedo Kacil Kalamo oudo komwono kede saabu.