2 Iyutun 36 - Baibuli I Leb Kumam 2013

Abaka Yekoyasi me Yuda

¹ Jo me Yuda oko kwanyo Yekoyasi wot ka Yosia, di kiko kete ebedo abaka kame lunyo wang papa mere i Yerusalem.

² Mwakini me dongo ka Yekoyasi oudo tie ot are kiwie adek i kare kame bin en ecako kede pug. En bin eko pug pi duwete adek i Yerusalem.

³ Abaka Neko me Misiri bin oko riame tenge ki Yerusalem, di eko mino jo me Yuda oko donyo culo bute siliba kilo tutumia adek kede tol ongwon (3,400) kede saabu kilo ot adek kiwie ongwon (34).

⁴ Abaka Neko oko keto Eliakim, omin me Yekoyasi odoko abaka me Yuda kede Yerusalem, di en eko loko nyinge be Yekoyakim. Neko oko tero Yekoyasi Misiri.

Abaka Yekoyakim me Yuda

⁵ Mwakini me dongo ka Yekoyakim oudo tie ot are kiwie kany i kare kame en bin ecako kede pug. En bin eko pug i Yerusalem pi mwakini tomon kiwie acel. En eko timo gikarac i nyim Rwot Rubanga mere.

⁶ Abaka Nebukadunesa me Babilon oko bino sure, di eko make eko twene kede irikoi, di eko tere Babilon.

⁷ Nebukadunesa oko tero da jamini mogo kame bin kotimo kede tice me tempulo di en eko keto gi i paco mere me abaka i Babilon.

⁸ Gi dedede kame Yekoyakim bin otimo, kiton jamini areco, kede kope ace areco kame bin koudo amake, kowandiko gi i Itabu me Itatam amako Abakai me Isirael kede Yuda. Wode Yekoyakin en kame bin oko lunyo wange bala abaka me Yuda.

Abaka Yekoyakin me Yuda

⁹ Mwakini me dongo ka Yekoyakin oudo tie tomon kiwie kanyauni i kare kame ecako kede pug. En bin eko pug i Yerusalem pi duwete adek kede ceng tomon. En eko timo gikarac i nyim Rwot.

¹⁰ I kare me kot dwogo kede me mwaka nono Abaka Nebukadunesa oko cwano jo di oko tero Yekoyakin Babilon bala mabus, karacel kede jamini abeco me tempulo. Di Nebukadunesa oko keto Esedekia, omin me Yekoyakin, odoko abaka me Yuda kede Yerusalem.

Apugan ka Esedekia

¹¹ Mwakini me dongo ka Esedekia oudo tie ot are kiwie acel i kare kame bin en ecako kede pug; en bin eko pug pi mwakini tomon kiwie acel i Yerusalem.

¹² En bin eko timo gikarac i nyim Rwot Rubanga mere. En likame emwolere i nyim enabi Yeremia, ngat kobedo waco ne kop ka Rwot.

Yerusalem Opoto

¹³ Esedekia oko jemo ne Abaka Nebukadunesa, ngat kame bin omie ekwongere i nying Rubanga be ebino bedo ngat kame genere bute. En ebedo kede epali di eko dagi swilaro pi koto dok but Rwot, Rubanga me Isirael.

¹⁴ Josaseredoti adongo dedede kede jo da bin likame oko bedo kede genere but Rwot atwal atwala. Gin kibedo lubo gikareco me atekerin apat, di kiko pwoko tempulo kame Rwot kikome en kolonyo i Yerusalem.

¹⁵ Rwot, Rubanga ka joakwari gi bin obedo cwano negi inabin, pien oudo kisa omake kede jo mege kede kabedo mere.

¹⁶ Do gin kiko bedo tuko kede joor ka Rubanga, di kicao kope gi, doko di kinyero inabin mege, tuno mino Rwot lilo negi lilo kalikame gengere.

¹⁷ Pi mano, Rwot bin oko kelo abaka me Babilon pi suro gi. Abaka nono oko neneko ipongai me Yuda kiton i tempulo. En likame bin ebedo kede kisa i kom ngatamoro kame pwodi titidi amoto kotieko ti, icuo arabo dako. Rubanga omio gin dedede i cinge.

¹⁸ Abaka me Babilon oko yako jamini dedede kame bin kotio kede i tempulo, jamini adongodongo kede atitino, lim me tempulo, kede abar me abaka kede me jodongo me tice mege, di en eko tero gi dedede Babilon.

¹⁹ Isirikalen ka Nebukadunesa oko wango tempulo kede bomba, kiton miere me abaka, kede kiko dudubo jamini mege abeco dedede, di kiko reto apama me Yerusalem piny.

²⁰ Nebukadunesa oko tero Babilon jo dedede kame oudo oko dong kuo, di gin kiko doko ipasoi kame timo tic ne en kede ikwae mege tuno i kare me apugan me jo Pasia.

²¹ Manono bin oko mino kop kame Rwot bin owaco kibut enabi Yeremia ocobere. Rwot oudo owaco be, “Lobo bino dong nono pi mwakini ot kanyaare, pi culo kare me wei me Sabato kalikame jo obedo gwoko.”

Sairas Omio Cik but Iyudayan pi Dok (Esera 1.1-4)

²² I mwaka me agege me apugan ka Sairas bala abaka me Pasia, Rwot oko mino kop kame en oudo emio enabi Yeremia owaco ocobere. En emio Sairas owoto cik di eko wandiko en, eko cwane be some i piny mere lung.

²³ Cik nono oudo waco kaman: “Manoni en cik ka Sairas, abaka me Pasia. Rwot Rubanga me i malo otieko keta pi bedo ngapug me wi lobo lung di eko mina tic me gero ne tempulo i Yerusalem, kabedo kame tie Yuda. Aso, nataman wun dedede kame ibedunu jo ka Rubanga, otunu kunono. Ango akwao Rwot Rubanga wu, ebed kede wu.”