2 Iyutun 32 - Baibuli I Leb Kumam 2013

Jo Asiria Ongato ne Yerusalem

¹ Ingei Abaka Esekia timo gi nogi dedede kede genere but Rwot, Abaka Senakerib me Asiria oko ot suro Yuda. En eluko bomban kame kocelo di oudo eparo pi mano gi.

² Kakame Esekia oneno kede be Senakerib oudo otieko bino pi yi kede Yerusalem,

^3-4 en eko iiko tam kede jodongo me tic mere kede isirikalen pi toro ataneko kame oudo tie ooko me bomba tetekeny jo Asiria kur bed tie kede pii moro ka gin kibino suro Yerusalem. Jodongo nogo oko donyo ooko kede jo atot di gin kiko toro ataneko kede isamai dedede kame oudo tie i nget Yerusalem.

⁵ Esekia oko cako timo tic kede teko di eko bobo gero apama lung kame oudo oreto piny, di eko gero da gedo mogo abocoboco malo iye, kede eko gero apama ace i ooko mere. Medo i wi manono en eko temuno da nget bomba i bad tetu kide me Yerusalem kakame bin otoro. En bin eko mino otimo da tongini kede ibukui atot twatwal.

⁶ En eko keto jo kame bino telo jo ot yi, di en eko coko gi karacel i diakal me erute me bomba. En eko waco negi be,

⁷ “Bedunu tek doko di itienu kede nwangcuny. Kur ibedunu kede lworo moro arabo poto cuny i nyim abaka me Asiria kede isirikalen dedede kame en etie kede; pien ngat kame tie kede wan tek kalamo ngat kame tie kede en.

⁸ En etie kede teko me dano, do wan Rwot Rubanga wa tie but wa pi konyo wa kede pi yi pirwa.” Kope nogi kame Abaka Esekia me Yuda owaco, oko mino jo oudo nwangcuny.

⁹ I cen mere, di bin Abaka Senakerib me Asiria tie Lakis kede isirikalen mege, en eko cwano jotic mege Yerusalem pi waco ne Abaka Esekia me Yuda karacel kede jo Yuda dedede kame oudo tie Yerusalem be,

¹⁰ “Ango Senakerib, abaka me Asiria, apenyo wu be, nyo kame wun itienu keto gen wu iye en amio wun pwodi itienu bedo Yerusalem di otieko luko wu?

¹¹ Esekia waco ne wu be Rwot Rubanga wu bino lako wu ki cinga ango abaka me Asiria. Iparunu be en likame etie ngalo wu di eko bino mino wu itounu kec kede orio?

¹² Benyo, mam Esekia nono en kame bin orereto kabedere me woro Rwot kede alutarin mege, di eko ciko jo me Yuda kede Yerusalem pi woro Rubanga di kidunyo ne odok angwe kur i wi alutari acel kenekene?

¹³ Benyo, mam wun likame ingeunu gikame ango kede joakwari na otieko timo ne jo me atekerin apat? Benyo, tie rubanga me ateker moro kotieko lako piny mere ki cing abaka me Asiria?

¹⁴ Awene kame Rubanga moro kikom rubangan me pinye nogi dedede oko lako kede piny gi ki cing abakai me Asiria, en komio iparunu be Rubanga wu twero lako wu ki cinga?

¹⁵ Pi mano, kur iyeunu Esekia ngalu arabo erweny wu kamano. Kur igamunu kop mere! Pien likame tie rubanga me ateker moro kotieko lako jo mege ki cinga arabo ki cing joakwari na. Ateteni rubanga wu noni likame karuno lako wu ki cinga!”

¹⁶ Jotic me Asiria oko meede waco kope areco i kom Rwot Rubanga kede i kom Esekia, ngatic ka Rwot.

¹⁷ Senakerib bin oko da wandiko baluwa kame cao Rwot Rubanga me Isirael. Baluwa nono oudo waco be, “Rubangan me atekerin me pinye apat bin likame oko twero lako joe gi ki cinga, kamanono da Rubanga ka Esekia likame bino lako jo mege ki cinga.”

¹⁸ Jotic me Asiria nogo oko lelemo kop noni kede dwan amalo kede leb Eburania, but jo me Yerusalem kame oudo tie bedo i wi apama, pi mino gi kidok lwor, tetekeny gin kimai bomba.

¹⁹ Gin kiko bedo waco kop i kom Rubanga me Yerusalem, ineno bala eda ecal bala rubangan me atekerin apat kame jo en kotimo.

²⁰ Di Abaka Esekia kede enabi Isaya wot ka Amos oko lego pi kop noni di kikok but Rubanga pi konyo gi.

²¹ Rwot oko cwano malaika di en eko neneko isirikalen kede jotel me isirikalen kede jodongo apat me Asiria. Manono oko mino abaka me Asiria odok cen i piny mere kede lewic. Ceng moro acel di en oudo etie i tempulo me rubanga mere, awobe mege mogo i kom idwe mege oko neke kede ipimai gi.

²² Epone noni en kame Rwot bin oko lako kede Esekia kede jo me Yerusalem ki cing Abaka Senakerib me Asiria, kede ki cing jokwor gi apat dedede. En eko mino gi kibedo kede anapakin kede pinye me kio gi dedede.

²³ Jo atot bin oko ot Yerusalem pi tero giayala gi but Rwot, kede pi tero giamia me jamini abeco but Abaka Esekia me Yuda, di do cako i kare nono atekerin dedede oko donyo bedo kede wor but Esekia.

Tuwo ka Esekia kede Ewaka mere

²⁴ I kare nogo tuwo oko mako Esekia kame oudo otuno do neke. En eko kwano Rwot, di Rwot oko gamo doge di oko mine gianena kame nyuto ne be ebino cango.

²⁵ Do Esekia oko timo gi kalikame lubere kede bero kame oudo Rwot otimo ne, pien cunye oko bedo kede ewaka. Manono bin oko kelo lilo ka Rwot i kome kede i kom Yuda kede Yerusalem.

²⁶ Di do Esekia oko mwolere eweko ewaka kame oudo etie kede, en kede jo me Yerusalem, manono oko mino Rwot likame omio jo alola i kare ka Esekia.

Abar kede Angosibib ka Esekia

²⁷ Abaka Esekia oudo obaro twatwal, doko jo dedede oudo mie wor. En bin eko gero agolai me kano siliba, saabu, kide me wel, jamini angwe kur, ibukui, kede jamini dedede apat me wel.

²⁸ Medo i kom magonogo en eko gero da ude me gwoko engano, bwini, mo me olibeti; kede ude me gwoko doke, kede kagwoko romini.

²⁹ Rubanga oudo omio Esekia obaro twatwal; en oudo etie kede romini kede doke, omio en eko gero bomban atot.

³⁰ Abaka Esekia en kame bin otimo puleju kame kwanyo pii ki atan me Gikon di eko tero i bad tetu tim me yi bomba me Yerusalem. Esekia bin tie kede winyo i gi dedede kame en oudo etimo.

³¹ Akadi i kom kop amako joor kame bin jotel me Babilon ocwao pi ot penyo kop i kom gianena kame oudo Rubanga omie, Rubanga oweke timo gi dedede en kene, tetekeny etame di eko ngeno gi dedede kame oudo tie i cunye.

Ajikini me Apugan ka Esekia

³² Aso, gi dedede apat kame Esekia bin otimo, tice mege abeco, gin dedede kowandiko gi i Gianyuta kame Rubanga Omio Enabi Isaya Wot ka Amos kede i Itabu me Itatam amako Abakai me Yuda kede Isirael.

³³ Esekia bin oko to di oko yike kabedo kame bin koyiko iye abakai kame bin koworo twatwal; di jo me Yuda kede me Yerusalem dedede oko mine wor i to mere. Wode Manase en kame bin oko lunyo wange bala abaka.