2 Iyutun 3 - Baibuli I Leb Kumam 2013

¹ Sulumani oko cako gero ne Rwot tempulo i Yerusalem i wi moru me Moria, kakame Rwot oudo oneeno ne papa mere Daudi kiye, en laru me pieto ka Arauna Ngajebus.

² En ecako gedo i ceng me are me duwe me are me mwaka me ongwon me apugan mere.

³ Tempulo kame Sulumani bin tie gero oudo rom mere tie kaman: boro mere oudo tie mita ot are kiwie kanyaare, kede laco mere oudo tie mita kanyangon.

⁴ Agola me nyime me donyo iye oudo laco mere rom aroma kede me tempulo, mita kanyangon, do boro mere malo oudo tie mita ot kany kiwie ongwon. Agola nono yie oudo kopuco kede saabu kame kojililo.

⁵ Agola adwong mere oudo konamo iye ibaon me yat saipuras, di oko puce kede saabu kame kojililo, kame oko goro iye cal me tugere kede irikoi.

⁶ Abaka oko tubuso tempulo kede kide kacil kede saabu kame kokelo ki lobo me Parabaim.

⁷ En etio kede saabu me puco apama me tempulo, ipirin mege, piny i nyim ikekon mege, karacel kede ikekon mege. Oudo kogoro cal me cerubim i apamai mege.

⁸ Agola me yie, en Kabedo Kacil Kalamo, laco mere oudo tie mita kanyangon, manono en oudo laco me tempulo lung, kede boro mere da mita kanyangon. Bin kotio kede saabu aromo bala kilo tutumia ot are (20,000) me mwono apama me agola nono.

⁹ Bin kotio kede saabu guram tol kany kede ot kanyaare (570) me timo sumalin. Agolai me malo da bin kopuco yi gi kede saabu.

¹⁰ Bin oko gurauno cweno cal are me cerubim di oko puco kom gi kede saabu, di oko cibo gi i Kabedo Kacil Kalamo,

^11-13 kakame oudo kicungo iye acel tetucel kede ocelu da tetucel di kineno ekeko. Buli acel oudo tie kede bwome are, buli bwome boro mere oudo tie mita are kede sentimita ot are. Oudo koyararo bwom gi tetekeny bwom cerubim acel oudo tuno i apama me tetucel, di bwom cerubim ocelu da ko tuno i apama me tetu ocelu; bwom gi icegun kame orieo tetu cuny agola oudo riamo. Aso bwom gi bin oyarere oko bedo mita kanyangon, manono en laco me agola nono.

¹⁴ Esuka me isenge me Kabedo Kacil Kalamo oudo kotimo kede egoe aliamaliam di kocile kede erangi ebululu, akwakwar kede akwar, di etie kede cal me cerubim iye.

Ipirin Are me Nyonyo Buronsi

¹⁵ Abaka oko mino kotimo ipirin are, buli acel oudo boro mere tie mita tomon kiwie kany kede dul, di eko cibo gi i nyim tempulo. Acelacel oudo tie kede arop i wie kame boro mere malo tie mita are kede sentimita ot are.

¹⁶ Arop acelacel oudo kotubuso wie kede cal me irikoi kame kokedo, di oko timo cal me anyakini me pomagurunet tol acel kede nyonyo buronsi di oko keketo gi i kom irikoi nogo.

¹⁷ En eko cibo ipirin nogo i nyim tempulo, acel i bad tetucel kede acel da i bad tetu ocelu. Acel me bad tetu cam en eko cako nyinge be Yakin, acel me bad tetu ngodal eko cako nyinge Boasi.