2 Iyutun 28 - Baibuli I Leb Kumam 2013

Abaka Akas me Yuda

¹ Mwakini me dongo ka Akas bin tie ot are i kare kame ecako kede pug. En bin eko pug i Yerusalem pi mwakini tomon kiwie kanyape. En likame eko bedo timo gikame poore i nyim Rwot Rubanga mere, bala kame bin kwaru mere Daudi obedo timo,

² do en eko lubo timo gikame abakai me Isirael obedo timo. En bin eteto da caljwogi ka rubanga Baal;

³ doko ebedo mino giayala i aditot me Kinom. En bin emio kiton awobe mege kikokome bala giayala awanga but caljwogi, di elubo tim me kwer arac me atekerin kame bin Rwot oriamo tenge ki lobo nono i kare kame bin jo me Isirael donyo kede iye.

⁴ Abaka Akas bin obedo mino giayala angola kede giayala me odok angwe kur i kabedere me woro caljwogi, i wi mori, kede i dud yen oduko dedede.

Yi kede Siria kede Isirael

⁵ Pi kite kame Akas bin odubo kede, manono bin oko mino Rwot Rubanga mere omie i cing abaka me Siria. Abaka nono bin oko bwone di eko mako jo atot eko tero Damasiko bala mabus. I cen me manono, Rwot bin bobo da oko mino Akas i cing abaka me Isirael, di abaka nono oko bwone di eko neko jo atot.

⁶ I ceng acel kenekene, abaka me Isirael, Peka wot ka Remalia, bin obwono Akas di eko neko isirikalen me Yuda tutumia tol acel kede ot are (120,000), kame bin tek i yi. Manoni bin otimere pien gin oudo kiweko lubo Rwot, Rubanga ka joakwari gi.

⁷ Di Sikiri, sirikale me Epuraimu kame bin tek i yi, oko neko Maseya wot ka Abaka Akas, Asirikam ngat kame bin lo paco ka abaka, kede Elikana ngat kame bin lubo tien abaka.

⁸ Isirikalen me Isirael oko mako jo Yuda tutumia tol are (200,000) bala mabus, mon kede cuo di gin kiko dok kede gi Samaria i bomba gi adwong. Gin kitero gi karacel kede jamini atot kame kiyako. Manoni gin bin kitimo bed bala jo Yuda oudo obedo joawade gi.

Enabi Oded

⁹ Enabi ka Rwot bin tie Samaria kunono kame nyinge Oded. Kakame bin isirikalen me Isirael tie dok kede paco, en eko yai pi ot riamo kede gi di eko waco negi be, “Rwot, Rubanga ka joakwari wu oudo olilo ne jo Yuda, di en eko mino wun ibwonunu gin, do nataman en etieko winyo kite kame wun ikounu neko gin kede abongo kisa.

¹⁰ Di nataman wun ikounu mito mino gin jo me Yuda kede me Yerusalem, cuo kede mon kidok ipasoi. Benyo, wun likame ingeunu be wuda itiekunu timo dub atot atota but Rwot Rubanga wu?

¹¹ Aso nataman winyunu kop na, di ikounu dwoko jo kame wun imakunu nogo, pien gin kibedo joawade wu. Poore idwokunu gi, pien Rwot otieko lilo ne wu kitek.”

¹² Jotel ongwon mogo me jo Epuraimu, Asaria wot ka Yokanan, Berekia wot ka Mesilemot, Yekisikia wot ka Salum, kede Amasa wot ka Kadalai, oko gida dagi gikame jo kame bin tie dwogo ki yi otimo.

¹³ Gin kiko waco negi be, “Wun likame ibinunu kelo jo kame imakunu nogo kan, pien wun imitunu tingo ne wan kop but Rwot medo i kom dub kede raco wa kame nataman otie kede cuto. Raco wan dwong cuto, doko Rwot otieko lilo ne wa kitek.”

¹⁴ Aso, manono oko mino isirikalen oweko jo kame gin oudo kimako karacel kede jamini kame gin oudo kiyako, i nyim jotel kede jo koudo ocokere.

¹⁵ Di cuo ongwon nogo kame oudo owaco nying gi oko yai di gin kiko kwanyo igoen kikom jamini kame oudo koyako, di gin kiko poko ne jo dedede kame oudo tie ot nono, kikom jo kame oudo komako. Gin kimio gi igoen kede amukai, cam kede giamata, di kiko wiro mo me olibeti i aporeso gi. Jo kame oudo goro gin kiko keto i ngei asigiran, di kiko tero gi paka but joawade gi i Jeriko, bomba me tugere. Di jo Isirael oko dok Samaria.

Akas Okwao Asiria pi Konye

¹⁶ I kare nono Abaka Akas oko cwano kop but abaka me Asiria pi cwano ne kony.

¹⁷ Pien jo Edom oudo bobo osuro Yuda di kiko bwone, kede kiko mako jo kitero.

¹⁸ Doko i kare nono da jo Pilistia oudo oyako bomban kame oudo tie i dud mori me bad tetu tim kede kame bin tie i bad tetu piny me Yuda, di kiko mano bomban me Bet Semes, Aijalon, Gederot, Soko kede calere mege, Timina kede calere mege, kede Gimoso kede calere mege. Gin oudo kiko donyo bedo kunono.

¹⁹ Rwot oudo okelo peko nogi dedede i kom Yuda pien Abaka Akas oudo odagi lubo kop mere, doko eko dagi da gengo jo Yuda timo dub.

²⁰ Aso, Abaka Tigilat Pileser me Asiria akaka bino pi konyo Akas, en eko lokere bino yi kede en, di eko tidilo en.

²¹ Akas oko kwanyo jamini me tempulo, jamini me paco ka abaka, kede me miere me jotel, di en eko mino gi but abaka me Asiria, do manono da likame oko konye.

Dub ka Akas

²² I kare kame bin Abaka Akas tie kede i peko en kame do eko timo kede dub kokato kare but Rwot.

²³ En emio giayala but rubangan me jo me Damasiko, jo koudo obwone. En ewaco be, “Pien rubangan me abakai me Siria oko konyo gi, ango abino mino giayala but gi tetekeny amoto kikonya.” Do manoni oko lokere kelo ne peko, kede ne jo Isirael lung.

²⁴ Abaka Akas oko coko jamini dedede kame bin kotio kede i tempulo di eko ngingido gi. En eko cego tempulo di eko timo alutarin kabedere dedede i Yerusalem.

²⁵ I bomban dedede me Yuda en bin egero iye kabedere me woro rubangan apat, kabedere me yalo caljwogi. Di manono oko mino Rwot, Rubanga ka joakwari mege olilo.

²⁶ Gi dedede apat kame en bin eko timo kede yote me kuo mere, cako ki agege tuno i atiekini me apugan mere, gin dedede kowandiko gi i Itabu me Itatam amako Abakai me Yuda kede Isirael.

²⁷ Akas bin oko to, di oko yike i Yerusalem, do likame i kabedo kame bin koyiko iye abakai me Isirael. Wode Esekia en kame bin oko lunyo wange bala abaka.