2 Iyutun 24 - Baibuli I Leb Kumam 2013

Abaka Yowasi me Yuda

¹ Mwaka me dongo ka Yowasi oudo tie kanyaare i kare kame bin en ecako kede pug. En bin eko pug i Yerusalem pi mwakini ot ongwon. Toto mere oudo en Sibia, dako me bomba me Beereseba.

² Yowasi oko bedo timo gikame ber i nyim Rwot i kare dedede me kuo ka Yekoyada ngasaseredoti.

³ Yekoyada oko yero mon are ne Abaka Yowasi, di en eko nywalo kede gi idwe awobe kede idwe anyira.

⁴ Di bin en etieko bedo abaka pi kare moro, cuny Yowasi oko paro pi iiko tempulo.

⁵ En eko coko josaseredoti kede Jolebi karacel di eko waco ne gi be, “Otunu i bomban me Yuda dedede di ikounu raro sente kibut jo Isirael dedede, me iiko ot ka Rubanga wu buli mwaka; nenunu be itimunu manono awakawaka.” Do Jolebi oko gal.

⁶ Aso, abaka oko lwongo ngatel me Josaseredoti Yekoyada di eko penye be, “Pinyo komio in likame iko mino Jolebi oraro sente kibut jo atie Yuda kede Yerusalem bala kame bin Musa ngatic ka Rwot ociko be miero rar kibut jo Isirael, pi konyo tic me Eema ka Rwot?”

⁷ Jo kame bin lubo Atalia, dako arac nono, oko turo tempulo, di gin kiko loko jamini kacil me tempulo odoko me woro Baal.

⁸ Abaka Yowasi oko mino cik be tim sanduku moro me coko sente di oko kete i erute me tempulo.

⁹ Bin oko rabo kop i Yuda kede Yerusalem lung pi jo dedede kelo but Rwot sente kame bin Musa, ngatic ka Rubanga, ocako kop me raro kibut jo Isirael i wi tim.

¹⁰ Manono oko yomo cuny jotel kede jo dedede di gin kiko kelo sente gi, di kiko keto i sanduku paka pong.

¹¹ I kare dedede kame Jolebi bin tero kede sanduku nono but jodongo me tic ka abaka, ka gin kiko neno be sente tot iye, kalani ka abaka kede ngatic me Ngatel me Josaseredoti oudo ko ot di kiko kwanyo sente nogo dedede tenge di kiko dwoko sanduku kare. Gin oudo kibedo timo kamanono buli ceng, di kiko coko sente atot twatwal.

¹² Abaka kede Yekoyada bin ko mino sente nogo but jo kame lo tic amakere kede iiko tempulo, di jo nogo ko culo kede jo anapo matapalin, jo atimo tic me ibaon, kede jo atimo tic me lilime, gin jo kame kipoore iiko tempulo.

¹³ Aso, jo kame bin timo tic nono oko timo tic kede teko, di gin kiko iiko tempulo di etek bala kite kariki etie kede.

¹⁴ Kakame gin bin kitieko kede tic me iiko tempulo, gin kiko dwoko sente kodong but abaka kede Yekoyada, di oko tic kede me timo jamini kame kotio kede i tempulo, jamini me wango giayala, ijikon, kede jamini ace kame kotimo kede saabu kede siliba. Gin kiko bedo mino giayala awanga i tempulo dikidiki pi kare me kuo ka Yekoyada lung.

Koloko Iik ka Yekoyada

¹⁵ Yekoyada bin obedo kuo paka en ti twatwal, di eko to di mwakini me dongo mere tie tol acel kede ot adek.

¹⁶ Di oko bin yike kabedo kame koyiko iye abakai i Bomba ka Daudi, piento en bin eko timo tic aber pi jo Isirael, kede pi Rubanga kede tempulo.

¹⁷ Aso, ingei to ka Yekoyada, jotel me Yuda oko bino di kiko mino wor but abaka, di gin kiko kwano cuny abaka pi lubo tam gin.

¹⁸ Gin kiko weko tempulo ka Rwot Rubanga ka joakwari gi, di kiko donyo woro caljwogi ka rubanga kame nyinge Asera. Dub gi noni oko kelo lilo ka Rwot i kom Yuda kede Yerusalem.

¹⁹ Rwot oko bin cwano negi inabin pi kwenyaro gi me wek kidok bute, do jo oko dagi winyo kop me inabin nogo.

²⁰ Di tipo ka Rubanga oko bino i kom Sakaria wot ka ngasaseredoti Yekoyada. En eko yai malo di eko cungo i nyim jo eko waco negi be, “Rwot Rubanga tie penyo pinyo komio wun iturunu cik mere, di manono oko nan gengo wu bedo kede mulem. Wun itiekunu weko Rwot, di eda nataman eko jalo wu!”

²¹ Gin kiko poro kop arac i kome, di Abaka Yowasi oko mino gi cik be kididipo en; di gin kiko didipo en kede kide paka neke i diakal me tempulo.

²² Abaka Yowasi bin wie owil kede tim me kisa kame bin Yekoyada, papa me Sakaria otimo ne, di en eko neko Sakaria. Di Sakaria bin tie to, en eko waco be, “Akwao Rwot enen gi kotimere di eko nyango!”

Ajikini me Apugan ka Yowasi

²³ I atiekini me mwaka nono isirikalen me Siria oko bino pi yi kede Yowasi. Gin kiko suro Yuda kede Yerusalem, di kiko neko jotel dedede. Di do gin kiko cwano jamini kame kiyako dedede but abaka me Damasiko.

²⁴ Bed bala isirikalen me Siria oudo nonok, do Rwot oko mino kibwono twon isirikalen me Yuda, pien jo me Yuda oudo oweke, en Rwot, Rubanga ka joakwari gi. Manono en kite kame Rwot bin oko ngolo kede kop i kom Yowasi.

²⁵ Jo Siria bin oko dok cen, di kiweko Yowasi kede awanon atek. Jotic mege oko poro kop me neke pi kite kame en oudo eneko kede wot ka ngasaseredoti Yekoyada. Gin kiko neke i apien mere. Di oko yike i Bomba ka Daudi, do likame i kabedo kame bin koyiko iye abakai.

²⁶ Jo kame bin oko poro kop me neke, gin en Sabad wot ka Simeat dano me Amon, kede Yekosabad wot ka Simirit dano me Moab.

²⁷ Kope dedede amako awobe ka Yowasi, kope areco me imurai kame kowaco i kome, kede kite kame en bin eko iiko kede tempulo, gin dedede kowandiko gi i Itabu kame Gonyo Kope me Itabu me Abakai. Kakame Yowasi bin oto kede, Amasia wode en oko lunyo wange bala abaka.