2 Iyutun 23 - Baibuli I Leb Kumam 2013

Jo Ojemo ne Atalia

¹ I mwaka me kanyaare me apugan ka Atalia, ngasaseredoti Yekoyada oko udo nwangcuny, di en eko winyere kede jodongo me isirikalen: Asaria wot ka Yerokam, Isimael wot ka Yekokanan, Asaria wot ka Obed, Maseya wot ka Adaya, kede Elisapat wot ka Sikiri.

² Gin bin kiko ot i bomban dedede me Yuda di kiko coko Jolebi, kede jotel me ikekon me Isirael di kiko tero gi Yerusalem.

³ Di do jo kocokere dedede oko timo isikan kede Yowasi, wot ka abaka i tempulo. Yekoyada owaco negi be, “Wot ka abaka ine! En poore ebed abaka, bala kame Rwot bin ocikere kede i kom awobe ka Daudi.

⁴ Gikame ibinunu timo en ine: ka josaseredoti kede Jolebi bino ot i tic i ceng Sabato, acel i kom adek gin bino daro irutei me tempulo,

⁵ acel i kom adek ace bino daro paco me abaka, di acel i kom adek kodong mere ko daro Erute me Acakini me Apama. Jo apat dedede bino cokere i diakal me tempulo.

⁶ Kur iyeunu ne ngatamoro donyo i tempulo kwanyo kenekene josaseredoti kede Jolebi kame tie i wang tic. Gin kiromo donyo, pien gin kibedo jokacil, do jo apat dedede miero lub kop kame Rwot owaco di gin kiko dong ooko.

⁷ Jolebi bino cungo di kiluko abaka diere, di ngat acelacel omako jamini mege me yi. Gin kibino upere kede abaka kabedere dedede kame en eoto iye. Dano moroni kame bino donyo i tempulo kobino neke.”

⁸ Jolebi kede jo dedede me Yuda oko timo gi dedede bala kame ngasaseredoti Yekoyada oudo ociko. Likame bin oko yei ne isirikalen kame yai ki dog tic dok i miere gi, manono oko mino ngatel acelacel me isirikalen obedo tie kede isirikalen kame koto poore yai ki dog tic kede kame poore lunyo wang gi i dog tic. Etimere kamanono pien ngasaseredoti Yekoyada likame bin oyei ne ngatamoro dok paco ingei en tieko tic mere.

⁹ Yekoyada oko mino jotel me isirikalen tongini kede ibukui adongo kede atitino kame riki obedo me ka Abaka Daudi, kame oudo kobedo gwoko i tempulo.

¹⁰ En eko keto jo kame gwoko abaka; emio ngat acelacel ocungo di emako gi me yi mere i cinge, cako ki bad tetu piny me tempulo tuno i bad tetu malo mere, kede rimaro alutari.

¹¹ Di Yekoyada oko kelo Yowasi eko ngapo ne ocoro me ajakanut, kede eko mine itabu me iswilia ka Rubanga. Di do oko kete edoko abaka. Ngasaseredoti Yekoyada kede awobe mege oko wiro Yowasi kede mo, di jo dedede oko lelemo be, “Abaka bed kuo nakanaka!”

¹² Kakame Atalia owinyo kede woo me jo kame oudo ringo di kipako abaka, en eko onyaro i tempulo kakame jo oudo ocokere iye.

¹³ En eko neno abaka anyen di tie cungo kadonyo me tempulo, i nget epir kakame koweko pi abakai, di jotel me isirikalen kede jokut agwarai oluke. Jo dedede oudo tie lelemo kede kilel di kikuto agwarai, di jower me tempulo en kame telo gi kede jamini gi me wer. Atalia oko nyinyilo igoen me kome pi cwercuny di eko lelemo be, “Manono iik me mano apugan! Manoni iik me mano apugan!”

¹⁴ Yekoyada oudo likame mito be nek Atalia i tempulo. Aso, en eko waco ne jotel me isirikalen be, “Terenu ooko me tempulo di ibeunu kede i diere me isirikalen koteere; nekunu ngatamoroni kenekene kame bino tamo lube pi lake.”

¹⁵ Jotel me isirikalen nogo oko mako Atalia, di gin kiko tere paco me abaka, di kiko neke kunono i Erute me Asigiran.

Alokaloka kame Yekoyada Otimo

¹⁶ Yekoyada kede Abaka Yowasi kede jo dedede oko timo isikan be gin kibino bedo jo ka Rwot.

¹⁷ Di do jo oko ot i tempulo ka Baal di kiko rete piny; kingingido alutarin kede caljwogi kame oudo tie iye, di kiko neko Matan i nyim alutarin, en oudo ngasaseredoti ka Baal.

¹⁸ Yekoyada oko keto Josaseredoti kede Jolebi pi timo tic me tempulo. Gin oudo kipoore timo tic kame bin Abaka Daudi opoko negi, tic me mino giayala awanga but Rwot, bala kame kowandiko i Iswil ka Musa, di kiwero kede yomcuny bala kame Daudi oudo ociko.

¹⁹ En eko keto jodar irutei me tempulo, tetekeny kur ngatamoroni kopwokere dony iye.

²⁰ Di en karacel kede jotel me isirikalen, jopug, kede jopiny dedede, kiko nyamaro abaka kwanye ki tempulo tere i paco mere me abaka. Gin kibeo kede ki erute adwong di kiko tere kikete i kom mere me ajakanut.

²¹ Jo dedede oko bedo kede kilel di do bomba oko kwei ingei neko Atalia.