2 Iyutun 22 - Baibuli I Leb Kumam 2013

Abaka Akasia me Yuda

¹ Jo me Yerusalem bin oko keto Akasia wot ka Yekoram atidi pi lunyo wang papa mere bala abaka. Gin kitimo kamanono pien joyak koudo obino kede imuarabun bin oko neko awobe mege adongo dedede. Aso, Akasia wot ka Yekoram bin oko doko abaka me Yuda.

² Mwakini me dongo ka Akasia oudo tie ot ongwon kiwie are i kare kame bin en ecako kede pug. En eko pug i Yerusalem pi mwaka acel. Nying toto mere oudo Atalia, akwar Omiri.

³ Eda bin eko lubo ikiteso me jo me ot ka Akab, pien toto mere en kame bin obedo mine tam me timo gikareco.

⁴ En eko timo gikarac i nyim Rwot, bala kame jo me ot ka Akab bin otimo, pien ingei to ka papa mere, jo me ot ka Akab en oko doko jo kame mie tam, di gin kiko dubo tic mere.

⁵ En eko lubo tam kame gin kimie, di eko ot kede Yekoram wot ka Abaka Akab me Isirael pi yi kede Abaka Kasael me Siria i Ramot Gilead. Jo me Siria oko mino Yoram awanon,

⁶ di en eko dok i bomba me Jeserel pi udo cango me aporeso mege. Di Akasia wot ka abaka Yekoram me Yuda oko ot bute kunono pi nene.

⁷ Do Rubanga oudo otieko iiko be to ka Akasia poore wok i yore me en ot welao Yoram. Pien kakame en etuno kede kunono, en eko upere kede Yoram pi ot riamo kede Yeku wot ka Nimisi, ngat kame Rwot oudo otieko yero pi muducaro jo me ot ka Akab.

⁸ I kare kame Yeku oudo tie cobo kede kop kame Rubanga ongolo i kom jo me ot ka Akab, en eko riamo kede jotel me Yuda kede awobe me imiegu ka Akasia, kame bin timo tic ne Akasia, di en eko neko gi.

⁹ Jo ka Yeku oko mono Akasia, di gin kiko ude etie pwono Samaria. Gin kiko tere but Yeku di kiko neke. Gin kiko yike, pien gin kiwaco be, “En ebedo akwar Yekosapat, ngat kame bin obedo timo gikame Rwot mito kede cunye lung.” Likame oudo tie ngatamoro kikom jo me diakal ka Akasia kodong kame oudo karuno pug bala abaka.

Atalia Abaka Adako me Yuda

¹⁰ Kakame toto me Abaka Akasia owinyo kede be koneko wode, en eko cako neneko jo dedede me diakal ka abaka me Yuda.

¹¹ Yowasi wot ka Akasia kenekene en oko bwot. En oudo koyapuno neke kede imiegu mege ace, do waa mere Yekoseba en oko kwale kikom idwe ka abaka. Yekoseba oudo obedo nyar ka Abaka Yekoram, amin me Akasia atoti gi kede obedo mon nyek, doko en oudo ebedo dako me ngasaseredoti. En ekwalo Yowasi di eko kane kede ngapidi mere i agola me buto koudo tie i tempulo ka Rwot, tetekeny Atalia kur tim ne gimoro.

¹² Yekoseba oko bedo kano atin nono i tempulo pi mwakini kanyape, di Atalia tie pug bala Abaka adako.