2 Iyutun 18 - Baibuli I Leb Kumam 2013

Enabi Mikaya Okwenyaro Akab

¹ Abaka Yekosapat bin oko baro adikinicel, doko da bin jo oudo wore. En bin eko timo iik me nyom i dierediere me dano me ode kede me ot ka Abaka Akab.

² Ingei mwakini mogo Yekosapat oko bin ot Samaria pi welao Akab. Akab bin oko neko ne karacel kede jo kame oudo eupere kede twon romini kede twonin. Akab oko supo cunye pi kodere kede en ot suro bomba me Ramot atie Gilead.

³ Akab oko penyo Yekosapat be, “Ibino ot keda suro Ramot?” Yekosapat oko dwoko be, “Ango kede in wan acel; isirikalen nango obedo megi. Wan obino upere kedi ot yi.

⁴ Do ber kong peny tam ka Rwot.”

⁵ Di abaka me Isirael oko coko inabin aromo bala tol ongwon karacel, di eko penyo gi be, “Aoti asur Ramot arabo aweki?” Gin kiko dwoko ne be, “Oti isure, pien Rubanga bino mine i cingi.”

⁶ Do Yekosapat oko penyo be, “Benyo, likame doko tie enabi moro ace kame otwero penyo tam ka Rwot kibute?”

⁷ Akab oko dwoko be, “Tie pwodi acel kodong kame otwero penyo tam ka Rwot kibute, en Mikaya wot ka Imila; do cunya dage, piento en emurao nango kope areco kenekene.” Yekosapat oko dwoko be, “Abaka, likame ipoore yamo kamano.”

⁸ Akab oko lwongo ngatic acel di eko waco ne be, “Oti ikel Mikaya wot ka Imila awakawaka.”

⁹ Abaka Akab kede Abaka Yekosapat me Yuda oudo tie bedo i komini me pug di kingapo ikanson gi me ajakanut; oudo kitie i laru me canyo atie i nget erute me Samaria. Inabin oudo tie waco negi gikame Rwot owaco.

¹⁰ Esedekia wot ka Kenana oko timo cal me tung le me nyonyo ayon, di eko waco be, “Rwot owaco be, ‘Ibino suro jo me Siria di iko muducaro gi bala le atie kede tunge kacal kamagonogi.’ ”

¹¹ Inabin apat dedede oudo tie yamo kop acel nono be, “Oti isur Ramot, ibino bwono yi; Rwot bino mine i cingi.”

¹² Ngaor koudo ooto lwongo Mikaya oko waco ne be, “Neningo, inabin dedede tie yamo kiber i kom abaka be ebino bwono yi, ida oti iyam kop acal bala mergi.”

¹³ Do Mikaya oko waco be, “Alairo i nying Rwot kakuo be ango abino waco gikame Rwot oyamo na.”

¹⁴ Kakame en etuno kede but abaka Akab, en eko penye be, “Mikaya, benyo, oot suro Ramot arabo oweki?” Mikaya oko dwoko be, “Otunu isurenu, ibinunu bwono yi; Rwot bino mine i cingu.”

¹⁵ Do Akab oko dwoko be, “Ka itie yamo keda i nying Rwot miero iwac kop me ateni; apoore waco ni manoni tien adi?”

¹⁶ Di Mikaya oko waco be, “Aneno di isirikalen me Isirael osasarun i wi moru, bala romini kame ngakwat gi li; di Rwot oko waco be, ‘Jogi li kede ngadwong gi, poore ngat acelacel ot ture kede mulem.’ ”

¹⁷ Akab oko waco ne Yekosapat be, “Mam oudo ango awaco ni be en likame ewaco nango kope abeco, do kwanyo kenekene kope me can?”

¹⁸ Di Mikaya oko meede be, “Nan winy gikame Rwot tie waco! Ango aneno di Rwot tie bedo i kom mere me ajakanut i malo, di imalaikan tie cungo i ngete tuni kede tuca.

¹⁹ Di Rwot oko waco be, ‘Ngai kame bino ngalao Akab tetekeny eot Ramot di oko neke iye?’ Di imalaikan oko donyo yamo, man yamo kop ni, maca da yamo kop ca,

²⁰ tuno di tipo moro oko ot anyim but Rwot di eko waco be, ‘Ango abino ngale.’ Rwot oko penye be, ‘Ibino ngale benyo?’

²¹ En eko dwoko be, ‘Ango abino ot di ako mino inabin ka Akab ngale.’ Di Rwot oko waco be, ‘Oti ingale; manono bino twerere.’ ”

²² Mikaya oko jiko be, “Aso neningo, Rwot oketo tipo me angalo i dog inabin ni nogi dedede; en etieko iiko pi mino can poto i komi!”

²³ Di enabi Esedekia oko ot but Mikaya di eko bape i wange di epenye be, “Awene en kame tipo ka Rwot oweka kede di eko cako yamo kede in?”

²⁴ Mikaya oko dwoko be, “In ibino ngeno awene inonono i ceng kame in ibino ot pwono kede i agola me tielo.”

²⁵ Di Abaka Akab oko mino cik but ngatic mere acel be, “Mak Mikaya iko dwoke but Amon ngaloc me bomba, kede but Yowasi wot ka abaka,

²⁶ di iko waco negi pi rwake i otkol di oko donyo mine mugati kede pii kenekene tuno di ango adwogo kede mulem.”

²⁷ Mikaya oko waco be, “Ka in iko dwogo kede mulem, udo likame Rwot oyamo kibuta.” Di eko waco be, “Wun jo dedede winyunu gikame ango atieko waco!”

To ka Akab

²⁸ Aso, Abaka Akab me Isirael kede Abaka Yekosapat me Yuda oko ot suro Ramot i Gilead.

²⁹ Di Akab oko waco ne Yekosapat be, “Ango abino jujulo koma di ako ot yi, do in ngap ekanso ni me ajakanut.” Aso, abaka me Isirael oko bono wange di eko ot yi.

³⁰ Abaka me Siria oudo omio cik but isirikalen ot adek kiwie are, gin en jodongo me cabalan me yi be, “Kur i yiunu kede dano moro ace atitidi amoto adwong, do kenekene kwanyo abaka me Isirael.”

³¹ Aso kakame gin kiko neno kede Yekosapat, gin kiko waco be, “Ateteni abaka me Isirael inononi.” Gin kiko lokere cako yi kede en. Do Yekosapat oko kok di Rubanga oko konye di eko mino joka olokere tenge kibute.

³² Jodongo me cabalan me yi oneno be manono oudo likame obedo abaka me Isirael di gin kiko jiko wape.

³³ Do sirikale moro me Siria oko gweno emal mere atatai, di winyo winyo eko ot cobo Akab i dierediere me nyonyo kame gagao kore kede nyonyo kame gagao kome, kame cal bala abokoya me aporogo. En eko koko but ngat kame riamo cabala mere be, “Lokere odok cen, pien kowana!”

³⁴ Yi oko meede dop kitek i ceng nono, di Abaka Akab oudo ogongere i cabala etie neno isirikalen me Siria. Di do eko to otieno di ceng tie donyo.