2 Iyutun 17 - Baibuli I Leb Kumam 2013

Yekosapat Odoko Abaka

¹ Yekosapat oko lubo tien papa mere Asa bala abaka di eko guro tiene ne jo Isirael.

² En eko cibo isirikalen i bomban kame kocelo kede apama atek me Yuda, kede i calere mege, kede i bomban me Epuraimu kame Asa oudo omao.

³ Rwot oko bedo tie kede Yekosapat piento en oudo elubo ikiteso kame papa mere obedo tie kede i kare mere me agege di likame eko woro Baal.

⁴ En etio ne Rubanga ka papa mere, di eko lubo cik mege, di likame eko bedo kede tim me jo me Isirael.

⁵ Pi manono, Rwot oko mino apugan mere ocungo di tek i ajakanut me Yuda. Jo dedede me Yuda oko donyo tero ne giamia, di en eko doko dano kobaro twatwal kede kame koworo.

⁶ Cunye oudo tie i lubo yote ka Rwot; medo i wi manono en bin eko dudubo kabedere me woro rubangan i Yuda, kede ipirin kame cungo pi rubanga adako anyinge Asera.

⁷ I mwaka me adek me apugan mere, en bin eko cwano jotic mege adongo pi ot pwony i bomban me Yuda; magonogo oudo obedo Benekail, Obadia, Sakaria, Netanel, kede Mikaya.

⁸ Bin Jolebi kanyangon kede josaseredoti are oko upere kede gi. Jolebi nogo gin en Semaya, Netania, Sebadia, Asakel, Semiramot, Yekonatan, Adoniya, Tobija, Tobadoniya; josaseredoti oudo obedo Elisama kede Yekoram.

⁹ Gin kiko tero Itabu me Iswil ka Rwot di kiko ririmo bomban dedede me Yuda, di kipwonyo kop mere but jo.

Dwongo ka Yekosapat

¹⁰ Ajakanuto dedede me lobere koluko Yuda likame oko copo yi kede Yekosapat pien oudo kitie kede lworo i kom Rwot.

¹¹ Jo mogo me Pilistia oko tero ne Yekosapat siliba atot kede giamia ace apat, kede imuarabun mogo oko tero ne imerekekin tutumia kanyaare kede tol kanyaare (7,700) kede ikoroi da tutumia kanyaare kede tol kanyaare (7,700).

¹² Yekosapat oko meede ameda doko tek. En eko celo bomban kede apamai atek kede eko gero bomban i Yuda kakame oudo kogwoko iye jamini atot.

¹³ En eko timo tice adongodongo i bomban me Yuda. Bin eko cibo i Yerusalem isirikalen atek yi.

¹⁴ Di lubere kede ude ka joakwari gi gin oudo ige: Adana oudo obedo ngadwong me isirikalen kowok ki miere me ekeko ka Yuda. En oudo elo isirikalen tutumia tol adek (300,000).

¹⁵ Ngat koudo lubo tiene en Yekokanan, en oudo elo isirikalen tutumia tol are kede ot kanyauni (280,000),

¹⁶ di do dano me adek i dude en oudo Amasia wot ka Sikiri, en oudo ejalere kene pi timo tic ka Rwot; en oudo elo isirikalen tutumia tol are (200,000).

¹⁷ Eliada en oudo obedo ngadwong me isirikalen kobedo jo me miere me ekeko ka Benjamin, en oudo ebedo ngayi atek; oudo elo isirikalen tutumia tol are (200,000) amako ibukui kede imalia.

¹⁸ Ngat koudo lubo tiene en Yekosabad; en oudo elo isirikalen tutumia tol acel kede ot kanyauni (180,000) kotieko iikere pi yi.

¹⁹ Isirikalen nogi oudo timo ne abaka tic i Yerusalem; medo i wi magonogi en doko bin eko cibo isirikalen ace i bomban ace me Yuda kame kocelo kede apama atek.