2 Iyutun 16 - Baibuli I Leb Kumam 2013

Peko kede Lobo me Isirael

¹ I mwaka me ot adek kiwie kanyape me apugan ka Abaka Asa me Yuda, Abaka Basa me Isirael oko suro Yuda, di eko cako luko bomba me Rama kede apama atek, pi gengo jo donyo Yuda but Abaka Asa, kede wok kiye.

² Di Asa oko kwanyo siliba kede saabu dedede ki tempulo kede ki ot ka abaka, di eko cwano gi but Abaka Benekadad me Siria, kame oudo bedo Damasiko, kede kop kame waco be,

³ “Poore wan okodere kedi, bala kame bin papa na kede papa ni otimo. Nan ango acwao ni siliba kede saabu noni bala giamia buti. Oti itur kodere ni kede Abaka Basa me Isirael, tetekeny ekaruno kwanyo isirikalen mege ki adul na.”

⁴ Benekadad oko winyo kop ka Abaka Asa, di eko cwano isirikalen mege suro bomban me Isirael. En eko mako bomban me Iyon, Dan, Abel Bet Maka, kede bomban dedede me Naputali kakame oudo kogwoko iye jamini.

⁵ Kakame Basa owinyo kede kop nono, en eko jiko gero bomba me Rama di tic nono oko cungo.

⁶ Di Abaka Asa oko coko jo me Yuda dedede di eko mino gi kwanyo ki Rama kide dedede kede ibaon kame Basa oudo tie tic kede me gedo. Abaka Asa oko tic kede gi me gero bomban me Geba kede Misipa.

Enabi Kanani

⁷ I kare nono enabi Kanani oko ot but Abaka Asa di eko waco ne be, “Pi kite kame in iketo kede gen ni i kom abaka me Siria akaka keto gen ni i kom Rwot Rubanga ni, manono omio Isirikalen me Isirael obwot kibuti.

⁸ Benyo, mam Abisinia kede Libiya oudo tie kede twon isirikalen kede cabalan kede isirikalen me tien? Do pi kite kame in oudo iko geno kede Rwot, en eko mini gin dedede i cingi.

⁹ Wang Rwot ngio wi lobo lung, pi mino teko but jo kame cuny gi ateteni tie i kome. In itieko timo tim me mingo, doko cako nataman ot anyim in ibino bedo yi nakanaka.”

¹⁰ Di Asa oko doko ger ne enabi nono di eko mino kotwee kede eriko i otkol. Cako i kare nono Asa di do oko cako bedo kede tim me gero but jo.

Ajikini me Apugan ka Asa

¹¹ Gi dedede ace kame Asa otimo, cako ki agege tuno i ajikini, kowandiko gi i Itabu me Itatam amako Abakai me Yuda kede Isirael.

¹² I mwaka me ot adek kiwie kanyangon me apugan mere, tuwo bin oko mako tien Asa di tuwo nono oko cere ne; do akadi i kare me tuwo mere nono da, en likame eko lokere but Rwot, do eko lokere ot but imuroko.

¹³ Asa di do oko to i mwaka me ot ongwon kiwie acel me apugan mere.

¹⁴ Bin oko yike i ates mere kame oudo ekunyo i lela i Bomba ka Daudi. Bin oko tic kede moe kede jamini angwe kur me temuno kome pi ayika, di oko moko twon mac me koke.