2 Iyutun 13 - Baibuli I Leb Kumam 2013

Yi ka Abija kede Yeroboam

¹ I mwaka me tomon kiwie kanyauni me apugan ka Abaka Yeroboam wot ka Nebat me Isirael, Abija oko doko abaka me Yuda,

² di eko pug ki Yerusalem pi mwakini adek. Toto mere oudo nyinge Mikaya nyar ka Uriel, me bomba me Gibea. Yi bin oko cakere i dierediere ka Abija kede Yeroboam.

³ Abija oko coko isirikalen aromo tutumia tol ongwon (400,000), di Yeroboam oko ot pi riamo kede en kede isirikalen mege atek yi tutumia tol kanyauni (800,000).

⁴ Abaka Abija oko ot i wi moru me Semaraim i piny me imukuran me Epuraimu, di eko waco be, “Winyanu, in Yeroboam kede jo dedede me Isirael!

⁵ Benyo, likame ingeunu be Rwot Rubanga me Isirael otimo isikan kalikame tur kede Daudi pi mine, en kede ikwae mege, pugo Isirael nakanaka?

⁶ Do in Yeroboam wot ka Nebat, in oudo ibedo ngatic ka Sulumani, do iko jemo ne.

⁷ Kicen mere di Rekoboam odoko abaka, in iko coko jo atie kede iponeso areco di kony gi li pi gangi, di ikounu ot titiso Rekoboam, di en oudo pwodi etitidi likame engeo epone me gengo wu.

⁸ Nan in itie mito yi kede apugan kame Rwot omio ikwae ka Daudi, be pien in itie kede twon ekodet me isirikalen kede idwe twonin kame Yeroboam otimo ne wu pi bedo rubangan wu.

⁹ Ber kong itieko da riamo tenge josaseredoti ka Rwot, gin ikwae ka Aaron, kede Jolebi, di in iko yero josaseredoti nin pi lunyo wang gi bala kame atekerin apat timo. Ngatamoroni kenekene kame oudo bino kede twon amoto imerekekin kanyaare oudo kokwere edoko ngasaseredoti me gi kalikame obedo rubangan.

¹⁰ “Do wan Rwot en kobedo Rubanga wa, doko da wan likame otieko weke. Josaseredoti kobedo ikwae ka Aaron en kame timo ne Rwot tic, di Jolebi en kame konyo gi.

¹¹ Gin kiyalo ne Rwot odiko acelacel kede otieno acelacel giayala me odok angwe kur kede giayala awanga me leini. Kimio Rwot giayala me mugati i wi emesa kame kolonyo, di buli otieno acelacel kiko cwicwinyo italan atie i icegeren kame kotimo kede saabu. Wan nakanaka olubo gikame Rwot Rubanga wa mito ne wa timo, do wun itiekunu weke.

¹² Rubanga kikome en obedo ngatel wan, doko da josaseredoti mege tie cuto kede agwarai me akuta pi lwongo wa cako yi kede wu. Wun jo me Isirael, kur iyiunu kede Rwot, Rubanga ka joakwari wu! Likame ibinunu twero bwono yi!”

¹³ I esawa nono Yeroboam oudo ocwao isirikalen mege ooto luko isirikalen me Yuda ki cen ngei gi, di apat mege odong i nyim gi.

¹⁴ Jo me Yuda oko lokere di kiko neno di isirikalen mogo tie cen ngei gi, kede doko di apat mege da tie i nyim gi. Gin kiko kok but Rwot di josaseredoti oko kuto agwarai.

¹⁵ Di jo me Yuda oko woo kitek woo me yi, di Abija en koudo telo gi. Gin kiko yi di Rubanga oko mino gi kibwono Yeroboam kede isirikalen me Isirael.

¹⁶ Jo me Isirael oko cako ringo tenge kibut jo me Yuda, di Rubanga oko mino gi i cing jo me Yuda.

¹⁷ Abija kede isirikalen mege oko bwono gi bwon arac; oko neko kikom gi isirikalen tutumia tol kany (500,000) atek yi.

¹⁸ Aso, jo me Yuda bin oko bwono jo me Isirael, pien gin oudo kigengere i kom Rwot, Rubanga ka joakwari gi.

¹⁹ Abija oko donyo wapo Yeroboam di eko mane bomban me Betel, Yesana, Epuron, karacel kede calere atie i nget bomban nogo dedede.

²⁰ Yeroboam likame doko oko catuno doko tek i kare ka Abija. I ajikini Rwot oko rete piny di eko to.

²¹ Do Abija oko meede doko tek; en oudo etie kede mon tomon kiwie ongwon, eko nywalo awobe ot are kiwie are kede anyira tomon kiwie kanyape.

²² Kope ace amako Abija, iponeso mege kede gikame etimo, gin dedede kowandiko gi i Itatam ka Enabi Ido.