2 Iyutun 12 - Baibuli I Leb Kumam 2013

Misiri Osuro Yuda

¹ Kakame apugan ka Rekoboam otieko sipakin kede, di en eko doko tek, en karacel kede jo dedede me Isirael kiko weko lubo Iswil ka Rwot.

² I mwaka me kany me apugan ka Rekoboam, bin kiko udo alola pi kite kalikame kibedo kede genere but Rwot. Abaka Sisak me Misiri bin oko suro Yerusalem

³ di oudo eoto kede cabalan tutumia acel kede tol are (1,200), kede isirikalen aringo kede asigiran tutumia ot kanyape (60,000). Isirikalen kalikame marere me Libiya, Sukot, kede Abisinia oupere bino kede en.

⁴ En eko mano bomban me Yuda kame kocelo kede apama, di do eko tiro nyime ot Yerusalem.

⁵ Enabi Semaya oko ot but Abaka Rekoboam kede jotel me Yuda koudo ocokere Yerusalem pi lworo Sisak; pien Sisak oudo owaco negi be, “Rwot tie waco ne wu be, ‘Wun iwekanu, nan ada atieko weko wu i cing Sisak.’ ”

⁶ Di do jotel kede abaka oko mwolere di kiko waco be, “Rwot tie timo gikame tie kakare.”

⁷ Kakame Rwot oneno kede be oudo kimwolere, en eko waco ne Semaya be, “Gin kitieko mwolere; likame abino muducaro gi, abino mino gi kibwot winyo winyo; likame abino jalakino lilo na i kom Yerusalem ki cing Sisak,

⁸ do Sisak bino bwono gi, di gin kiko bino ngeno apokapoka atie i dierediere me tic pira kede tic ne abakai me wi lobo.”

⁹ Abaka Sisak oko ot Yerusalem di eko tero jamini abeco dedede kame oudo tie i tempulo kede i paco me abaka. En etero jamini dedede ribo kiton ibukui me nyonyo saabu kame Sulumani oudo otimo.

¹⁰ Pi lunyo wang gi, Rekoboam oko timo ibukui me nyonyo buronsi di eko keto i cing jodar koudo daro irutei me paco mere me abaka.

¹¹ Tek kame abaka oudo tie ot i tempulo, jodar oudo mako ibukui nogo i cing gi, ingei manono kiko dwoko gi i agola me dar.

¹² Pi kite kame bin en eko mwolere kede but Rwot, lilo ka Rwot likame bin oko poto i kome pi muducaro en atwal atwala; doko da kuo i Yuda oudo likame rac.

Kope Acegocego amako Apugan ka Rekoboam

¹³ Aso, Abaka Rekoboam oko sipakin Yerusalem di eko pug. I kare kame ecako kede pug mwakini me dongo mere oudo tie ot ongwon kiwie acel; en eko pug pi mwakini tomon kiwie kanyaare di etie Yerusalem, en bomba kame Rwot oudo oyero ki lobo me Isirael dedede pi jo wore kiye. Toto me Rekoboam oudo nyinge Naama, dako me lobo me Amon.

¹⁴ En bin eko timo gikame rac, piento likame etamo pi mono gikame Rwot oudo mito.

¹⁵ Tice ka Rekoboam, cako ki agege tuno i ajikini, ribo kiton itatam amako wapere me wok me diakal mere, gin dedede kitie i Itatam ka Enabi Semaya kede i Itatam ka Enabi Ido. Rekoboam kede Yeroboam bin oko bedo yi nakanaka.

¹⁶ Rekoboam oko to di oko yike i nget joakwari mege i Yerusalem, di wode anyinge Abija oko lunyo wange bala abaka.