2 Iyutun 11 - Baibuli I Leb Kumam 2013

Kop kame Semaya Omurao

¹ Kakame Rekoboam otuno kede Yerusalem, en eko coko jo dedede me ekeko ka Yuda kede me ka Benjamin, gin dedede isirikalen atek tutumia tol acel kede ot kanyauni (180,000). En oudo emito ot yi kede atekerin atie i bad tetu malo pi dwoko gi i loc mere.

² Do Rubanga oko waco ne enabi Semaya

³ pi ot waco ne Abaka Rekoboam me Yuda, en wot ka Sulumani, kede ne jo dedede me ikekon ka Yuda kede me ka Benjamin be Rwot owaco be,

⁴ “Kur isurunu joawade wu, gin jo me Isirael; wun dedede dokunu i miere wu, pien gi kotimere obedo iik nango.” Aso, gin kiko yei winyo kop ka Rwot di kiko dok i miere gi.

Rekoboam Ocelo Bomban kede Apama Atek

⁵ Rekoboam oko dong bedo Yerusalem, di eko gero bomban kame kocelo kede apama atek i Yuda pi gwoko mulem.

⁶ En egero bomban me Betelem, Etam, Tekoa,

⁷ Betesur, Soko, Adulam,

⁸ Gat, Maresa, Sip,

⁹ Adoraim, Lakis, Aseka,

¹⁰ Sora, Aijalon, kede Keburon.

¹¹ En eko celo gi kede apama atek, di eko keto ngadwong me isirikalen i buli bomba acelacel, kede cam, kede mo me olibeti, kede bwini,

¹² kede da ibukui adongodongo kede tongini, di eko mino gi kibedo di kitek. Iepone noni adulion me Yuda kede Benjamin bin oko dong i loc mere.

Josaseredoti kede Jolebi Obino Yuda

¹³ Ki adulion dedede me Isirael, josaseredoti kede Jolebi oko bino Yuda but Rekoboam.

¹⁴ Jolebi oweko lobo gi amako gi di kiko bino Yuda kede Yerusalem, pien Abaka Yeroboam me Isirael kede abakai ace kolunyo wange oudo likame oyei ne Jolebi timo tic gi bala josaseredoti ka Rwot.

¹⁵ Yeroboam bin oyero josaseredoti mege amake di eko mino gi tic i abilan, kede woro jwogi acal bala diegi, kede caljwogi koudo obedo idwe twonin kame en oudo ecweo.

¹⁶ Jo dedede me ikekon apapat me Isirael kame cuny gi oudo tie i woro Rwot Rubanga me Isirael oko gida wapo gi Yerusalem kunono, tetekeny kimi giayala but Rwot, en Rubanga ka joakwari gi.

¹⁷ Manoni bin oko mino ajakanut me Yuda odoko tek. Pi mwakini adek gin bin kiko mino Rekoboam wot ka Sulumani obedo di ilajara, pien gin oudo kibedo kede wor bute bala kame oudo kibedo kede wor but Abaka Daudi kede Sulumani.

Jo me Ot ka Rekoboam

¹⁸ Rekoboam bin oko nyomo Makalat, en nyar ka Yerimot wot ka Daudi; toto me dako mere nono en oudo Abikail nyar ka Eliab wot ka Yese.

¹⁹ Gin bin kiko nywalo awobe adek: Yeus, Semaria, kede Sakam.

²⁰ Kicen mere en bin eko nyomo Maka, nyar ka Abisolom, di kiko nywalo idwe awobe ongwon: Abija, Atai, Siisa, kede Selomit.

²¹ Ka koriribo dedede, Rekoboam oudo tie kede mon tomon kiwie kanyauni kame enyomo, kede ot kanyape kame ebedo kede gi nono. Oudo eko nywalo awobe ot are kiwie kanyauni kede anyira ot kanyape. Kikom mon mege nogo dedede, oudo emaro Maka kalamo icegun.

²² Rekoboam bin oko cibo Abija wot ka Maka bedo ngat alo imiegu mege, pien tam meren oudo mito be Abija dok abaka.

²³ En bin eko bedo kede rieko di eko popoko awobe mege i adulion atitino dedede me Yuda kede Benjamin, i bomban dedede kame oudo kocelo kede apama. En bin eko mino gi jamini atot, di eko nyomo negi da mon atot.