2 Iyutun 1 - Baibuli I Leb Kumam 2013

Abaka Sulumani Okwao be Mie Rieko

¹ Sulumani wot ka Daudi bin oko sipakin i ajakanut mere me Isirael; Rwot Rubanga mere oudo tie kede en, di eko mine emeede ameda doko tek.

² Sulumani bin oko lwongo jo dedede me Isirael, jotel me ikodeta me isirikalen atie tutumia acel tutumia acel, kede atie tol acel tol acel, jongolkop, jotel me Isirael, jotel me miere, kede jo dedede.

³ Di Sulumani kede jo dedede oko ot Gibeon kakame koworo kiye Rwot, pien Eema ka Rwot oudo tie kunono, eema kame bin Musa ngatic ka Rwot otimo i wi tim.

⁴ (Do Sanduku me Isikan oudo tie Yerusalem i eema kame Daudi oudo ogero kunono kakame edwoke kede ki Kiriat Yearim.)

⁵ Alutari me nyonyo buronsi kame Basalel wot ka Uri, akwar Kur oudo otimo oudo da tie i nyim Eema ka Rwot. Abaka Sulumani kede jo dedede oko woro Rwot ki kanono.

⁶ Sulumani oko ot i alutari me nyonyo buronsi nono koudo tie i nyim Rwot i Eema, en eko mino giayala awanga me leini tutumia acel (1,000) i wie.

⁷ Iwor nono Rubanga oko neeno but Sulumani di oko waco ne be, “Penya gikame apoore mini.”

⁸ Sulumani oko waco ne Rubanga be, “In itieko nyuto amara adwong kalikame lokere but papa na Daudi, di iko mina alunyo wange bala abaka.

⁹ Okwe Rwot Rubanga, ango akwai imi cikere ni but papa na Daudi nan cobere, pien in iketa bedo abaka me jo atot bala asinge.

¹⁰ Aso, nan mia rieko kede ngec me pugo jo nogi, pien ngai kame twero pugo twon jo ni nogi?”

¹¹ Rubanga oko dwoko ne Sulumani be, “Pien manoni obedo gikame tie i cunyi, di likame iko kwano jame, abar, wor kibut jo, to me jo kame in idagi; doko da likame iko kwano pi kuo ni bedo pi kare alac, do in iko kwano pi bedo tie kede rieko kede ngec tetekeny ikaruno pugo jo kame ango aketi bedo abaka gi,

¹² nataman ango abino mini rieko kede ngec. Doko da abino mini abar, jamini, kede wor kalikame abaka moro lem otieko bedo tie kede i kare kokato, arabo kame abaka moro me kare me anyim bino bedo tie kede.”

Abar kede Teko ka Abaka Sulumani

¹³ Sulumani bin oko yai ki kabedo me woro Rubanga i Gibeon, ki Eema ka Rwot, di eko dok Yerusalem. En eko donyo pugo Isirael.

¹⁴ Sulumani bin ocoko cabalan me yi tutumia acel kede tol ongwon (1,400), kede asigiran tutumia tomon kiwie are (12,000), kame bin en eko cibo i bomban apapat, kede ace en bin eko dong kede gi i Yerusalem.

¹⁵ I kare me apugan mere, Abaka Sulumani bin oko mino siliba odure Yerusalem bala kide, kede ebao me yat seda en eko mino obedo tot atatai bala cukamori me dud mori.

¹⁶ Asigiran ka Sulumani bin kokelo ki Misiri kede ki Kue; jocat wil ka abaka bin wilo gi awila ki Kue.

¹⁷ Cabala bin kotwero kelo ki Misiri i wel me siliba akaya tol kanyape (600), do asigira acel bin kokelo i wel me siliba tol acel kede ot kany (150). Jocat wil me abaka da ko bin cato gi but abakai dedede me jo Kiti kede but abakai me Siria.