2 Abakai 9 - Baibuli I Leb Kumam 2013

Kowiro Yeku pi doko Abaka me Isirael

¹ Di enabi Elisa oko lwongo ngat acel kikom ekodet me inabin di eko waco ne be, “Iikere iko ot Ramot i Gilead. Mak cupa me mo me olibeti,

² di ka ituno kunono iko mono Yeku wot ka Yekosapat, wot ka Nimisi, di iko kwanye kibut jo icegun iko tere i agola moro atie kene.

³ Di do iko kwanyo cupa me mo iko onyo mo i wie di iwaco ne be, ‘Rwot owaco be en ewiri pi doko abaka me Isirael.’ Di do in iko bino yabo ekeko iko ringo, kur idong wiwira.”

⁴ Aso, awobi enabi nono oko ot Ramot i Gilead.

⁵ En eko tuno kunono di jodongo me isirikalen oudo tie i cokere di eko waco be, “Adwong, ango akelo ni kop.” Yeku oko penye be, “Ne ngai kikom wa?” En eko dwoko be, “Ne in.”

⁶ Di gin jo are nogo kiko ot i agola di awobi enabi nono oko onyo mo i wi Yeku di ewaco ne be, “Rwot Rubanga me Isirael waco be, ‘Ango awiri pi doko abaka ka jo na me Isirael.

⁷ Ibino wearo jo me ot ka ngadwong ni Akab, tetekeny ango atim onyanga i kom Jesebel pi onyo remo me inabin jotic na, kede me jotic na ace apat.

⁸ Jo dedede me ot ka Akab miero koneki; cuo kede awobe dedede me ot ka Akab, ipasoi kede jo kalikame obedo ipasoi, gin dedede miero rweny tenge i Isirael.

⁹ Ango abino mino ot ka Akab doko cal bala ot ka Yeroboam wot ka Nebat, kede bala ot ka Basa wot ka Akija.

¹⁰ Igwogin en kame bino camo Jesebel i adul me Jeserel, likame ngatamoro bino yike.’ ” Ingei yamo manono, awobi enabi nono oko yabo ekeko di eko ringo.

¹¹ Kakame Yeku oko dok kede but isirikalen jodongo icegun, gin kiko penye be, “Tie gimoro arac? Apoi no oudo obino buti pinyo?” En eko dwoko be, “Wun ingeunu wie kede yamo mere da.”

¹² Gin kiko dwoko ne be, “In itie ngalo! In wac ne wa gikame ewaco ni!” En eko waco negi be, “En ewaco na be Rwot owaco be, ‘Ango awiri pi doko abaka me Isirael.’ ”

¹³ Cucuto gin kiko gonyo igoen gi di kiko peto gi i kayito malo i ot; di kiko donyo kuto agwara di kiwaco be, “Yeku en abaka.”

Koneko Abaka Yoram me Isirael

^14-15 Di Yeku oko bedo kede iik arac i kom Abaka Yoram. Abaka Yoram oudo tie Jeserel kakame oudo eoto cango kiye pi awanon kame eudo i Ramot i kare kame oudo etie yi kede Abaka Kasael me Siria. Aso Yeku oko waco ne jodongo me isirikalen jowote be, “Ka wun iganganu, nenunu be likame ngatamoro olwidar ki bomba kan eko tero rwonge noni Jeserel.”

¹⁶ Di do Yeku oko yito i cabala mere di eko ot Jeserel. Yoram oudo pwodi likame ocango, doko da Abaka Akasia me Yuda oudo tie kunono eoto pi nene.

¹⁷ Ngat kame kio piny koudo tie i wi gedo abor malo i Jeserel oko neno Yeku kede jo mege di kitie bino. En eko lwongere be, “Atie neno jo mogo tie bino.” Yoram oko waco be, “Cwai dano kede asigira pi penyo gi ka bino gi obedo me mulem.”

¹⁸ Aso dano acel oko ringo kede asigira ot riamo kede gi, di eko waco negi be, “Abaka mito ngeno ka bino wu noni obedo me mulem arabo li.” Yeku oko dwoko be, “Kop amako mulem likame maki! Dwog cen ngea.” Ngat koudo kio piny koudo tie i wi gedo abor malo oko lwongere di ewaco be, “Ngat kame ooro otuno kunono, do likame etie dwogo.”

¹⁹ Di oko bobo cwano dano ace, di en eko tuno but gi di eko waco negi be, “Abaka mito ngeno ka bino wu noni obedo me mulem arabo li.” Yeku oko dwoko be, “Kop amako mulem likame maki! Dwog cen ngea.”

²⁰ Ngat koudo kio piny oko bobo lwongere di ewaco be, “Ngat kame ooro otuno but gi, do eda likame etie dwogo. Ngatel me ekodet nono ineno bala Yeku wot ka Nimisi, pien etie ringo kede cabala bala ngat opoi.”

²¹ Yoram oko waco be, “Iikunu cabala na.” Di oko iiko ne cabala. Di do Abaka Yoram me Isirael kede Abaka Akasia me Yuda oko yai ot pi riamo kede Yeku, ngat acelacel i wi cabala mere. Gin kiko riamo kede en i poto koudo obedo me ka Nabot me Jeserel.

²² Kakame Yoram oneno kede Yeku, en eko penye be, “Manoni obedo bino me mulem?” Yeku oko dwoko be, “Mulem karuno bedo tie benyo di pwodi tim me woro caljwogi kede me jwok kame toto ni Jesebel oudo ocako pwodi tie meede?”

²³ Di do Yoram oko lelemo ne Akasia be, “Man obedo iik me mano loc,” di eko wiro wi cabala mere eko cako ringo.

²⁴ Yeku oko telo tol me emal mere kede teko dedede di eko gweno emal ocobo Yoram i dier ngee pelepel wok ki dog cunye. Yoram oko poto eko to i cabala mere.

²⁵ Yeku oko waco ne ngakonye anyinge Bidikar be, “Ting kome di iko uce i poto koudo obedo me ka Nabot me Jeserel. Yutuno be i kare kame ango kede in oudo otie ringo kede asigiran karacel i cen ngei Akab papa me Yoram, bin Rwot oko waco kope nogi be,

²⁶ ‘Nyoro ango aneno di koneko Nabot kede awobe mege. Ango akwongere be ida kobino neki i poto acel noni.’ Pi manono nan kwany kome di iko uce i poto ka Nabot di lubere kede kop kame Rwot oudo owaco.”

Koneko Abaka Akasia me Yuda

²⁷ Kakame Abaka Akasia oneno kede gi kotimere, en bin eko ringo edok i bad tetu bomba me Bet Kagan, do Yeku oko riamere kede en paka make di eko redo ne jo mege be, “Gweunu eda!” Gin kiko gwene di oudo etie i wi emukura ayito Gur, i nget bomba me Ibileam. Do en eko catakino ot paka tuno i bomba me Megido, kakame eko to iye.

²⁸ Jodongo me isirikalen mege oko keto kome i cabala di kiko dwoke Yerusalem di oko yike i nget joakwari mege i Bomba ka Daudi.

²⁹ Akasia bin odoko abaka me Yuda i mwaka me tomon kiwie acel me apugan ka Yoram wot ka Akab bala abaka me Isirael.

Koneko Jesebel

³⁰ Yeku bin oko tuno Jeserel. Kite kame Jesebel oudo otieko winyo kede gi kotimere, en bin eko cilo abukewange di eko iiko yer wie di eko donyo ngino piny i dier bomba ki dirisa malo i paco me abaka.

³¹ Kakame Yeku oudo tie donyo kede ki erute, en eko lelemo ne be, “In ngat kame ibedo nganek bala Simiri, in ngat kame ineko ngadwong ni, ibino kan timo nyo?”

³² Yeku oko ngino malo i dirisa di eko lelemo be, “Ngai kame tie i bad na? Ngai?” Cuo aromo bala are amoto adek kobedo jotic me paco ka abaka oko rwako wi gi ki dirisa ngine.

³³ Di Yeku oko waco be, “Ucunu dako no piny.” Cuo nogo oko mako Jesebel di kiko uce piny, di remo mere oko kikirun i apama kede i kom asigiran. Yeku oko beo kede asigiran mege kede cabalan mege i kome,

³⁴ di eko donyo i paco me abaka di eko cam. Ingei manono en eko waco be, “Terunu kom dako kame kolamo no ikounu ot yike, piento en ebedo nyar ka abaka.”

³⁵ Do cuo koudo ooto pi yike oko udo cogo me wie kede tiene kede cinge kenekene.

³⁶ Kakame gin kiko waco ne kede Yeku kop nono, en eko waco be, “Manoni en gikame Rwot oudo owaco i dog ngatic mere Elia dano me Tisibe be, ‘Igwogin bino camo kom Jesebel i Jeserel;

³⁷ kom Jesebel bino wewelun kunono bala woyo, di likame ngatamoro ko bino karuno ngeno be Jesebel inonono.’ ”