2 Abakai 8 - Baibuli I Leb Kumam 2013

Dako me Sunem Odok

¹ Elisa oudo owaco ne dako me Sunem koudo en eyaruno wode be, “Yai kede jo me odi ikounu ot bedo karamoroni, pien Rwot tie cwano kec i lobo noni pi mwakini kanyaare.”

² Aso, dako nono oko bin yai bala kame Elisa oudo owaco ne; en bin eko ot bedo i lobo me Pilistia pi mwakini kanyaare.

³ I ajikini me mwakini kanyaare, en eko dwogo i Isirael di eko ot but abaka pi penye pi dwoko ne ode kede lobo mere.

⁴ En eko udo di abaka tie yamo kede Gekasi, en ngakony Elisa; abaka oudo mito ngeno kop i kom giaura kame Elisa timo.

⁵ Kakame Gekasi oudo tie tatamo ne kede abaka epone kame Elisa oyaruno kede dano oto, dako kame oudo koyaruno wode nono di oko waco koko mere ne abaka. Gekasi oko waco ne abaka be, “Adwong, dako nono ine, doko wode kame Elisa oyaruno da ine!”

⁶ Abaka oko penyo dako nono kop kame Gekasi owaco ne, di dako nono oko yei be oudo etimere kamanono. Di do abaka oko lwongo ngatic mere acel di eko waco ne pi mino dako nono gi dedede koudo obedo mege, ribo kiton cul kame poore pi poti mege pi mwakini kanyaare kame en etieko tenge.

Elisa kede Abaka Benekadad me Siria

⁷ Elisa oko ot Damasiko i kare kame abaka me Siria oudo tuwo kede. Kakame oko waco ne kede abaka be Elisa oudo tie kunono,

⁸ en eko waco ne Kasael be, “Ter ne enabi giamia di iko kwane pi penyo Rwot pi ngeno ka ango abino cango ki tuwo noni.”

⁹ Aso, Kasael oko ot pi riamo kede Elisa di etero giamia kobedo egere me jamini dedede me Damasiko, aguraguran ot ongwon atie kede mugugu i ngei gi. Kakame Kasael oko tuno kede but Elisa, en eko waco ne Elisa be, “Wodi Benekadad me Siria ocwaa buti pi penyo ka ebino cango ki tuwo mere.”

¹⁰ Elisa oko dwoko ne be, “Rwot otieko nyuto nango be ateteni ebino to, do ot iwac ne be ebino cango.”

¹¹ Elisa oko pedo wange ngino Kasael tuno lewic mako Kasael, di Elisa oko donyo koko.

¹² Kasael oko penyo Elisa be, “Adwong, itie koko pinyo?” Elisa oko dwoko be, “Pien ango angeo jamini areco kame in ibino timo ne jo me Isirael. Ibino wango apamai kame kocelo kede bomban gi, ibino neneko awobe gi, ibino nyinyilo idwe gi, kede ibino cocobo yi mon gi oyac di iko buluno gi.”

¹³ Kasael oko dwoko be, “Kom ango ogwok agwoka ni atwero timo gikame dwong rom kano benyo?” Elisa oko dwoko be, “Rwot onyuto na be in ibino doko abaka me Siria.”

¹⁴ Di do Kasael oko yai edok but ngadwong mere Benekadad, di en eko penye be, “Elisa owaco ni benyo?” En eko dwoko ne Benekadad be, “En ewaco na be ateteni ibino cango.”

¹⁵ Do ceng oko lubo mere, Kasael oko kwanyo esuka di eko rwake i yi pii di eko bono nyim abaka di eko genge wei tuno en to; Kasael oko lunyo kawange bala abaka.

Abaka Yekoram me Yuda

¹⁶ I mwaka me kany me apugan ka Abaka Yoram wot ka Akab bala abaka me Isirael, Yekoram wot ka Yekosapat oko doko abaka me Yuda.

¹⁷ Mwaka me dongo mere oudo tie ot adek kiwie are i kare kame edoko kede abaka, di eko pug pi mwakini kanyauni ki Yerusalem.

¹⁸ Dako mere oudo obedo nyar ka Akab, omio en eko lubo ikiteso areco me jo me diakal ka Akab kede me abakai ace me Isirael; en etimo gikame rac i nyim Rwot.

¹⁹ Do Rwot oudo likame oikere pi muducaro Yuda, piento en oudo ecikere but ngatic mere Daudi be ikwae mege bino dong pug nakanaka.

²⁰ I kare me apugan ka Yekoram, Edom oko jemo ne Yuda di gida kiko yero abaka gi amako gi.

²¹ Di Yekoram oko ngolo ooto Sair kede cabalan mege me yi. En eoto iwor pi suro jo me Edom, di jo nogo oko lukaro en karacel kede jodongo me isirikalen ayi kede cabalan. En kede jodongo mege me isirikalen kiko pikiro kiringo di isirikalen mege oko sasarun i miere gi.

²² Cako i kare nono tuno tin Edom oko bedo jemo ne apugan me Yuda. Bomba me Libina da oko jemo i kare acel nono.

²³ Gi ace dedede kame Yekoram otimo kowandiko gi i Itabu me Itatam amako Abakai me Yuda.

²⁴ Aso, Yekoram oko to di oko yike i Bomba ka Daudi, di wode Akasia oko lunyo wange.

Abaka Akasia me Yuda

²⁵ I mwaka me tomon kiwie are me apugan ka Yoram wot ka Akab bala abaka me Isirael, Akasia wot ka Yekoram oko doko abaka me Yuda,

²⁶ di oudo mwakini me dongo mere tie ot are kiwie are, di eko pugo Yerusalem pi mwaka acel. Toto mere oudo obedo Atalia, nyar ka Akab, akwar Abaka Omiri me Isirael.

²⁷ Eda bin eko lubo ikiteso me diakal ka Akab, di eko donyo timo gikame rac i nyim Rwot bala jo me diakal nono, piento en oudo ebedo or me diakal ka Akab.

²⁸ Abaka Akasia oko ribere kede Abaka Yoram me Isirael di kiko copo yi kede Abaka Kasael me Siria. Isirikalen oko riamo yi Ramot i Gilead di oko wanakino Yoram.

²⁹ En bin eko dok i bomba me Jeserel pi udo cango, di Abaka Akasia oko ot kunono pi nene.