2 Abakai 7 - Baibuli I Leb Kumam 2013

¹ Do Elisa oko dwoko be, “Winy kop kame Rwot tie waco! Rwot waco be: tuno diki esawa noni udo ibino twero wilo i Samaria kilo adek me engano apwot kede kilo kanyape me mawele pi siliba akaya acel kenekene.”

² Di sirikale kame oudo gwoko abaka oko waco be, “Bed bala Rwot cwai kot, do manono likame twero timere.” Do Elisa oko waco be, “In ibino neno kede wangi, do likame ibino bilo kiye gimoro.”

Isirikalen me Siria Oyai

³ Cuo ongwon kame oudo tie kede tuwo arac me delkom oudo tie ooko me erute me bomba me Samaria, gin kiko donyo yamo ken gi ken gi be, “Pinyo kamio wan odongunu bedo kan kuro to akura?

⁴ Ka owacunu be odonyunu i bomba, kec tie i bomba obinunu to kec; do ka odongunu kan da, pwodi obinunu to kamanono. Pi manono, wan ojalerenu ot i kimere me jo Siria, ka kimito neko wa wek kinek wa, do ka kimito weko wa obino dong kuo.”

⁵ Aso, gin kiko yai amumusit pi ot i kimere me jo Siria, do kakame kituno kede kunono, likame kiko udo ngatamoro kuno akadi acel.

⁶ Pien Rwot oudo omio isirikalen me Siria owinyo mor me tien cabalan me yi, kede me asigiran, bala bino me twon ekodet me isirikalen, di kiko donyo yamo ken gi ken gi be, “Abaka me Isirael opango abakai me jo Kiti kede me Misiri pi bino yi kede wa.”

⁷ Aso, otieno nono isirikalen me Siria oko yai amumusit di kiko weko iemai gi, asigiran gi, kede pundan gi, di kimere gi oko dong nono, di kiko ringo pi laro kuo gi.

⁸ Kakame cuo ongwon atie kede tuwo arac me delkom nogo oko tuno kede i dog kimere, gin kiko donyo i eema acel di kiko cam kede amata, di kiko kwanyo siliba, saabu kede igoen, kiko ot kano gi. Gin kiko bobo dok kanono di kiko donyo i eema ace kiko kwanyo kiye jame di kiko ot kano gi.

⁹ Gin kiko donyo yamo ken gi ken gi be, “Gikame wan otienu timo obedo gikame rac. Tin wan otienu kede rwonge aber. Ka wan olingunu alinga kede kop noni tuno diki odiko, kobino tero be wan obedunu jo areco. Pi manono, ootunu oterunu kop noni i paco ka Abaka.”

¹⁰ Aso gin kiko ot di kiko lwongo jo kame oudo daro erute me bomba me Samaria di kiko waco negi be, “Wan oudo ooto i kimere me isirikalen me Siria, do likame oko udo ngatamoro akadi winyo dwan moro; asigiran kede pundan tie likame kogonyo gi, di iemai tie ken gi nono.”

¹¹ Aso, jo kame oudo daro erute me bomba oko lwongere di oko tero kop nono i paco me abaka.

¹² Abaka oko yai iwor nono di eko waco ne jotic mege be, “Amito waco ne wu iik kame isirikalen me Siria tie kede i kom wa. Gin kingeo be kec odio wan; aso gin nan kiweko kimere gi di kiko ot pwono obar di kigeno be, wan obino wok ki bomba pi ot mono cam di gin kiko bino mamako wa akuo ki kiko mano bomba.”

¹³ Ngat acel kikom jotic mege oko waco be, “Jo kanataman odong i bomba kan bino gida lubo tien jo me Isirael ace kotieko to. Pi manono ber wan ocwaunu cuo mogo kede asigiran kany kikom apwodi odong kuo, tetekeny gin kioti kinen gi kotimere.”

¹⁴ Gin kiko yero cuo mogo di abaka oko cwano gi kede cabalan are pi ot neno gi kotimere ne isirikalen me Siria.

¹⁵ Cuo nogo oko wapo isirikalen me Siria paka tuno Yorodan. Gin kibedo udo igoen kede jamini ace apat kame isirikalen me Siria oudo obedo uco i yongayo iesawa kame oudo kitie ringo kede. Gin kiko dok di kiko tatamo ne abaka.

¹⁶ Di do jo me Samaria oko wok ki bomba di kiko ot yako kimere me isirikalen me Siria. Aso, bala kame oudo Rwot owaco, kilo adek me engano apwot kede kilo kanyape me mawele oudo oko donyo cato pi siliba akaya acel kenekene.

¹⁷ Oudo abaka oketo sirikale ngadare pi daro erute cenge nono; jo oko nyonyo en tuno to i erute me bomba pi gin marao wok ooko, bala kame Elisa oudo owaco ne kede kakame abaka ooto kede bute.

¹⁸ Pien kakame Elisa oudo owaco ne kede abaka be, “Tuno diki esawa noni udo ibino twero wilo i Samaria kilo adek me engano apwot kede kilo kanyape me mawele pi siliba akaya acel kenekene,”

¹⁹ sirikale nono oudo oko dwoko ne Elisa be, “Bed bala Rwot cwai kot, do manono likame twero timere.” Di Elisa oudo oko dwoko ne be, “In ibino neno kede wangi, do likame ibino bilo kiye gimoro.”

²⁰ Ateteni eko timere kamanono; jo oko nyonyono en tuno to i erute me bomba.