2 Abakai 5 - Baibuli I Leb Kumam 2013

Kocango Naman

¹ Naman oudo obedo ngadwong me isirikalen me Siria. Abaka oudo mare adikinicel piento Rwot oudo otio kede en me mino Siria bwono yi. Bed bala en oudo ebedo ngayi atek, do oudo etie kede tuwo arac me delkom.

² I kare moro acel di isirikalen me Siria oudo ooto yi kede Isirael, gin kiko mako atin nyako acel me Isirael di kiko tere edoko ngatic ka dako ka Naman.

³ Ceng acel nyako nono oko waco ne min ot be, “Ka kato adwong oudo ooto but enabi moro me Samaria, koto oudo kocango tuwo mere me delkom.”

⁴ Naman oko winyo kop nono di eko ot waco ne abaka gikame nyako me Isirael nono oudo owaco.

⁵ Abaka me Siria oko waco be, “Ot gire, ango abino cwani kede baluwa but abaka me Isirael.”

⁶ Naman oko yai ot, eko tero siliba akaya tutumia ot adek (30,000), saabu akaya tutumia kanyape (6,000) kede igoen tomon.

⁷ Kakame abaka me Isirael osomo kede baluwa nono, en eko nyinyilo igoen ki kome di ewaco be, “Benyo, ango adoko Rubanga mio atie kede twer me poko ne dano kuo amoto to, komio icuo ni ocwao na dano atie kede tuwo me delkom? Nenunu kite kame etie mono kede lok kibuta.”

⁸ Kakame enabi Elisa owinyo kede be abaka me Isirael oudo onyinyilo igoen ki kome, en eko cwano ne kop di ewaco ne be, “Pinyo komio inyinyilo igoen ni? Cwai icuo nono bin buta tetekeny eko bino ngeno be enabi tie i Isirael.”

⁹ Aso, Naman oko ot kede asigiran kede cabalan mege di eko ot cungo i dog ekeko me ot ka Elisa.

¹⁰ Elisa oko cwano aor bute pi waco ne be, “Oti ilwok komi i ecilet me Yorodan tien kanyaare, di delkomi ko bino cango.”

¹¹ Do Naman oko doko ger di eko ot tenge di ewaco be, “Ango oudo atamo be en ebino wok cungo i nyima di eko lego but Rwot Rubanga mere di erieo cinge i koma, di ango ako cango!

¹² Doko medo i wi mano, icileta me Abana kede Parapar atie Damasiko mam beco kalamo pie dedede me Isirael? Mam oudo ango atwero lwokere i icileta nogo di ako cango!”

¹³ Do jotic mege oko ot bute di kiko waco ne be, “Adwong, ka koto enabi oudo ociki timo gimoro atek, benyo, koto likame itimo? Nan do nyo agengi lwokere bala kame en ewaco, di iko bino cango?”

¹⁴ Aso, Naman oko ot Yorodan di eko lwinyo kome i yi pii tien kanyaare bala kame Elisa oudo owaco ne, di delkome oko doko nyen bala delkom atin awobi, di eko cango.

¹⁵ En eko dok but Elisa karacel kede jo mege dedede di eko waco ne be, “Nan ango atieko ngeno be likame doko tie rubanga moro apat i wi lobo, kwanyo kenekene Rubanga me Isirael; nan akwai iyei gamo giamia kibuta.”

¹⁶ Do Elisa oko dwoko be, “Alairo i nying Rubanga akuo ngat kame ango atio ne be, likame ango abino gamo gimoro kibuti.” Naman oko ngangao en pi gamo giamia mere, do en eko dagi.

¹⁷ Di Naman oko waco be, “Ka in idagi gamo giamia na, akwai iyei na tero paco lobo kame asigiran are twero wano; pien cako nan ango likame bobo abino mino giamia arabo giayala awanga but rubanga moro ace apat, kwanyo kenekene but Rwot.

¹⁸ Do akwao be Rwot sasiro ango kame aoto i tempulo ka rubanga Rimon di ako luro piny kede abaka me Siria pi wore.”

¹⁹ Elisa oko waco ne be, “Ot kede mulem.” Do kakame Naman oyai kede kibute di pwodi eoto kakacecek,

²⁰ Gekasi oko yamo i cunye be, “Adwong na kom oweko Naman ooto kamano abongo gamo cul moro kibute. Ango akwongere i nying Rwot kakuo be, ango abino ringo ot wape di ako gamo gimoro kibute.”

²¹ Aso, Gekasi oko cako wapo Naman. Kakame Naman oneno kede di dano tie ringino i dude, en eko somo piny ki wi cabala mere pi ot riamo kede, di eko penye be, “Nyo arac?”

²² Gekasi oko dwoko be, “Likame tie gimoro arac, do kenekene adwong na ocwaa pi waco ni be inabin are kikom ekodet me inabin atie i piny kobedo imukuran me Epuraimu obino nan nan; nan Elisa mito be imi gi siliba akaya tutumia adek kede igoen mogo, kede igoen aupere kabedo are.”

²³ Naman oko waco be, “Okwe gam siliba akaya tutumia kanyape.” Naman oko bedo tek kamanono, di eko bono siliba akaya i ikapun are di eko mino gi but jotic mege are, di eko cwano gin kitelo ne Gekasi yongayo.

²⁴ Kakame kituno kede i wi emukura kakame Elisa oudo bedo iye, Gekasi oko gamo ikapun kibut jotic nogo, di eko tero gi i ot, di eko moto gi pi peruno gi; di do jo nogo oko dok.

²⁵ En eko ot i ot but Elisa, di Elisa oko penye be, “Gekasi, oudo in itie tuai?” En eko dwoko be, “Ango likame oudo aoto karamoro.”

²⁶ Do Elisa oko waco ne be, “Iparo be tipo nango oudo likame tie kunono i esawa kame dano moro owok kede ki wi cabala mere pi riamo kedi? Iparo be manoni obedo kare me gamo sente kede igoen, kede poti me olibeti kede me olok, kede romini kede twonin, kede ipasoi kede apasoi?

²⁷ Pi manono, tuwo me delkom Naman bino kobo nin kede ne ikwae ni pi kare dedede.” Aso, Gekasi oko yai ki kanono di tuwo me delkom otieko make, di do kome odoko tar bala akako.