2 Abakai 24 - Baibuli I Leb Kumam 2013

¹ I kare me apugan ka Yekoyakim en kame Abaka Nebukadunesa me Babilon oko ot suro kede Yuda; Yekoyakim di oko doko ngatic mere pi mwakini adek. I cen mere di do Yekoyakim oko lokere jemo ne.

² Rwot oko cwano ikodeta me joyak pi ot Babilon; jo Siria, jo Moab, kede jo Amon pi ot suro Yekoyakim di kiko dudubo Yuda bala kame Rwot oudo owaco i dog inabin jotic mege.

³ Ateteni manoni bin otimere i kom Yuda pi Rwot en oudo ociko kamanono, tetekeny ekwany gi ki nyime pi dub kame Abaka Manase oudo otimo,

⁴ kede pi remo me jo kame li kede raco moro kame oudo en eko oonyo; piento en bin eonyo remo me jo atot i Yerusalem, jo kalikame tie kede raco moro. Rwot oudo likame romo sasiro en iye.

⁵ Gi dedede kame Yekoyakim bin otimo kowandiko i Itabu me Itatam amako Abakai me Yuda.

⁶ Yekoyakim bin oko to di wode Yekoyakin oko lunyo wange bala abaka.

⁷ Abaka me Misiri bin likame bobo oko medo yai ot ooko ki lobo mere, pien abaka me Babilon oudo otieko gamo adulion dedede kame abaka me Misiri oudo pugo, cako ki Osamai me Misiri tuno i ecilet me Eupurate.

Abaka Yekoyakin me Yuda

⁸ Mwakini me dongo ka Yekoyakin oudo tie tomon kiwie kanyauni i kare kame ecako kede pug. En bin eko pug i Yerusalem pi duwete adek. Nying toto mere bin Nekusuta nyar ka Elinatan me Yerusalem.

⁹ En eko timo gikarac i nyim Rwot bala kame bin joakwari mege otimo.

¹⁰ I kare nono isirikalen ka Abaka Nebukadunesa me Babilon oko bino paka tuno Yerusalem di gin kiko luko bomba.

¹¹ Abaka Nebukadunesa bin oko bino paka tuno i bomba me Yerusalem i kare kame isirikalen mege oudo oluke kede.

¹² Abaka Yekoyakin me Yuda bin oko rieno cinge but abaka me Babilon, en kede toto mere, jotic mege, jodongo me isirikalen mege, kede jotic mege adongo. I mwaka me kanyauni me apugan me abaka Nebukadunesa en kame bin oko tero kede Yekoyakin bedo mabus.

¹³ Nebukadunesa bin oko tero jamini dedede me ot ka Rwot kede me ot ka abaka. En etotongo i adulion atitino jamini dedede me saabu kame oudo kotio kede i tempulo ka Rwot, jamini kame bin Abaka Sulumani me Isirael otimo. En etimo manoni bala kame Rwot oudo owaco sek.

¹⁴ En eko tero jo dedede me Yerusalem bala mabus; jotic adongo dedede kede jo yi dedede, gin dedede jo tutumia tomon (10,000). En bin etero da jodiru me tic cing kede jotet; likame bin tie dano moro oko dong, kwanyo kenekene jo kame can oudo odio do twatwal.

¹⁵ Nebukadunesa bin oko tero Yekoyakin Babilon bala mabus, karacel kede toto mere, dako mere, jotic mege adongo, kede jotel kame pirgi tek i Yuda.

¹⁶ Abaka me Babilon omako di eko tero Babilon cuo atek dedede, gin dedede jo tutumia kanyaare (7,000), kede jo ipirana i tic cing kede jotet, gida jo tutumia acel (1,000), gin dedede jo atek kame poore bedo isirikalen.

¹⁷ Abaka me Babilon di oko keto Matania, neru me Yekoyakin odoko abaka kawang Yekoyakin, di eko loko nyinge odoko Esedekia.

Abaka Esedekia me Yuda

¹⁸ Mwakini me dongo ka Esedekia oudo tie ot are kiwie acel i kare kame bin en ecako kede pug; en eko pug pi mwakini tomon kiwie acel i Yerusalem. Nying toto mere bin Kamutal, nyar ka Yeremia me Libina.

¹⁹ Esedekia oko timo gikarac i nyim Rwot bala kame Yekoyakim oudo otimo.

²⁰ Jo me Yerusalem kede Yuda bin oko wango cuny Rwot kitek omio Rwot oko riamo gi tenge ki nyime.