2 Abakai 22 - Baibuli I Leb Kumam 2013

Abaka Yosia me Yuda

¹ Mwakini me dongo ka Yosia oudo tie kanyauni i kare kame bin en ecako kede pug; en bin eko pug i Yerusalem pi mwakini ot adek kiwie acel. Nying toto mere bin Yedida nyar ka Adaya me Bosokat.

² En bin eko timo gikame poore i nyim Rwot; en ebedo timo gi dedede bala bin kwaru mere Daudi, abongo parao tenge.

Koudo Itabu me Iswil

³ I mwaka me tomon kiwie kanyauni me apugan mere, Abaka Yosia bin oko cwano kalani Sapan, wot ka Asalia, en akwar Mesulam, i ot ka Rwot di ecike be,

⁴ “Ot but Kilikia ngatel me Josaseredoti di iko waco ne emar sente dedede kame kotieko kelo i ot ka Rwot, sente kame jodar dogola otieko coko kibut jo.

⁵ Wace emi sente nogo i cing jotic kame telo tic me ot ka Rwot; me wek gin kimi sente nogo but jotic kame tie iiko ot,

⁶ gin en, jopac, jogedo, kede jonap matapali, tetekeny gin kiwil kede ibaon kede kide me iiko ot.

⁷ Jotel tic nogo obedo jo kame genere, pi mano, kony li me penyo gi epone kame kitio kede sente kame komio i cing gi.”

⁸ Kilikia Ngatel me josaseredoti bin oko waco ne kalani Sapan be, “Ango atieko udo itabu me iswil i ot ka Rwot.” Kilikia oko mino itabu nono but Sapan di en eko some.

⁹ Di do Sapan oko dok but abaka di eko waco ne be, “Jotic ni otieko tero sente dedede kame oudo tie i ot ka Rwot, di gin kiko mino i cing jo kame tie telo tic me ot ka Rwot.”

¹⁰ Di bobo eko waco ne abaka be, “Kilikia ngasaseredoti omia itabu moro tie kan.” Di en oko somo itabu nono ne abaka kede dwan amalo.

¹¹ Kakame abaka owinyo kede kope kame kosomo ne i itabu me iswil, en eko nyinyilo igoen me kome pi cwercuny.

¹² Di abaka oko mino cik but Kilikia ngasaseredoti, Akikam wot ka Sapan, Acibor wot ka Mikaya, kalani Sapan, kede but Asaya ngatic mere di ewaco negi be,

¹³ “Otunu di ikounu penyo Rwot pira kede pir jo me Yuda dedede, i kom kope me itabu kame kotieko udo noni. Rwot otieko lilo kede wan kitek pien joakwari wa likame oko lubo kope me itabu noni. Likame gin kitimo gikame itabu noni waco kame mako wan.”

¹⁴ Aso, Kilikia ngasaseredoti, Akikam, Acibor, Sapan, kede Asaya oko ot penyo anabi Kuluda dako ka Salum wot ka Tikiba, akwar Karakas; Salum oudo obedo ngat kame bin gwoko igoen me ot ka Rwot. Kuluda oudo tie bedo Yerusalem i adul anyen, kakame gin kioto penye iye.

¹⁵ En bin eko waco negi be poore kidok di kiko waco ne ngat kooro gi be

¹⁶ Rwot Rubanga me Isirael waco be, “Ango ateteni abino kelo can i kom kabedo noni kede i kom jo kame bedo iye, bala kame kowandiko kede i itabu kame abaka otieko somo nono.

¹⁷ Ango abino timo manono pien gin kitieko weka di kiko lokere mino giayala but rubangan apat. Gin kitieko wango cunya kede gi dedede kame gin kibedo timo, pi manono, gin kitieko mina alilo kede kabedo noni, doko lilo na nono likame bino kwei.

¹⁸ Do abaka, ngat kooro wu pi bino penya, wun ibinunu waco ne be Rwot Rubanga me Isirael waco kaman: In iwinyo kope kame kowandiko i yi itabu,

¹⁹ di iko swilaro, doko iko mwolere i nyima, di iko inyinyilo igoen me komi di ikok, kakame in iwinyo kede di ango ayamo irac i kom kabedo noni kede i kom jo kame bedo iye. Ango abino mino kabedo noni dong nono kede ebino doko gikame jo tio kede me lamo jo icegun. Do ango atieko winyo ilega nin.

²⁰ Pi mano, in likame ibino neno can kame ango abino kelo i kom kabedo noni. Ango abino kelo can noni ingei in to di oko yiki kede mulem.” Cuo nogo bin oko dok tero kop noni but abaka.