2 Abakai 2 - Baibuli I Leb Kumam 2013

Kotero Elia Malo

¹ Di do bin kare otuno me Rwot tero Elia malo kede apipiru, eko timere kaman: ceng acel di Elia kede Elisa oudo oyai ki Giligal kitie ot,

² Elia oko waco ne Elisa be, “In dong kan; Rwot ocwa be aot Betel.” Do Elisa oko waco be, “Alairo i nying Rwot kakuo be likame ango abino pokere kedi.” Aso, gin dedede kiko ot tuno Betel.

³ Ekodet me inabin koudo tie Betel oko ot but Elisa di kiko penye be, “Ingeo be tin Rwot bino kwanyo tenge ngadwong ni kibuti?” Elisa oko dwoko be, “Ebo ango angeo, do owekunu yamo iye.”

⁴ Elia oko waco ne Elisa be, “Elisa, in dong kan, pien Rwot ocwa Jeriko.” Do Elisa oko dwoko be, “Alairo i nying Rwot kakuo be likame ango abino pokere kedi.” Aso, gin dedede kiko ot tuno Jeriko.

⁵ Ekodet me inabin koudo tie Jeriko oko ot but Elisa di kiko penye be, “Ingeo be tin Rwot bino kwanyo tenge ngadwong ni kibuti?” Elisa oko dwoko be, “Ebo ango angeo, do owekunu yamo iye.”

⁶ Elia oko waco ne Elisa be, “Elisa, in dong kan, pien Rwot ocwa Yorodan.” Do Elisa oko dwoko be, “Alairo i nying Rwot kakuo be likame ango abino pokere kedi.” Aso, gin dedede kiko ot kiupere,

⁷ di inabin ot kany da oko lubo gi pi ot Yorodan. Elia kede Elisa oko cungo i dog ecilet, di ekodet me inabin ot kany oko cungo tenge kakabobor.

⁸ Di Elia oko gonyo egoe mere me ooko eko dodolo en eko jwato kede pii, di pii oko pokere ki diere di Elia kede Elisa oko ngolo ecilet di kibeo i kakatek.

⁹ Kakame kitieko ngolo kede ecilet, Elia oko waco ne Elisa be, “Waca gikame apoore timo ni di pwodi likame kotera tenge kibuti?” Elisa oko dwoko be, “Mia twer kame in itie kede adwong kalamo.”

¹⁰ Elia oko dwoko be, “Ikwao gikame tek. Do ka inena di kotie tera tenge kibuti, kobino mini; do ka likame inena di kotie tera tenge kibuti, likame kobino mini.”

¹¹ Kakame gin oudo kitie meede kede ot di kiyamo, cucuto cabala kame liel mac di asigiran aliel mac en atie wane oko neeno di oko poko gi ki diere, di apipiru oko tero Elia malo.

¹² Elisa oko donyo ngine di elelemo be, “Papa, papa! Oudo in ical bala cabalan me Isirael kede jo kame yi i wi asigiran!” Do kakame en eko do rwenyo kede ki wange, en eko nyinyilo igoen ki kome pi cwercuny.

¹³ Elisa oko kwanyo ekanso ka Elia koudo opoto kibute eko dok di eko donyo cungo i dog ecilet me Yorodan.

¹⁴ En eko jwato pii kede ekanso nono di ewaco be, “Rwot Rubanga ka Elia tie tuai?” Cucuto pii oko pokere ki diere, di Elisa oko ngolo ecilet ki kakatek.

¹⁵ Inabin ot kany kowok ki Jeriko onene ki kakabor di kiko waco be, “Elisa nan tie kede twer kame Elia oudo tie kede.” Gin kiko ot pi riamo kede en di kiko luro piny i nyime

¹⁶ di kiko waco ne be, “Neningo, wan nan otie cuo atek ot kany. Wek wan ooti omoi ngadwong ni, cengemogo tipo ka Rwot otere di oko weke i wi moru moro amoto i aditot moro.” Elisa oko dwoko be, “Li, kur iotunu.”

¹⁷ Do gin kiko meede ameda dine kede tam tuno lewic make di eko waco negi be, “Aso otunu.” Gin kiko yai jo ot kany di kiko mono Elia pi ceng adek, do likame kiko twero ude.

¹⁸ Kakame kidwogo kede but Elisa, piento en oudo edong Jeriko, en eko waco negi be, “Mam oudo ango awaco ne wu be kur iotunu?”

Giaura kame Elisa Otimo

¹⁹ Jo mogo me bomba me Jeriko oko ot but Elisa di kiko waco ne be, “Adwong, kakame bomba noni tie iye ber, do pii mere en arac, egengo ne wa nyai me kodi.”

²⁰ Elisa oko waco be, “Kelanu bakuli anyen, di ikounu keto iye munyo.” Gin kiko tero ne gi nogo.

²¹ En eko ot i atan me pii di eko uco munyo i pii, di eko waco be, “Rwot owaco be, ‘Ango atieko mino pii noni odoko ber, likame bobo ebino kelo to amoto wok yic.’ ”

²² Pii nono oko doko ber cako cenge nono tuno tin, bala kame Elisa oudo owaco.

²³ Elisa oko yai ki Jeriko pi ot Betel. Kakame oudo etie kede i yongayo, awobe mogo oko wok ki bomba di kiko donyo jwire ne di kiwaco ne be, “Won bono, irwa tenge! Won bono, irwa tenge!”

²⁴ En eko lokere di eko donyo ngino gi di eko lamo gi i nying Rwot. Di idubun amon are oko wok ki abum di kiko nyinyilo awobe ot ongwon kiwie are kikom gi.

²⁵ Elisa oko meede ot tuno i moru me Kamel, di eko lokere eoto Samaria.