2 Abakai 15 - Baibuli I Leb Kumam 2013

Abaka Usia me Yuda

¹ I mwaka me ot are kiwie kanyaare me apugan ka Yeroboam me are me Isirael, Usia wot ka Amasia bin oko doko abaka me Yuda.

² Mwakini me dongo mere oudo tie tomon kiwie kanyape i kare kame en ecako kede pug. En bin eko pug i Yerusalem pi mwakini ot kany kiwie are. Nying toto mere bin Yekolia, dano me Yerusalem.

³ En bin eko bedo timo gikame poore i nyim Rwot, bala kame papa mere Amasia bin otimo.

⁴ Akadi bed kamanono da, kabedere me woro caljwogi likame bin oko kwakwanyo tenge; jo pwodi oko bedo mino giayala angola kede giayala me odok angwe kur i kabedere nogo.

⁵ Rwot bin oko mino tuwo arac me del kom omako abaka. En bin eko bedo kede tuwo nono di opoko ne ode kene, tuno i kare me to mere. Wode Yotam en kame do bin oko bedo telo paco me abaka, kede jo me lobo nono da.

⁶ Gi dedede apat kame Usia bin otimo kowandiko i Itabu me Itatam amako Abakai me Yuda.

⁷ Usia bin oko to di oko yike i nget joakwari mege i Bomba ka Daudi. Wode Yotam en kame bin oko lunyo wange bala abaka.

Abaka Sakaria me Isirael

⁸ I mwaka me ot adek kiwie kanyauni me apugan ka Abaka Usia me Yuda, Sakaria wot ka Yeroboam me are oko doko abaka me Isirael. En bin eko pugo Isirael i Samaria pi duwete kanyape.

⁹ En eko timo gikarac i nyim Rwot, bala kame bin joakwari mege otimo. Eda ebedo timo dub kame bin Yeroboam wot ka Nebat obedo timo, kame bin oko mino jo me Isirael odubo.

¹⁰ Salum wot ka Yabesi bin oko bedo kede iik arac i kome, di eko cobe i nyim jo eneke, di en eko lunyo wange bala abaka.

¹¹ Gi dedede apat kame Sakaria bin otimo, kowandiko gi i Itabu me Itatam amako Abakai me Isirael.

¹² Manoni en gikame Rwot bin ocikere iye but Abaka Yeku di ewaco ne be, “Ikwae ni bino bedo abakai me Isirael tuno i ikwae me ongwon.” Di bin eko da timere kamanono.

Abaka Salum me Isirael

¹³ I mwaka me ot adek kiwie kanyangon me apugan ka Abaka Usia me Yuda, Salum wot ka Yebes bin oko doko abaka me Isirael. En bin eko pug i Samaria pi duwe acel.

¹⁴ Menakem wot ka Gadi bin oko wok ki Tirisa ebino Samaria; en eko neko Salum wot ka Yabesi, di en eko lunyo wange bala abaka.

¹⁵ Gi dedede ace kame Salum bin otimo, kiton iik arac kame ebedo tie kede, gin dedede kowandiko gi i Itabu me Itatam amako Abakai me Isirael.

¹⁶ I kare nono Manakem bin oko muducaro bomba me Tipisa, jo dedede kame bin bedo iye, kede adulion koluke cako ki Tirisa ot kede anyim, pien gin bin likame kirieo cing gi bute. En bin ebabaro kiton yi mon koyac kame bin tie kunono.

Abaka Menakem me Isirael

¹⁷ I mwaka me ot adek kiwie kanyangon me apugan ka Usia me Yuda, Menakem wot ka Gadi bin oko cako pug bala abaka me Isirael; en bin eko pug i Samaria pi mwakini tomon.

¹⁸ En bin eko timo gikarac i nyim Rwot; en pi kare me kuo mere lung, ebedo timo dub kame bin Yeroboam wot ka Nebat obedo timo, kame bin oko mino jo me Isirael opoto i dub.

¹⁹ Abaka Tigilat Pileser me Asiria bin oko bino suro Isirael, di Menakem oko mine kilo tutumia ot adek kiwie kanyauni (38,000) me siliba, tetekeny en ekonye edok tek i ajakanut mere bala abaka.

²⁰ Menakem bin oraro sente nono kibut jo dedede kobaro me Isirael, ngat acelacel en emio okwanyo siliba akaya ot kany di en eko mino sente nono but abaka me Asiria. Aso, abaka me Asiria bin oko dok i piny mere.

²¹ Gi dedede ace kame bin Menakem otimo, kowandiko gin dedede i Itabu me Itatam amako Abakai me Isirael.

²² Menakem bin oko to di oko yike i nget joakwari mege, di wode Pekakia oko lunyo wange bala abaka.

Abaka Pekakia me Isirael

²³ I mwaka me ot kany me apugan ka Abaka Usia me Yuda, Pekakia wot ka Menakem bin oko doko abaka me Isirael, di en eko pug pi mwakini are i Samaria.

²⁴ En bin eko timo gikame rac i nyim Rwot; en ebedo timo dub kame bin Yeroboam wot ka Nebat obedo timo, kame bin oko mino jo me Isirael opoto i dub.

²⁵ Peka wot ka Remalia, ngatel me isirikalen mege, oko bin bedo kede iik arac i kome kede cuo ot kany me Gilead, di gin kiko suro Pekakia di kiko neke i Samaria, di oudo en etie kabedo kame kocelo kede apama atek i paco me abaka. En eneke karacel kede Aragob kede Ariek di en eko lunyo wange bala abaka.

²⁶ Gi dedede ace kame bin Pekakia otimo, kowandiko gin dedede i Itabu me Itatam amako Abakai me Isirael.

Abaka Peka me Isirael

²⁷ I mwaka me ot kany kiwie are me apugan ka Abaka Usia me Yuda, Peka wot ka Remalia bin oko doko abaka me Isirael, di eko pug i Samaria pi mwakini ot are.

²⁸ En bin eko timo gikame rac i nyim Rwot; en ebedo timo dub kame bin Yeroboam wot ka Nebat obedo timo, kame bin oko mino jo me Isirael opoto i dub.

²⁹ I kare kame bin Peka tie kede abaka me Isirael, en kame Abaka Tigilat Pileser me Asiria oko mano kede bomban me Iyon, Abel Bet Maka, Yanoa, Kedes, Kasor, Gilead, Galilaya, kede lobo me Naputali dedede, di eko mako jo bala mabus di eko tero gi Asiria.

³⁰ I mwaka me ot are me apugan ka Yotam wot ka Usia bala abaka me Yuda, Kosea wot ka Ela oko bedo kede iik arac i kom Abaka Peka, di eko neke, di en eko lunyo wange bala abaka.

³¹ Gi dedede ace kame bin Peka otimo, owandiko gin dedede i Itabu me Itatam amako Abakai me Isirael.

Abaka Yotam me Yuda

³² I mwaka me are me apugan ka Abaka Peka wot ka Remalia bala abaka me Isirael, Yotam wot ka Usia bin oko doko abaka me Yuda.

³³ Mwakini me dongo mere oudo tie ot are kiwie kany i kare kame ecako kede pug, di en bin eko pug i Yerusalem pi mwakini tomon kiwie kanyape. Nying toto mere bin Yerusa nyar ka Sadoki.

³⁴ En bin eko bedo timo gikame poore i nyim Rwot, bala kame bin papa mere Usia obedo timo.

³⁵ Akadi kamanono da, likame bin oko kwanyo kabedere me woro caljwogi; jo bin pwodi oko meede kede mino giayala angola kede giayala me odok angwe kur i kabedere nogo. Yotam en kame bin ogero erute me tetu malo me ot ka Rwot.

³⁶ Gi dedede ace kame bin Yotam otimo, owandiko gin dedede i Itabu me Itatam amako Abakai me Yuda.

³⁷ I kare me apugan mere en kame bin Rwot ocako cwano kede Abaka Resin me Siria kede Peka wot ka Remalia suro Yuda.

³⁸ Yotam bin oko to di oko yike i nget joakwari mege i Bomba ka Daudi, kwaru mere. Wode Akas en kame bin oko lunyo wange bala abaka.