2 Abakai 14 - Baibuli I Leb Kumam 2013

Abaka Amasia me Yuda

¹ I mwaka me are me apugan ka Yekoyasi wot ka Yekoyakas bala abaka me Isirael, en kame Abaka Amasia wot ka Yowasi me Yuda ocako pugo kede Yuda.

² Mwakini me dongo mere oudo tie ot are kiwie kany i kare kame bin en ecako kede pug. En bin eko pug i Yerusalem pi mwakini ot are kiwie kanyangon. Nying toto mere bin Yekoadin, dano me Yerusalem.

³ En bin eko timo gikame poore i nyim Rwot, cite likame bala kame kwaru mere Daudi bin otimo; do en etimo gi dedede bala kame papa mere Yowasi oudo otimo.

⁴ En likame erereto kabedere kame bin koworo iye caljwogi; jo bin oko meede kede ngolo giayala kede dunyo odok angwe kur i kabedere nogo.

⁵ Oyotoyot di do en etieko sipakin i apugan, en eko neneko jotic kame bin oneko papa mere, abaka.

⁶ Do en likame eko neneko idwe gi; en elubo kop kame bin kowandiko i itabu me iswilia ka Musa, kakame Rwot omio iye cik be, “Likame kobino neko joapapi pi dub me idwe gi, arabo neko idwe pi dub me jonywal gi; do kobino neko ngat acelacel pi dub mere en kikome.”

⁷ Amasia bin oko neko jo Edom tutumia tomon (10,000) i Aditot me Munyo di eko mano bomba me Sela. En bin eko cako ne bomba nono nyinge be Yokitel, kame pwodi kolwonge kede tuno tin.

⁸ Di do Amasia oko ooro jo but Abaka Yekoyasi, abaka me Isirael, en wot ka Yekoyakas, akwar Yeku, kede kop kame waco be, “Bia oriami wang i wang.”

⁹ Do Abaka Yekoyasi oko dwoko ne kop kame waco be, “Yat me okuto moro kame oudo tie i abum me Lebanon bin ocwao kop but yat seda me abum me Lebanon di ewaco ne be, ‘Mia nyari anyom ne woda’; do le moro me obar me Lebanon oko beo di eko nyonyono yat me okuto nono.

¹⁰ Ateteni in itieko bwono jo Edom, di manono oko mini idoko ngaewaka. Mi dwongo kame komi romi, di iko dong bedo paco ni. Pinyo kame mio in imito mono peko di iko kelo can i komi kede i kom jo me Yuda?”

¹¹ Do Amasia oko dagi winyo kop mere. Aso, Abaka Yekoyasi me Isirael oko ot ne, di gin kiko riamo wang i wang i yi kame bin oko bedo Bet Semes i Yuda.

¹² Jo me Isirael bin oko bwono jo Yuda, di ngat acelacel oko ringo ture.

¹³ Abaka Yekoyasi me Isirael bin oko mako Abaka Amasia me Yuda bala mabus. En eko ot Yerusalem, di eko reto apama me Yerusalem piny, cako ki Erute me Epuraimu tuno i Erute me Agora, kakame boro mere buco romo mita tol are.

¹⁴ En eko yako saabu kede siliba dedede, karacel kede jamini dedede kame oudo tie i ot ka Rwot kede kakame kokano iye jamini i ot me abaka. Emako jo da di eko tero bala mabus kame kopoore lako alaka; di do en eko dok Samaria.

¹⁵ Gi dedede apat kame Yekoyasi bin otimo, teko mere, kede kite kame en bin eko yi kede Abaka Amasia me Yuda, gin lung kowandiko gi i Itabu me Itatam amako Abakai me Isirael.

¹⁶ Yekoyasi bin oko to di oko yike Samaria i nget abakai me Isirael. Di do wode Yeroboam me are en oko lunyo wange bala abaka.

To ka Abaka Amasia me Yuda

¹⁷ Abaka Amasia me Yuda bin oko meede bedo kuo pi mwakini tomon kiwie kany ingei Abaka Yekoyasi me Isirael to.

¹⁸ Gi dedede apat kame Amasia bin otimo kowandiko i Itabu me Itatam amako Abakai me Yuda.

¹⁹ Jo mogo bin oko poro kop i kom Amasia i Yerusalem pi mito neke, di en bin eko ringo Lakis. Do gin bin kiko wape kunono di kiko neke.

²⁰ Liel mere bin oko mino asigira oyeo odwoko Yerusalem, di oko yike kabedo kame bin oyiko iye abakai i Bomba ka Daudi.

²¹ Jo me Yuda bin oko keto Usia wode obedo abaka kame lunyo wange, di mwakini me dongo mere oudo tie tomon kiwie kanyape.

²² Usia bin oko dwoko Elat odok Yuda, di en eko medo gere ingei to ka Amasia papa mere.

Abaka Yeroboam me Are me Isirael

²³ I mwaka me tomon kiwie kany me apugan ka Amasia wot ka Yowasi bala abaka me Yuda, Yeroboam wot ka Yekoyasi oko doko abaka me Isirael, di en eko pug i Samaria pi mwakini ot ongwon kiwie acel.

²⁴ En bin eko timo gikame neno rac i nyim Rwot; en ebedo timo dub dedede kame Yeroboam wot ka Nebat oudo otimo, di eko mino jo me Isirael odubo.

²⁵ En bin eko dwoko ikor me Isirael cako ki Lebo Kamat tuno i nam me Araba, di lubere kede kop kame Rwot Rubanga me Isirael owaco ki dog ngatic mere Yona wot ka Amitai, enabi kame bin yai ki Gat Keper.

²⁶ Rwot bin oneno kite kame jo me Isirael oudo tie kede i twon can, jo koudo obedo ipasoi kede kalikame obedo ipasoi; likame tie dano moro kame oudo romo konyo gi.

²⁷ Do Rwot oudo likame owaco be ebino weno nying me Isirael i wi lobo, omio en eko tic kede Yeroboam me are pi lako gi.

²⁸ Gi dedede apat kame Yeroboam me are bin otimo, teko mere, kite kame en bin eyi kede, kede kite kame en bin edwoko ne kede Isirael Damasiko kede Kamat, bomban kame oudo obedo me Yuda, gin dedede kowandiko gi i Itabu me Itatam amako Abakai me Isirael.

²⁹ Yeroboam bin oko to di oko yike i nget joakwari mege, abakai me Isirael; wode Sakaria en kame bin oko lunyo wange bala abaka.