2 Abakai 11 - Baibuli I Leb Kumam 2013

Abaka Adako me Yuda Anyinge Atalia

¹ Kakame toto me Abaka Akasia owinyo kede be koneko wode, en eko cako neneko jo dedede kobedo wade ka abaka.

² Yowasi wot ka Akasia kenekene en oko bwot. En oudo koyapuno neke kede imiegu mege ace, do waa mere Yekoseba en oko lake. Yekoseba oudo obedo nyar ka Abaka Yekoram, amin me Akasia me toti gi kede obedo mon nyek. En ekwale di eko kane kede ngapidi i agola me buto atie i tempulo ka Rwot, tetekeny Atalia kur tim ne gimoro.

³ Yekoseba oko bedo kano atin nono i tempulo pi mwakini kanyape, di Atalia tie pug bala Abaka adako.

⁴ Do i mwaka me kanyaare ngasaseredoti Yekoyada oko lwongo jodongo me isirikalen kame daro abaka kede kame daro paco me abaka. Gin kiko ot bute i tempulo, kakame gin kiko yei kiye gikame en oudo eikere pi timo di kikwongere. En eko nyuto negi Yowasi wot ka Abaka Akasia,

⁵ di eko mino gi cik kame waco be, “Kame ibinunu i tic ceng Sabato, acel i kom adek me isirikalen bino daro paco me abaka;

⁶ doko acel i kom adek ko daro Erute me Sur; kede acel i kom adek kodong ko daro erute kame tie cen ngei isirikalen jodar apat.

⁷ Ikodeta are me isirikalen jodar kame poore wei ceng Sabato poore ot daro tempulo pi gwoko abaka.

⁸ Gin kipoore daro abaka i kabedo dedede kame en eoto iye, di kimako ipimai cuto i cing gi. Gin kipoore neko ngatamoroni kame bino noko abaka.”

⁹ Jodongo me isirikalen oko woro kop kame Yekoyada owaco; gin kiko tero but Yekoyada isirikalen kame oudo poore wei ceng Sabato kede kame oudo poore bedo i wang tic.

¹⁰ Di Yekoyada oko mino jodongo me isirikalen tongini kede ibukui koudo bin obedo me ka Abaka Daudi, kame oudo tie i tempulo,

¹¹ di eko cibo isirikalen koudo mako ipimai i cing gi cuto rimaro tempulo kede alutari, pi gwoko abaka.

¹² Di do eko woto wot ka abaka ooko, di eko ngapo ne ocoro me ajakanut di eko mine iwandik kobedo iswilia amako bedo abaka. Di do oko wiro Yowasi kede mo di oko moke bedo abaka. Jo oko bapo cing gi di kilelemo be, “Abaka bed kuo nakanaka.”

¹³ Kakame Atalia oko winyo kede icelakin me jo kede me isirikalen jodar, en eko ot i tempulo but jo,

¹⁴ di eko neno abaka anyen di tie cungo i nget epir kame kosipo i dog ekeko me tempulo, bala kame abaka oudo timo i kare nono. Oudo jodongo me isirikalen oluke, kede jo akuto agwara, doko da di jo ace me piny nono tie kilel di kikuto agwara. Atalia oko nyilo egoe ki kome di ewaco be, “Iik arac i kom apugan na! Iik arac i kom apugan na!”

¹⁵ Di ngasaseredoti Yekoyada oko mino cik but jodongo me isirikalen be, “Terenu ooko i diere me isirikalen jodar; nekunu ngatamoroni kame bino lube kunono.” Yekoyada otimo kamanono pien oudo likame emito be nek Atalia i tempulo.

¹⁶ Isirikalen oko make di kiko pere kede tere i erute kame asigiran donyo kede i paco me abaka di kiko neke kanono.

Kope Anyen kame Yekoyada Okelo

¹⁷ Ngasaseredoti Yekoyada omio Abaka Yowasi kede jo osikano but Rwot be gin kibino bedo jo kagenere bute, doko da eko mino abaka ki tetucel, kede jo me piny da ki tetucel, otimo isikan pi bedo jo kame genere ken gi ken gi.

¹⁸ Di do jo oko ot i tempulo ka Baal di kiko rete piny; kinyinyito alutarin kede caljwogi kame oudo tie iye, di kiko neko Matan i nyim alutarin, en oudo ngasaseredoti ka Baal. Ingei Yekoyada keto isirikalen pi daro tempulo ka Rwot,

¹⁹ di do en, karacel kede isirikalen kame daro abaka, kede isirikalen kame daro paco me abaka kede jo dedede kiko nyamaro abaka kwanye ki tempulo tere i paco mere me abaka. Yowasi oko donyo ki Erute me Jodar di eko bedo i kom mere me ajakanut.

²⁰ Jo dedede oko bedo kede kilel di do bomba oko kwei ingei neko Atalia i paco me abaka.

²¹ Yowasi bin odoko abaka me Yuda di mwakini mege me dongo oudo tie kanyaare.