1 Yokana 5 - Baibuli I Leb Kumam 2013

Wan Olo Piny pi Yei

¹ Ngat acelacel kame yei be Yesu en Kirisito udo ebedo atin ka Rubanga, doko ngat acelacel kame maro nganywal moro udo emaro atin me nganywal nono da.

² Epone kame wan ongeunu kede be wan omarunu idwe ka Rubanga en ine be, wan omarunu Rubanga doko olubunu cik mege.

³ Pien maro Rubanga en ine be, wan olubunu cik mege. Doko cik mege likame dio wa,

⁴ pien ngat kame obedo anywali ka Rubanga lo piny. Doko yei wa en kame mio wa olounu piny.

⁵ Ngai en kame karuno lono piny? Mam en ngat kame yei be Yesu en Wot ka Rubanga?

Ijura i kom Yesu Kirisito

⁶ Yesu Kirisito en ngat kame obino kede pii kede remo. Likame ebino kede pii kenekene, do ebino kede pii kede remo. Tipo en kame mio ijura i kom kop noni, pien Tipo en ateni.

⁷ Ijurak tie adek kame mio ijura:

⁸ Tipo, pii kede remo; ijurak adek nogi kope gi riamo.

⁹ Wan oyeunu ijura kame jo mio, do Rubanga mio ijura kame kalamo; pien manoni obedo ijura kame Rubanga omio i kom Wode.

¹⁰ Jo kame yei Wot ka Rubanga tie kede ijura nono i cuny gi. Jo kalikame yei Rubanga otieko mine edoko ngaangalo, pien likame kiyei ijura kame Rubanga otieko mino i kom Wode.

¹¹ Caden nono en ine be, Rubanga otieko mino wa kuo kame bedo nakanaka, doko kuo noni tie i Wode.

¹² Ngat kame tie kede Wod udo etie kede kuo; do ngat kalikame tie kede Wot ka Rubanga likame tie kede kuo kame bedo nakanaka.

Kuo kame Bedo Nakanaka

¹³ Ango awandiko ne wu gi nogi, wun jo kame iyeunu nying Wot ka Rubanga, tetekeny ingeunu be wun itienu kede kuo kame bedo nakanaka.

¹⁴ Nwangcuny kame wan otienu kede i nyime en ine be, ka wan okwaunu gimoro di lubere kede mit mere, en ewinyo kwac wa.

¹⁵ Doko ka wan ongeunu be en ewinyo wa i gi dedede kame wan okwae, udo ongeunu da be otiekunu udo gi dedede kame okwaunu kibute.

¹⁶ Ka ineno omini amoto amini moro di tie timo dub kalikame tere i to, in kwai Rubanga pire di Rubanga ko bino mine kuo. Man tie pi jo kame dub gi likame tero gi i to. Tie dub kame tero dano i to, ango likame awaco be ilegunu pi manono.

¹⁷ Tim areco dedede obedo dub, do tie dub kalikame tero dano i to.

¹⁸ Wan ongeunu be jo kame obedo idwe ka Rubanga likame dubo, pien Wot ka Rubanga gwoko gi, di likame Ngarac ko karuno mulo gi.

¹⁹ Wan ongeunu be wan obedunu idwe ka Rubanga, kede be, piny lung tie i twer me Ngarac.

²⁰ Wan ongeunu be Wot ka Rubanga otieko bino, doko etieko mino wa niang, tetekeny ongeunu en ngat kame etie me ateni; doko wan otienu i en ngat kame tie me ateni, en Wode Yesu Kirisito. En ebedo Rubanga me ateni, doko en ebedo kuo kame bedo nakanaka.

²¹ Idwe na, gwokerenu kikom cal jwogi.