1 Temeseo 3 - Baibuli I Leb Kumam 2013

Jotel me Ekodet me Jokirisito

¹ Man obedo kop me ateni be, ka ngatamoro winyo i cunye pi bedo bisop, udo emito tic kame ber.

² Bisop miero bed abongo gimoro kame kokaruno bunano en iye; icuo kame tie kede dako acel, dano kame mwolere, kame gwokere, ngat kame jo woro, kame gamo jo, ngat kame twero pwonyo jo,

³ ngat kalikame ngamera, ngat kalikame ger do emwol, ngat kalikame ngalok, doko di likame cunye maro sente.

⁴ En miero ebed dano kame gwoko jo me ture kiber, di emio idwe mege winye di kiwore i yore dedede.

⁵ Pien ka dano likame ngeo gwoko jo me i ode, etwero gwoko ekodet me jo koyei Rubanga benyo?

⁶ En miero kur ebed dano kame pwodi nyen i yei, tetekeny kur epong kede ewaka di oko ngolo ne kop bala Sitani.

⁷ Doko miero ebed dano kame jo kalikame oyei Kirisito pwoyo, tetekeny kur ekel lewic i kome di eko donyo i owic ka Sitani.

Gikame mitere ne Dikonin

⁸ Kamanono da, dikonin miero bed jo kame ekite gi beco, jo kalikame lokoloko dud gi, jo kalikame mato bwini atot, doko di likame kitie kede eranga me mito ud;

⁹ gin miero kimok i gikame oudo omungere me yei kede ngec aber me cuny gi.

¹⁰ Poore kong ngic kuo gi; kame koudo gi di kili kede raco moro, poore wek gi kitim tic bala dikonin.

¹¹ Kamanono da, mon gi miero bed jo kame ekite gi beco, jo kalikame dubo nying jo, do miero kibed kede ayapakin, di kigenere i gi dedede.

¹² Dikonin miero bed wegi mon acel acel, di kitwero gwoko idwe gi kede miere gi kiber;

¹³ pien ka dikonin otimo tic kiber, kiudo nying aber, doko kiyamo abongo lworo i kom yei gi i kom Kirisito Yesu.

Mung Adwong

¹⁴ Ango atie kede gen me bino buti oyotoyot, do atie wandiko ni kope nogi tetekeny

¹⁵ ka ango agal, in iromo ngeno epone kame dano miero bed kede bala ngat acel kikom jo me ot ka Rubanga, jo kame obedo ekodet me jo koyei Rubanga kakuo, gikame obedo bala epir kede acakini kame gango ateni.

¹⁶ Ateteni mung me edini wa dwong twatwal: Konyute i cal me kom dano, Tipo oko nyuto be en etimo gikame opoore, imalaikan oko nene. Kotuco kop i kome i dier jo kalikame Iyudayan, piny lung oko yei en, di oko tere malo kede deyo.