1 Samuel 9 - Baibuli I Leb Kumam 2013

Saulo Oriamo kede Samuel

¹ Oudo tie icuo moro kobaro kame nyinge Kis, kame oudo obedo dano me ekeko ka Benjamin. En oudo ebedo wot ka Abiel, kobedo wot ka Seror, kobedo wot ka Bekorat, kobedo wot ka Apia.

² En oudo etie kede wode anyinge Saulo, awobi acil twatwal. Oudo likame tie icuo moro kikom cuo me Isirael kame cil kalamo en. Ka oudo en ecungo, wie oudo kalamo wi jo dedede me Isirael kede boro.

³ Ceng moro acel pundan ka Kis papa me Saulo oko rwenyo. Kis oko waco ne wode Saulo be, “Kwanyi awobi acel iupere kede iotunu imounu pundan.”

⁴ Gin kiko beo i piny kobedo imukuran imukuran me Epuraimu kede i lobo me Salisa, do likame kiko udo gi. Doko kiko beo i lobo me Salim, do likame kiko udo gi. Di kiko beo i lobo ka Benjamin, do likame kiko udo gi.

⁵ Kakame kituno kede i lobo me Sup, Saulo oko waco ne awobi kame oudo upere kede be, “Odok do paco, cengemogo papa na bino weko paro punda di eko lokere paro wan.”

⁶ Do awobi nono oko waco ne be, “Tie icuo moro kobedo dano ka Rubanga i bomba noni, en ebedo dano kame jo woro. Gi dedede kame en ewaco nakanaka cobere kakare. Ber kong ooti bute, cengemogo etwero waco ne wa kakame otwero udo iye pundan nogo.”

⁷ Di Saulo oko dwoko ne awobi nono be, “Do ka ooto bute, nyo kame obino mine? Pien likame tie mugati moro odong i ikapun wa, doko da likame otie kede giamia moro kame otwero mino dano ka Rubanga. Nyo kame otie kede?”

⁸ Awobi nono oko dwoko ne Saulo be, “Ango atie kede ogap moro me siliba, ango abino mine manoni di en eko waco ne wa kakame oyaro udo iye pundan.”

⁹ (I kare kasek i Isirael, ka ngatamoro oudo mito ot penyo kop moro kibut Rubanga, oudo ewaco be, “Bia ooti but nganeno”; pien ngat kame nan kolwongo be enabi oudo bin kolwongo be nganeno.)

¹⁰ Saulo oko dwoko ne awobi nono be mano ber, bia ooti. Aso, gin kiko ot i bomba kakame dano ka Rubanga oudo tie iye.

¹¹ Kakame oudo kitie yito kede i wi emukura ot i bomba, gin kiko riamo kede anyira mogo di kitie wok twomo pii, di kiko penyo anyira nogo be, “Nganeno tie?”

¹² Gin kiko dwoko be, “Etie, en ica i nyimu. Bunyunu ot; en pwodi nan etuno atuna i bomba, pien tie jo oyaro tero giayala gi pi yalo i abila.

¹³ Cucuto ka idonyunu i bomba, ibinunu ude di pwodi likame eoto cam i abila. Pien jo likame bino cako cam di pwodi likame en etuno, pien miero en kong emi giayala winyo di do jo kame kolwongo ko cam. Nan wun otunu, iyarunu bunyo riamo kede en.”

¹⁴ Aso, gin kiko ot i bomba. Kakame gin oudo kitie donyo kede i bomba, gin kiko neno Samuel di etie bino tetu but gi di oudo etie ot i abila.

¹⁵ Aso, ceng acel cen di pwodi Saulo likame obino, Rwot oudo owaco ne Samuel kaman:

¹⁶ “Diki tetu esawa noni ango abino cwano ni icuo moro me lobo ka Benjamin, di in iko bino wire kede mo pi bedo ngapug me jo na me Isirael. En ebino lako jo na ki cing jo me Pilistia. Pien ango atieko neno can kame jo na tie neno di ako yei winyo koko gi.”

¹⁷ Kakame Samuel oneno kede Saulo, Rwot oko waco ne be, “Icuo nono ine kame oudo ango awaco ni kop i kome. En kame ebino pugo jo na.”

¹⁸ Di Saulo oko ot but Samuel i nget erute di eko waco ne be, “Okwe waca, ot ka nganeno tie tuai?”

¹⁹ Samuel oko dwoko be, “Ango en nganeno; tel na yongayo kong ooti i abila, pien tin in ibino cam kede ango, do diki odiko ango ako bino weki ioto di atieko dwoko peny ni dedede.

²⁰ I kom kop amako pundan ni korwenyo ceng adek cen, kur doko imeede paro gi, pien kotieko udo gi. Do ngai en kame jo me Isirael dedede oketo mit gi i kome? In inonono, in karacel kede jo me ot ka papa ni.”

²¹ Saulo oko dwoko be, “Ango abedo dano me ekeko ka Benjamin, en ateker atitidi kalamo i Isirael, doko ot wan kony akonya i ateker ka Benjamin. Pinyo do komio in iwaco na kop acal kamano?”

²² Di Samuel oko tero Saulo kede awobi ngatic mere i agola alac di eko mino gi kabedo me wor i emesa, kakame oudo wele apat aromo 30 kame kolwongo tie bedo iye.

²³ Samuel oko waco ne ngatedo be, “Kel ringo kame oudo ango ami ca, kame oudo ango awaco ni be ipok tenge.”

²⁴ Ngatedo oko kelo ringo me amuro kede ace apat di eko keto i nyim Saulo. Samuel oko waco be, “Neningo, ringo kame oudo kokano nin ine. Came; kokele i nyimi i esawa noni tetekeny icame kede wele kame kolwongo.” Aso, Saulo oko cam kede Samuel cenge nono.

²⁵ Kakame kiyai kede ki abila dok i bomba, oko peto ne Saulo kabuto i wi ot malo, en eko buto di eko nino.

Samuel Owiro Saulo Odoko Ngapug

²⁶ Di do piny otuno obai, Samuel oko lwongo Saulo ki wi ot be, “Yai tetekeny anyamaro in ioti.” Saulo oko yai di eko upere kede Samuel kioto i gudo.

²⁷ Kakame oudo kituno kede i ajikini me bomba, Samuel oko waco ne Saulo be, “Wace awobi no kat anyim. Ka en etieko kato in kong iko cungo pi esawa atitidi, tetekeny awaci gikame Rubanga owaco.”