1 Samuel 8 - Baibuli I Leb Kumam 2013

Jo Openyo be Kimito Abaka

¹ Kakame bin Samuel oti kede, en eko mino awobe mege obedo jongolkop i Isirael.

² Awobi kao mere oudo nyinge Yoweri, kede me are mere oudo nyinge Abija; gin oudo kibedo jongolkop i Beereseba.

³ Do awobe mege likame oko lubo ekite me kuo meren, do kiko lokere tenge bedo jo kame mito ud, omio kiko donyo gamo cemusana, doko di likame kingolo ne jo kop kakare.

⁴ Ceng moro acel joadongo me Isirael oko cokere karacel di kiko ot Rama but Samuel,

⁵ di kiko waco ne be, “Neningo, in itieko ti do awobe ni likame tie lubo ekite me kuo nin; pi mano, yer ne wan abaka kame bino pugo wa bala atekerin apat.”

⁶ Do Samuel likame cunye oko bedo yom kakame gin kiwaco kede be, “Yer ne wa abaka kame bino pugo wa.” Samuel oko lego but Rwot,

⁷ di Rwot oko waco ne be, “Yei kope dedede kame jo tie waco ni; pien likame gin kidagin, do gin kitieko daga bala abaka gi.

⁸ Bala kame gin kibedo timo nango kede cako i ceng kame ango awoto gi kede ki Misiri tuno tin, di kiweka kiko lokere woro rubangan ace, nan kitie timo ne ida kamanono.

⁹ Nan in do yei kop gi; kenekene in kwenyaro gi kite kame abaka bino tero gi kede.”

¹⁰ Aso, Samuel oko waco kope ka Rwot dedede ne jo kame oudo tie penye pi mino gi abaka.

¹¹ En ewaco negi be, “Abaka kame bino pugo wu bino tero wu kaman: en ebino kwanyo awobe wu di eko mino gi kidoko isirikalen; mogo bino tic kede cabalan me yi, apat mege bino bedo jo kame ringo kede asigiran mege me yi, kede apat mege bino bedo jo kame oto kede tien gi di kidaro cabalan me yi.

¹² En ebino mino mogo kikom gi doko jodongo me isirikalen tutumia, apat mege jodongo me isirikalen ot kany. Awobe wu bino puro poto mere, kede coko cam mege kipoto mere. Ace bino bedo jocwei jamini mege me yi kede me kom cabalan mege.

¹³ En ebino tero anyira wu kidoko jo kame nyalo nen mo angwe kur kede kame tedo nen cam kede kame tedo nen mugati.

¹⁴ En ebino gamo poti wu abeco me olok kede me olibeti di eko mino jotic mege adongo.

¹⁵ En ebino tero acel me tomon me engano wu kede me anyakini me olok wu di eko mino but jotic mege adongo.

¹⁶ En ebino tero ipasoi kede apasoi wu, kede doke kede pundan wu abeco di eko mino gi kidonyo timo nen tic.

¹⁷ En ebino tero acel me tomon me leini wu, di eko mino wun idokunu ipasoi mege.

¹⁸ I kare nono wun ibinunu bedo kede koko i kom abaka wu kame wun kikomu iyerunu, do Rwot likame bino gamo koko wu.”

¹⁹ Do jo oko dagi winyo kop ka Samuel; gin kiwaco be, “Li ba! Wan otieko moko be omito abaka apugo wa,

²⁰ tetekeny wada odok cal bala atekerin apat, di abaka wa pugo wa kede di etelo wa ot yi, doko di eyi pirwa.”

²¹ Samuel owinyo kope dedede kame jo owaco di eko waco gi ne Rwot.

²² Rwot oko waco ne Samuel be, “In yei gikame gin kiwaco di iko mino gi abaka kame pugo gi.” Samuel oko waco ne jo me Isirael be, “Ngat acelacel dok ture.”