1 Samuel 7 - Baibuli I Leb Kumam 2013

¹ Jo me Kiriat Yearim oko omo Sanduku me Isikan ka Rwot di kiko tere i ot ka Abinadab i wi emukura. Gin kiko kwero wode kame nyinge Eleasar pi bedo ngat kame gwoko Sanduku nono.

Samuel Opugo Isirael

² Sanduku me Isikan ka Rwot oko bedo Kiriat Yearim pi kare alac, aromo bala mwakini ot are, di jo dedede me Isirael oko donyo paro Rwot.

³ Samuel oko waco ne jo me Isirael be, “Ka imitunu dok but Rwot kede cunyu dedede, poore iwekunu rubangan mogo me kumbor, kede cal me rubanga adako anyinge Asitate. Ketunu cunyu i kom Rwot, di ikounu tic nen kenekene, di en eko bino lako wu ki cing jo me Pilistia.”

⁴ Aso, jo me Isirael oko weko caljwogi ka Baal kede me Asitate, di kiko donyo tic ne Rwot kenekene.

⁵ Di Samuel oko waco be, “Cokunu jo dedede me Isirael Misipa, ango abino lego but Rwot piru i kuno.”

⁶ Aso, jo oko cokere Misipa, di kiko twomo pii di kiko onye i nyim Rwot bala giamia, kiko kanyo kec cenge nono yuluyul. Gin kiwaco be, “Wan odubo i nyim Rwot.” Samuel bin oko doko ngat kame kope dedede me Isirael tie i cinge i Misipa.

⁷ Kakame jo me Pilistia owinyo kede be jo me Isirael bin ocokere Misipa, jopug kany me Pilistia oko yai kede isirikalen gi pi ot suro gi. Jo me Isirael oko winyo kop noni di lworo oko mako gi,

⁸ di kiko waco ne Samuel be, “Meede koko nakanaka but Rwot Rubanga wa pirwa; legi amoto elak wa ki cing jo me Pilistia.”

⁹ Aso, Samuel oko kwanyo atin emerekek apwodi dot di eko wange alutu bala giayala awanga but Rwot. Samuel oko kok but Rwot pi konyo jo me Isirael, Rwot oko gamo koko mere.

¹⁰ Kakame Samuel oudo tie mino kede giayala awanga, jo me Pilistia oko do nyiko iyapiyapi pi suro jo me Isirael; do i ceng nono dwan Rwot oko mwoc ne jo me Pilistia di eko mino wi gi ototolun, di gin kiko ringo tenge kibut jo me Isirael.

¹¹ Di do cuo me Isirael oko yai ki Misipa kiko donyo wapo jo me Pilistia, di kiko donyo neneko gi i yongayo paka tuno Betekar.

¹² Di do Samuel oko kwanyo kidi di eko sipe i dierediere me Misipa kede Yesana, di eko cako nying kanono be Ebenesa, piento en ewaco be, “Rwot obedo konyo wa paka kan.”

¹³ Aso, di oko bwono jo me Pilistia di likame bobo kiko donyo i lobo me jo me Isirael; Rwot oko bedo tic kede twer mere pi bwono jo me Pilistia i kare lung me kuo ka Samuel.

¹⁴ Rwot oko dwoko ne jo me Isirael bomban dedede kame jo me Pilistia oudo omao cako ki Ekuron tuno Gat, doko jo me Isirael oko dwoko lobo gi kibut jo me Pilistia. Anapakin da oudo tie i dierediere me jo me Isirael kede jo Amor.

¹⁵ Samuel oko pugo Isirael pi kare me kuo mere lung.

¹⁶ Mwaka acelacel en oudo erimaro Betel, Giligal, kede Misipa, di eko ngolo kop i diere me jo apido.

¹⁷ Ingei timo kamanono en bin eko dok ture i bomba me Rama, kakame bin en eko timo iye da tic me ngolo kop i diere me jo atie kede pido. En bin eko gero alutari me yalo Rubanga Rama.